ഭാഗ്യം സോപ്പ് കൊണ്ടുപോയേനെ...!!! 65 ലക്ഷത്തിന്റെ ലോട്ടറി ടിക്കറ്റ് കിടന്നത് അലക്കാനുള്ള ഷര്ട്ടില്
കണ്ണാടി കമ്മാട് വീട്ടില് ജോര്ജ്ജ് കുട്ടിയെ ഭാഗ്യദേവത കടാക്ഷിച്ചു.
കുട്ടനാട്: കണ്ണാടി കമ്മാട് വീട്ടില് ജോര്ജ്ജ് കുട്ടിയെ ഭാഗ്യദേവത കടാക്ഷിച്ചു. 65 ലക്ഷത്തിന്റെ ലോട്ടറി, എന്നാല് അശ്രദ്ധ കൊണ്ട് നഷ്ടപ്പെടുമായിരുന്ന ലോട്ടറി തിരികെ കിട്ടിയത് മറ്റൊരു ഭാഗ്യം.
തിങ്കളാഴ്ച നടന്ന വിന് വിന് ലോട്ടറിയുടെ നറുക്കെടുപ്പിലാണ് ജോര്ജ്ജ്കുട്ടിയ്ക്ക് സമ്മാനം അടിച്ചത്. മേസ്തിരിപ്പണിയ്ക്ക് സഹായി ആയി പള്ളാത്തുരുത്തിയില് ജോലി ചെയ്യുമ്പോഴാണ് സമ്മാനാര്ഹമായ ടിക്കറ്റ് എടുത്തത്. ടിക്കറ്റ് നറുക്കെടുക്കുന്നത് നോക്കാതെ ഷര്ട്ട് അലക്കാനിട്ട് ജോര്ജ്ജ്കുട്ടി പണിയ്ക്ക് പോയി. ഭര്ത്താവ് സ്ഥിരമായി ടിക്കറ്റ് എടുക്കുന്നത് അറിയാവുന്നത് കൊണ്ട് ഭര്ത്താവിന്റെ ഷര്ട്ടിന്റെ പോക്കറ്റില് കിടന്നിരുന്ന ടിക്കറ്റ് പത്രത്തില് വന്ന ഫലവുമായി ഭാര്യ ബിന്സി ഒത്തുനോക്കി. അപ്പോഴാണ് അറിയുന്നത് ഒന്നാം സമ്മാനം ജോര്ജ്ജ് കുട്ടിയ്ക്ക് ആണെന്ന്.
ബിന്സി ഉടന് തന്നെ ഭര്ത്താവിനെ വിവരം അറിയിച്ചു. മകനോടൊപ്പം ചെന്ന് സമ്മാനാര്ഹമായ ടിക്കറ്റ് ബാങ്കില് എത്തിച്ചു. ജോര്ജ്ജ് കുട്ടിയ്ക്കും ബിന്സിയ്ക്കും രണ്ട് മക്കളാണ്. മൂത്തമകന് ജെറിന് എഞ്ചിനീയറിംഗ് വിദ്യാര്ത്ഥിയാണ്. ഇളയമകന് ഐടിഐ വിദ്യാര്ത്ഥിയും. മക്കളുടെ പഠനത്തിനായി എടുത്ത വായ്പ അടച്ച് തീര്ക്കണം, നല്ലൊരു വീട് പണിയണം ഇതൊക്കെയാണ് ജോര്ജ്ജ്കുട്ടിയുടെ ആഗ്രഹം.