കോഴിക്കോടും, തിരുവനന്തപുരത്തും മെട്രോ യാഥാര്ത്ഥ്യമാകും; ബജറ്റില് 20 കോടി രൂപ
കേരളത്തിന്റെ സ്വപ്ന പദ്ധതികളായ തിരുവനന്തപുരം, കോഴിക്കോട് ലൈറ്റ് മെട്രോ അതിവേഗം നടപ്പിലാക്കും എന്ന് മുഖ്യമന്ത്രി വിഡി സതീശന്. യുഡിഎഫ് സര്ക്കാരിന്റെ ആദ്യത്തെ ബജറ്റ് അവതരത്തിലാണ് പ്രഖ്യാപനം. തിരുവനന്തപുരം, കോഴിക്കോട് ലൈറ്റ് മെട്രോ നടപ്പിലാക്കും എന്നും ഇതിനായി ആദ്യ ഘട്ടത്തില് 20 കോടി രൂപ ബജറ്റില് വകയിരുത്തും എന്നും മുഖ്യമന്ത്രി പറഞ്ഞു.
അടുത്തിടെയാണ് തിരുവനന്തപുരം മെട്രോയുടെ ഡിപിആര് പൂര്ത്തിയാക്കിയത്. കോഴിക്കോട് മെട്രോയിലും തുടര്പ്രവര്ത്തനങ്ങള് വേഗത്തിലാക്കാനാണ് നീക്കം. കേരളത്തിലെ രണ്ട് പ്രമുഖ നഗരങ്ങളായ തിരുവനന്തപുരത്തിന്റെയും കോഴിക്കോടിന്റെയും ദീര്ഘകാലത്തെ സ്വപ്നങ്ങളിലൊന്നാണ് മെട്രോ റെയില്. കൊച്ചി മെട്രോ റെയില് ലിമിറ്റഡ് (കെഎംആര്എല്) ആണ് ഈ രണ്ട് പദ്ധതികളുടെയും നിര്വ്വഹണ ചുമതല ഏറ്റെടുത്തിരിക്കുന്നത്.
മെട്രോ യാഥാര്ത്ഥ്യമാകുന്നതോടെ സംസ്ഥാനത്തെ പ്രമുഖ രണ്ട് മേഖലകളില് വലിയ രീതിയിലുള്ള സാമ്പത്തിക വികസന മുന്നേറ്റത്തിന് ഇത് വഴിയൊരുക്കുമെന്നാണ് പ്രതീക്ഷിക്കുന്നത്. ആദ്യഘട്ടത്തില് തിരുവനന്തപുരത്തും കോഴിക്കോട്ടും 'ലൈറ്റ് മെട്രോ' എന്ന പദ്ധതിയാണ് വിഭാവനം ചെയ്തിരുന്നതെങ്കിലും നിര്മ്മാണ രീതിയിലെ വികാസങ്ങള് കണക്കിലെടുത്ത് ഇതില് മാറ്റങ്ങള് വരുത്താന് അധികൃതര് തീരുമാനിക്കുകയായിരുന്നു.
തിരുവനന്തപുരത്ത് ഇപ്പോള് മീഡിയം മെട്രോ അഥവാ പരമ്പരാഗത രീതിയിലുള്ള മെട്രോയ്ക്കാണ് മുന്ഗണന. കോഴിക്കോട്ടും നഗരത്തിലെ ജനസാന്ദ്രതയും റോഡ് വികസന സാധ്യതകളും വിലയിരുത്തി ഏറ്റവും ലാഭകരവും ജനോപകാരപ്രദവുമായ മെട്രോ മാതൃക കണ്ടെത്താനുള്ള ചര്ച്ചകളാണ് നടക്കുന്നത്. പുതിയ സമഗ്ര മൊബിലിറ്റി പ്ലാനിന് കഴിഞ്ഞ സര്ക്കാര് രൂപം നല്കിയതോടെയാണ് പദ്ധതി അടുത്ത ഘട്ടങ്ങളിലേക്ക് പ്രവേശിച്ചത്.
ഇപ്പോള് ബജറ്റില് തുക വകയിരുത്തിയതോടെ വേഗത്തില് പദ്ധതി നടപ്പിലാകും എന്നാണ് പ്രതീക്ഷിക്കുന്നത്. കൊച്ചി മെട്രോ വിജയകരമായി സര്വീസ് തുടരുന്ന സാഹചര്യത്തില് ഈ രണ്ട് നഗരങ്ങളിലെയും ജനങ്ങള് മെട്രോയ്ക്കായി ഏറെ ആകാംക്ഷയോടെയാണ് കാത്തിരിക്കുന്നത്. റോഡുകളിലെ അനിയന്ത്രിതമായ വാഹനപ്പെരുപ്പവും സ്ഥലപരിമിതിയും മൂലം ശ്വാസംമുട്ടുന്ന ഇരു നഗരങ്ങള്ക്കും പുതിയ മെട്രോ സംവിധാനം വലിയൊരു അനുഗ്രഹമായി മാറും.
തിരുവനന്തപുരം മെട്രോ റെയില് പദ്ധതിക്കായി നിലവില് 8000 കോടി രൂപയാണ് ചെലവ് പ്രതീക്ഷിക്കുന്നത്. പുതുക്കിയ അലൈന്മെന്റ് പ്രകാരം തിരുവനന്തപുരം മെട്രോയുടെ ആകെ ദൂരം 31 കിലോമീറ്റര് ആയിരിക്കും. പാപ്പനംകോട് മുതല് ഈഞ്ചക്കല് വരെ ആകെ 27 സ്റ്റേഷനുകള് ഉണ്ടായിരിക്കും.
പാപ്പനംകോട് നിന്ന് ആരംഭിച്ച് കൈമനം, കരമന, തമ്പാനൂര്, സെക്രട്ടറിയേറ്റ്, പാളയം, പ്ലാമൂട്, പട്ടം, മുറിഞ്ഞപാലം, മെഡിക്കല് കോളേജ്, ഉള്ളൂര്, പൊങ്ങുമൂട്, ശ്രീകാര്യം,പങ്ങപ്പാറ, ഗുരുമന്ദിരം, കാര്യവട്ടം, ടെക്നോപാര്ക്ക് ഫേസ് 1, ടെക്നോപാര്ക്ക് ഫേസ് 3, കുളത്തൂര്, ടെക്നോപാര്ക്ക് ഫേസ് 2, ആക്കുളം കായല്, കൊച്ചുവേളി, വെണ്പാലവട്ടം, ചാക്ക, എയര്പോര്ട്ട്, ഈഞ്ചക്കല്, കഴക്കൂട്ടം, കാര്യവട്ടം എന്നിവയാണ് മെട്രോ സ്റ്റേഷനുകള്.
മെഡിക്കല് കോളേജ് മുതല് മീഞ്ചന്ത വരെ നീളുന്ന പ്രധാന റൂട്ടാണ് കോഴിക്കോട് മെട്രോയ്ക്കായി പ്രധാനമായും രൂപകല്പ്പന ചെയ്തിട്ടുള്ളത്. നഗര കേന്ദ്രങ്ങളിലൂടെ പരമാവധി യാത്രക്കാരെ ആകര്ഷിക്കാന് കഴിയുന്ന രീതിയിലാണ് ഈ പാത നിശ്ചയിച്ചിട്ടുള്ളത്. കോഴിക്കോട് കെഎസ്ആര്ടിസി ബസ് സ്റ്റാന്ഡ്, പ്രധാന റെയില്വേ സ്റ്റേഷന് എന്നിവയുമായി ബന്ധിപ്പിക്കുന്നത് വഴി യാത്രക്കാര്ക്ക് കൂടുതല് സൗകര്യമാവും.
ആയിരക്കണക്കിന് കോടി രൂപ നിര്മ്മാണച്ചെലവ് പ്രതീക്ഷിക്കുന്ന ഈ പദ്ധതികളില് സുപ്രധാനമായ വിദേശ നിക്ഷേപങ്ങളും കെഎംആര്എല് പ്രതീക്ഷിക്കുന്നുണ്ട്. പദ്ധതിയുടെ സാമ്പത്തിക ബാധ്യത ലഘൂകരിക്കുന്നതിനായും നിക്ഷേപകരെ കണ്ടെത്തുന്നതിനായി വിവിധ അന്താരാഷ്ട്ര ധനകാര്യ ഏജന്സികളുമായി ചര്ച്ചകള് നടക്കുന്നുണ്ട്.
Click it and Unblock the Notifications
Sign in with Google