വൈദ്യുതി നിയന്ത്രണം പിന്വലിയ്ക്കാന് സാധ്യത
തിരുവനന്തപുരം: ലോഡ് ഷെഡിംഗ് പിന്വലിയ്ക്കാന് സാധ്യത. നന്നായി മഴ ലഭിയ്ക്കുകയും ശബരിഗിരി പദ്ധതിയുടെ അറ്റകുറ്റ പണികള് പൂര്ത്തിയാക്കുകയും ചെയ്താല് ജൂണ് അവസാനത്തോടെ തന്നെ ലോഡ് ഷെഡിംഗ് ഒഴിവാക്കാനാകുമെന്ന് ആര്യാടന് മുഹമ്മദ്. അടിയന്തര പ്രമേയത്തിനുള്ള നോട്ടീസിന് മറുപടിയായാണ് അദ്ദേഹം ഇക്കാര്യം പറഞ്ഞത്.
കേന്ദ്രവിഹിതത്തിലുണ്ടായ വലിയ കുറവാണ് സംസ്ഥാനത്തെ വൈദ്യുതി പ്രതിസന്ധിയ്ക്ക് കാരണമായതെന്നും വൈദ്യുതി മന്ത്രി സഭയെ അറിയിച്ചു. എന്നാല് വൈദ്യുതി മന്ത്രിയ്ക്ക് തന്റെ വകുപ്പില് ഒരു താത്പര്യവുമില്ലെന്നും മറ്റ് പല കാര്യങ്ങളിലുമാണ് താത്പര്യമെന്നും പ്രതിപക്ഷ നേതാവ് വിഎസ് അച്യുതാനന്ദന് പ്രതികരിച്ചു.
കെഎസ്ഇബിയുടെ ആസൂത്രണമില്ലായ്മയാണ് പ്രതിസന്ധിയ്ക്ക് കാരണമെന്ന് അടിയന്തര പ്രമേയത്തിന് നോട്ടീസ് നല്കിയ എകെ ബാലന് ആരോപിച്ചു. എന്നാല് അവതരണാനുമതി നിഷേധിച്ചതോടെ പ്രതിപക്ഷം സഭയില് നിന്ന് ഇറങ്ങിപ്പോയി.
ശബരിഗിരി പദ്ധതിയില് ഉള്പ്പടെ അറ്റകുറ്റപ്പണി നടക്കുന്നതിനാല് സംസ്ഥാനത്ത് ആദ്യം 45 മിനിട്ട് വൈദ്യുതി നിയന്ത്രണം ഏര്പ്പെടുത്തിയിരുന്നു. എന്നാല് കഴിഞ്ഞ ദിവസങ്ങളില് ഈ നിയന്ത്രണം ഒരു മണിയ്ക്കൂര് ആയി ഉയര്ത്തിയിരുന്നു. ഇതിനെതിരെ കടുത്ത പ്രതിഷേധങ്ങളാണ് ഉയര്ന്നത്.