അക്കൗണ്ട് തുറന്നില്ലെങ്കിലും ബിജെപിക്ക് വോട്ട് കൂടി; 2 ലക്ഷം കടന്നത് 5 പേര്‍

തിരുവനന്തപുരം: രാജ്യത്താകെ മോദി തരംഗം ആഞ്ഞടിച്ചിട്ടും കേരളത്തില്‍ അക്കൗണ്ട് തുറക്കാനാവാത്തതിന്‍റെ നിരാശയിലാണ് ബിജെപി. വിജയമുറപ്പിച്ച തിരുവനന്തപുരത്ത് ഒരുലക്ഷത്തിനടുത്ത് വോട്ടുകളുടെ ഭൂരിപക്ഷത്തിനാണ് യുഡിഎഫ് സ്ഥാനാര്‍ത്ഥി ശശി തരൂര്‍ വിജയത്തിലേക്ക് നീങ്ങുന്നത്. ബിജെപി വിജയം പ്രതീക്ഷിച്ച മറ്റൊരു മണ്ഡലമായ പത്തനംതിട്ടയില്‍ കെ സുരേന്ദ്രന്‍ മൂന്നാംസ്ഥാനത്താണ്.

സുരേഷ് ഗോപി സ്ഥാനാര്‍ത്ഥിയായി എത്തിയതോടെ തൃശൂരും ശ്രദ്ധാകേന്ദ്രമായിരുന്നു. എന്നാല്‍ അവിടേയും ബിജെപിക്ക് തിരിച്ചടി നേരിടേണ്ടി വന്നു. ശബരിമല വിഷയം ഫലത്തില്‍ യുഡിഎഫിന് ഗുണം ചെയ്തുവെന്നാണ് ബിജെപിയുടെ പ്രാഥമിക വിലയിരുത്തല്‍.

അക്കൗണ്ട് തുറക്കാന്‍ കഴിഞ്ഞില്ലെങ്കിലും സംസ്ഥാനത്ത് വോട്ട് വര്‍ധിച്ചുവെന്നത് മാത്രമാണ് കേരളത്തിലെ ബിജെപിക്ക് ആശ്വസിക്കാനുള്ള ഏക കാര്യം. ആദ്യമായിട്ടാണ് ബിജെപി കേരളത്തില്‍ ഇത്രയധികം വോട്ടുകള്‍ നേടുന്നത്. 2014ലേതിനേക്കാള്‍ 7 ശതമാനം അധികം വോട്ട് കേരളത്തില്‍ ബിജെപിക്ക് ലഭിച്ചിട്ടുണ്ടെന്നും ഇത് വലിയ നേട്ടമാണെന്നും സംസ്ഥാന പ്രസിഡന്‍റ് ശ്രീധരന്‍ പിള്ള അഭിപ്രായപ്പെട്ടു.

മൂന്ന് ലക്ഷത്തിലേറെ വോട്ടുകള്‍ നേടിയ കുമ്മനമാണ് സംസ്ഥാനത്ത് ഏറ്റവും കൂടുതള്‍ വോട്ടുകള്‍ നേടിയ ബിജെപി സ്ഥാനാര്‍ത്ഥി. പത്തനംതിട്ടയില്‍ കെ സുരേന്ദ്രന്‍ 2.95 ലക്ഷവും തൃശൂരില്‍ സുരേഷ് ഗോപി 2.93 ലക്ഷം വോട്ടും നേടി. പാലക്കാടും ശ്രദ്ധേയമായ പ്രകടനം കാഴ്ച്ചവെക്കാന്‍ ബിജെപിക്ക് സാധിച്ചു. മണ്ഡലത്തില്‍ സി കൃഷ്ണകുമാര്‍ നേടിയ വോട്ടുകള്‍ 2.17 ലക്ഷമാണ്. ആറ്റിങ്ങലില്‍ ശോഭാസുരേന്ദ്രന്‍ 2.37 ലക്ഷം വോട്ടുകളും കരസ്ഥമാക്കി. എറണാകുളത്ത് കണ്ണന്താനം 1.37 ലക്ഷം വോട്ടുകള്‍ നേടിയപ്പോള്‍ ആലപ്പുഴയില്‍ കെഎസ് രാധാകൃഷ്ണന്‍ 1.77 ലക്ഷം വോട്ടുകള്‍ കരസ്ഥമാക്കി.

English summary

Lok Sabha Election Results 2019: bjp gain more vote