കേരള കോണ്ഗ്രസ് അല്ല, കോണ്ഗ്രസ്
2011 ലെ തിരഞ്ഞെടുപ്പില് കോട്ടയം മണ്ഡലത്തില് ഏറ്റവും അധികം വോട്ടുപിടിച്ചത് കേരള കോണ്ഗ്രസ് എം ആയിരുന്നില്ല. കോണ്ഗ്രസ് പാര്ട്ടി ആയിരുന്നു. പുതുപ്പള്ളിയില് മുഖ്യമന്ത്രി ഉമ്മന് ചാണ്ടി നേടിയ ഭൂരിപക്ഷത്തെ വെല്ലാന് കേരള കോണ്ഗ്രസിന്റെ ഒരു സ്ഥാനാര്ത്ഥിക്കും കഴിഞ്ഞില്ല.
ഇതാണ് ഇപ്പോള് എല്ഡിഎഫിന്റെ പ്രതീക്ഷ. കസ്തൂരിരംഗന് വിഷയത്തിലും ഇടുക്കി സീറ്റിന്റെ കാര്യത്തിലും കോണ്ഗ്രസിനെ ഏറെ സമ്മര്ദ്ദത്തിലാക്കിയവരാണ് മാണിസാറും കൂട്ടരും. ഒരു വിഭാഗം കോണ്ഗ്രസ്സുകാരെങ്കിലും ഈ പ്രതിഷേധം വോട്ടായി ഇടതുപെട്ടിയില് ഇട്ടേക്കുമെന്നാണ് പ്രതീക്ഷ.
വൈകിയാണ് രംഗത്തിറങ്ങിയതെങ്കിലും മാത്യു ടി തോമസ് പ്രചാരണം കൊഴുപ്പിക്കുന്നുണ്ട്. തന്റെ വ്യക്തി പ്രഭാവവും ജനകീയ ഇടപെടലുകളും ആണ് മാത്യു ടി ഉപയോഗിക്കുന്നത്. ഒരു വിഭാഗം ക്രിസ്ത്യന് വോട്ടുകളും ലഭിക്കുമെന്ന് മാത്യു ടി തോമസ് പ്രതീക്ഷിക്കുന്നു.
കഴിഞ്ഞ നിയമസഭ തിരഞ്ഞെടുപ്പില് കോട്ടയത്തും, പിറവത്തും നേരിയ ഭൂരിപക്ഷത്തിനായിരുന്നു യുഡിഎഫിന്റെ വിജയം. പിറവത്ത് പിന്നീട് ഉപതിരഞ്ഞെടുപ്പില് ഭൂരിപക്ഷം കൂട്ടാന് യുഡിഎഫിന് കഴിഞ്ഞെങ്കിലും ആ രണ്ട് മണ്ഡലങ്ങളും കേന്ദ്രീകരിച്ച് ഇടത് പ്രവര്ത്തനങ്ങള് ശക്തമാണ്. കോട്ടയത്ത് കെഎം മാണിക്ക് പോലും ലഭിച്ചത് 5,259 വോട്ടുകളുടെ ഭൂരിപക്ഷം മാത്രമാണ്.
ഈ കണക്കുകള് മാറ്റി മറിക്കാനുള്ള സാഹചര്യം ഇപ്പോള് മണ്ഡലത്തില് ഉണ്ടെന്നാണ് ഇടതുമുന്നണിയുടെ കണക്കുകൂട്ടലുകള്. അങ്ങനെയെങ്കില് കന്നിവോട്ടര്മാര് കൂടി സഹായിച്ചാല് ഒരു പക്ഷേ കോട്ടയം ഇടതുപക്ഷത്തേക്ക് പോന്നേക്കുമെന്നും പ്രതീക്ഷിക്കുന്നു.