തലസ്ഥാനത്ത് ലൈറ്റ് മെട്രോ; 27 സ്‌റ്റേഷനുകള്‍: ആദ്യഘട്ട അലൈന്‍മെന്റിന് അംഗീകാരം: ഇതാണ് റൂട്ട്

തിരുവനന്തപുരം: തലസ്ഥാനത്തെ ഗതാഗതക്കുരുക്കില്‍ വീര്‍പ്പുമുട്ടുന്ന യാത്രക്കാര്‍ക്ക് സന്തോഷ വാര്‍ത്ത. തിരുവനന്തപുരത്ത് ലൈറ്റ് മെട്രോ വരുന്നു. ലൈറ്റ് മെട്രോ റെയില്‍ പദ്ധതിയുടെ ആദ്യഘട്ട അലൈന്‍മെന്റിന് സംസ്ഥാന സര്‍ക്കാരിന്റെ അംഗീകാരം. കൊച്ചി മെട്രോ റെയില്‍ ലിമിറ്റഡ് (കെഎംആര്‍എല്‍) പദ്ധതി നിര്‍വഹണത്തിന് നേതൃത്വം നല്‍കും. തിരുവനന്തപുരം പാപ്പനംകോട് നിന്ന് തുടങ്ങി ഈഞ്ചക്കല്‍ വരെ 31 കിലോമീറ്ററാണ് ലൈറ്റ് മെട്രോ ഓടുന്നത്.

പദ്ധതി യാഥാര്‍ത്ഥ്യമാകുന്നതോടെ തലസ്ഥാന നഗരിയിലെ ജനങ്ങളുടെ ദീര്‍ഘകാല ആവശ്യവും സ്വപ്നവുമാണ് പൂവണിയുന്നത്. ടെക്‌നോപാര്‍ക്കിന്റെ മൂന്ന് ഫേസുകള്‍, വിമാനത്താവളം, തമ്പാനൂര്‍ ബസ്റ്റാന്‍ഡ്, റെയില്‍വേ സ്റ്റേഷന്‍ സെക്രട്ടറിയേറ്റ്, മെഡിക്കല്‍ കോളജ് എന്നിവ ബന്ധിപ്പിക്കുന്ന ആദ്യഘട്ട അലൈന്‍മെന്റിനാണ് അംഗീകാരം നല്‍കിയിരിക്കുന്നത്.

ലൈറ്റ് മെട്രോ പാപ്പനംകോട് നിന്ന് ആരംഭിച്ച് കിള്ളിപ്പാലം, പാളയം, ശ്രീകാര്യം, കഴക്കൂട്ടം, ടെക്‌നോപാര്‍ക്ക്, കൊച്ചുവേളി, വിമാനത്താവളം വഴി ഈഞ്ചക്കലില്‍ അവസാനിക്കും. ഈ റൂട്ടില്‍ 27 സ്റ്റേഷനുകള്‍ ഉണ്ടായിരിക്കും. കഴക്കൂട്ടം/ടെക്‌നോപാര്‍ക്ക്/കാര്യവട്ടം എന്നിവയായിരിക്കും ഇന്റര്‍ചേഞ്ച് സ്റ്റേഷനുകള്‍.

തിരുവനന്തപുരം ലൈറ്റ് മെട്രോയുടെ മുന്നൊരുക്കത്തിന്റെ ഭാഗമായി ശ്രീകാര്യം, ഉള്ളൂര്‍, പട്ടം എന്നീ മേല്‍പ്പാലങ്ങളുടെ നിര്‍മ്മാണ ചുമതല കൊച്ചി മെട്രോ റെയില്‍ ലിമിറ്റഡിനെ ഏല്‍പ്പിച്ചിരുന്നു. ലൈറ്റ് മെട്രോയുടെ നിര്‍മാണം കൂടി മുന്നില്‍ കണ്ടുകൊണ്ടാണ് ഈ മേല്‍പ്പാലങ്ങള്‍ നിര്‍മിക്കുന്നത്. ഇതില്‍ ശ്രീകാര്യം മേല്‍പ്പാലത്തിന്റെ നിര്‍മ്മാണം ദ്രുതഗതിയില്‍ പുരോഗമിക്കുകയാണ്. അതിവേഗം വളരുന്ന തിരുവനന്തപുരത്തിന്റെ ഭാവി വികസനത്തിന് മെട്രോ റെയില്‍ പദ്ധതി ഊര്‍ജം പകരുമെന്നാണ് പ്രതീക്ഷ.

ലൈറ്റ് മെട്രോ വരുന്നതോടെ തലസ്ഥാന നഗരിയുടെ ദീര്‍ഘകാല ആവശ്യത്തിനാണ് അംഗീകാരം ലഭിച്ചിരിക്കുന്നത്. നിലവില്‍ കൊച്ചിയില്‍ മാത്രമാണ് മെട്രോയുള്ളത്. തിരുവനന്തപുരം മെട്രോയ്ക്ക് പിന്നാലെ കോഴിക്കോടും പരിഗണനയിലാണ്. മുഖ്യമന്ത്രി പിണറായി വിജയന്റെ നേതൃത്വത്തിലാണ് പദ്ധതിയുടെ ആദ്യഘട്ട അലൈന്‍മെന്റ് അംഗീകാരം നല്‍കിയത്.

തിരുവനന്തപുരത്ത് മെട്രോ പദ്ധതി ഒരു ദശാബ്ദം മുമ്പ് വിഭാവനം ചെയ്തതാണെങ്കിലും പല കാരണങ്ങളാല്‍ നീണ്ടു പോകുകയായിരുന്നു. നിരവധി സര്‍ക്കാര്‍ ഓഫീസുകളും വിദ്യാഭ്യാസ സ്ഥാപനങ്ങളും ഐടി ഉള്‍പ്പെടെയുള്ള സ്ഥാപനങ്ങളും ഉള്ള തിരുവനന്തപുരത്ത് മെട്രോ വന്നാല്‍ അത് നിരവധി യാത്രക്കാര്‍ക്ക് പ്രയോജനം ചെയ്യും. നഗരത്തിന്റെ രൂക്ഷമായ ഗതാഗതക്കുരുക്കിനും
പ്രയോജനം ചെയ്യും.

ചെറു നഗരങ്ങളുടെ ഗതാഗത ആവശ്യങ്ങള്‍ക്ക് ഏറ്റവും ഇണങ്ങുന്നതാണ് ലൈറ്റ് മെട്രോ. മെട്രോയെ അപേക്ഷിച്ച് കുറഞ്ഞ നിര്‍മ്മാണ ചിലവും പരിപാലനവും ആണ് മെട്രോ ലൈറ്റിന്റെ സവിശേഷത. റോഡ് നിരപ്പില്‍ പ്രത്യേകം വേര്‍തിരിച്ച ലൈനുകളിലൂടെയാണ് ലൈറ്റ് മെട്രോ ഓടുന്നത്. മണിക്കൂറില്‍ പരമാവധി വേഗം 60 കിലോമീറ്റര്‍ ആണ്. വൈദ്യുതി ഉപയോഗിച്ചാണ് സാധാരണ ലൈറ്റ് മെട്രോ പ്രവര്‍ത്തിക്കുന്നത്.