ജയിച്ചത് യുഡിഎഫ്, പാറിയത് ലീഗ്കൊടി:കുഞ്ഞാലികുട്ടി
മാനന്തവാടി: വരുന്ന ലോക് സഭാതെരഞ്ഞെടുപ്പിന് നേതാക്കള് കച്ചമുറുക്കികഴിഞ്ഞു. വയനാട് സീറ്റിന് പരോക്ഷമായ അവകാശവാദവുമായി പികെ കുഞ്ഞാലിക്കുട്ടിയാണ് ഇപ്പോള് രംഗത്ത് വന്നിരിക്കുന്നത്. പൊന്നാനി, മലപ്പുറം, വയനാട് സീറ്റുകള് എല്ഡി എഫ് അവരുടെ പട്ടികയില് ഉള്പ്പെടുത്തിയിട്ടുണ്ടെങ്കില് വെട്ടുന്നതാണ് നല്ലതെന്നാണ് കുഞ്ഞാലികുട്ടിയുടെ ഉപദേശം.
മുസ്ലീം ലീഗിന്റെ വയനാട് പാര്ലമെന്റ് മണ്ഡലം കണ്വെന്ഷനില് സംസാരിക്കുകയായിരുന്നു കുഞ്ഞാലിക്കുട്ടി. കഴിഞ്ഞ പാര്ലമെന്റ് തെരഞ്ഞെടുപ്പില് വടകരയിലും കണ്ണൂരും ജയിച്ചത് യുഡി എഫ് ആയിരിക്കാം. പക്ഷേ വാനിലുയര്ന്നു പാറിയത് ലീഗിന്റെ കൊടിയാണെന്ന് അദ്ദേഹം പറഞ്ഞു.
വിവാദങ്ങള്ക്ക് ലീഗിനെ തോല്പ്പിക്കാനാകില്ല. മാധ്യമങ്ങള്ക്ക് എരിവും പുളിയും ഏറെ കൊടുക്കാന് കഴിയുന്നു ഒരു പാര്ട്ടിയാണ് മുസ്ലീം ലീഗ്. വിവാദങ്ങള് ലീഗിനെ സംബന്ധിച്ച് ഒരു പ്രശ്നമല്ല- കുഞ്ഞാലികുട്ടി പറഞ്ഞു.
യുഡിഎഫ് സ്ഥാനാര്ത്ഥികളുടെ വിജയം നിര്ണയിക്കുന്നത് മുസ്ലീം ലീഗാണെന്ന് പറഞ്ഞ് കെപിഎ മജീദും രംഗത്തെത്തി. എതിര്ക്കുന്നവരെയും സഹായിക്കുന്ന പാര്ട്ടിയാണ് ലീഗെന്ന് പറഞ്ഞുകൊണ്ടായിരുന്നു അണികളെ ആവേശം കൊള്ളിക്കുന്ന തരത്തിലുള്ള മജീദിന്റെ പ്രസംഗം.