കോട്ടയത്ത് കഴുത്തറുത്ത് കൊന്ന സംഭവം : പ്രതിയുടെ രേഖാചിത്രം പുറത്തുവിട്ടു
കോട്ടയം : കോട്ടയത്ത് ഒരു കുടുംബത്തിലെ മൂന്ന് പേരെ ക്രൂരമായി കൊല ചെയ്ത സംഭവത്തില് പ്രതിയെന്ന് സംശയിക്കുന്നയാളുടെ രേഖ ചിത്രം പുറത്ത് വിട്ടു. ജയ്സിങിന്റെ രേഖാചിത്രമാണ് പുറത്തുവിട്ടത്. ഇയാള് ഉത്തര്പ്രദേശ് സ്വദേശിയാണ്. കൊല്ലപ്പെട്ട കുടുംബം നടത്തിയിരുന്ന അലക്കുകമ്പനിയിലെ ജീവനക്കാരനായിരുന്നു ജയ് സിങ്.
കോട്ടയം മണര്കാട് പാറമ്പുഴയിലാണ് സംഭവം.റിട്ടയേര്ഡ് ഹെല്ത്ത് ഇന്സ്പെക്ടര് ലാലസ്സണ്, ഭാര്യ പ്രസന്ന, മകന് പ്രവീണ് എന്നിവരാണ് കൊല്ലപ്പെട്ടത്. മൂവരുടെയും മൃതദേഹങ്ങള് പ്രവീണ് നടത്തിയിരുന്ന ഡ്രൈക്ലീനിംഗ് കടയില് നിന്നാണ് കണ്ടെത്തിയത്.
ആസിഡ് ഒഴിച്ചശേഷം കഴുത്ത് അറുത്ത നിലയിലായിരുന്നു മൃതദേഹങ്ങള് കണ്ടെത്തിയിരുന്നത്. കൊലയ്ക്ക് ഉപയോഗിച്ച വെട്ടുകത്തിയും കോടാലിയും സംഭവ സ്ഥലത്തുനിന്നും പോലീസ് കണ്ടെടുത്തിട്ടുണ്ട്.
ബിസിനസുമായി ബന്ധപ്പെട്ട് കുടുംബവും ജയ്സിങുമായി ഉണ്ടായ തര്ക്കങ്ങളാണ് കൊലപാതകത്തില് കലാശിച്ചതെന്നാണ് പോലീസിന്റെ നിഗമനം.ഡ്രൈക്ലീനിംഗ് കടയില് ജോലി ചെയ്തിരുന്ന ജയ് സിങിനെ സംഭവത്തിന് ശേഷം കാണാനില്ലായിരുന്നു. പോലീസ് ഇയാള്ക്ക് വേണ്ടിയുള്ള തിരച്ചില് ഊര്ജ്ജിതമാക്കിയിട്ടുണ്ട്.