വടകര പിടിക്കാന് ജയരാജന് കഴിയില്ല; ഇഞ്ചോടിഞ്ചെങ്കിലും കോഴിക്കോട് രാഘവന് തന്നെ, മനോരമ സര്വെ
Recommended Video
കോഴിക്കോട്: കേരളത്തില് ഏറ്റവും ശ്രദ്ധേയമായ മത്സരം നടക്കുന്ന മണ്ഡലങ്ങളില് ഒന്നാണ് വടകര. നിയമസഭാ തിരഞ്ഞെടുപ്പുകളില് ഇടത് കോട്ടയായി നിലനില്ക്കുന്ന വടകര കഴിഞ്ഞ രണ്ട് തവണയും മുല്ലപ്പള്ളി രാമചന്ദ്രനിലൂടെ യുഡിഎഫി പിടിച്ചെടുത്തിരുന്നു. എന്നാല് ഇത്തവണ എന്തുവില കൊടുത്തും വടകര തിരിച്ചു പിടിക്കാനാണ് സിപിഎമ്മിന്റെ ശ്രമം. അതിനായി പാര്ട്ടിയുടെ ഏറ്റവും കരുത്തനായ നേതാവായ പി. ജയരാജനെ തെന്നയാണ് സിപിഎം കളത്തിലിറക്കിയത്.
എന്നാല് ജയരാജന് വന്നാലും സിറ്റിങ് സീറ്റ് യുഡിഎഫ് നിലനിര്ത്തുമെന്നാണ് മനോരമ ന്യൂസ്-കാര്വി സര്വ്വെ പ്രവചിക്കുന്നത്. കെ മുരളീധരന് പി ജയരാജനെ മറികടക്കാന് കഴിയുമെന്ന് തന്നെയാണ് സര്വ്വെ അഭിപ്രായപ്പെടുന്നത്. ന്യൂനപക്ഷ വോട്ടുകളുടെ കേന്ദ്രീകരണവും വയനാട്ടിലെ രാഹുലിന്റെ സാന്നിധ്യവും വടകരയില് യുഡിഎഫിന് ഗുണകരമാവുമെന്നാണ് വിലയിരുത്തല്.
വടകരയ്ക്ക് ഒപ്പം സിറ്റിങ് സീറ്റായ കോഴിക്കോട് ലോക്സഭാ മണ്ഡലവും യുഡിഎഫ് നിലനിര്ത്തുമെന്നാണ് സര്വ്വെ അഭിപ്രായപ്പെടുന്നത്. എ പ്രദീപ് കുമാറിലൂടെ എംകെ രാഘവന് ശക്തമായ വെല്ലുവിളിയുയരത്താന് ഇടതുമുന്നണിക്ക് കഴിഞ്ഞെങ്കിലും വോട്ട് വിഹിതത്തില് 2 ശതമാനത്തിന്റെ മുന്തൂക്കമാണ് സര്വ്വെ പ്രവചിക്കുന്നത്.
കഴിഞ്ഞ വര്ഷത്തെ ഭൂരിപക്ഷം നേടാന് കഴിയില്ലെങ്കിലും എംകെ രാഘവന് 15000 വോട്ടുകള്ക്ക് വിജയിക്കുമെന്നാണ് നിയമസഭാ മണ്ഡലം കമ്മിറ്റികള് നല്കിയ കണക്കുകള് പരിശോധിച്ച് യുഡിഎഫ് അവകാശപ്പെട്ടത്. എന്നാല് ഇത്രമികച്ച പ്രകടനം നടത്താന് യുഡിഎഫിന് കഴിയില്ലെന്നാണ് മനോരമ ന്യൂസ് സര്വ്വെ പ്രവചിക്കുന്നത്.