എൽപിജി ക്ഷാമം: പ്രവർത്തനം മുടങ്ങി കോഴിക്കോടും കാസർഗോഡുമുളള ശ്മശാനങ്ങൾ

എൽപിജി ക്ഷാമം സംസ്ഥാനത്തെ വീടുകളിലേയും ഹോട്ടലുകളിലേയും അടുക്കളകളെയും മാത്രമല്ല ബാധിച്ചിരിക്കുന്നത്.. ചിലയിടങ്ങളിൽ ശ്മശാനങ്ങൾ വരെ പ്രവർത്തനം മുടക്കിയിരിക്കുകയാണ്. കാസർഗോഡ്, കോഴിക്കോട് ജില്ലകളിലെ ചില ശ്മശാനങ്ങൾക്കാണ് പ്രവർത്തനം നിർത്തിവെക്കേണ്ടി വന്നിരിക്കുന്നത്.

എൽപിജി ക്ഷാമം തുടർന്നാൽ മാർച്ച് 13നകം പരമ്പരാഗത രീതികൾ ഉപയോഗിച്ച് ശവസംസ്കാരം നടത്തേണ്ടി വരുമെന്ന് കോഴിക്കോട് കോർപ്പറേഷൻ അധികൃതർ അറിയിച്ചു. മാവൂർ റോഡിന് സമീപത്തെ സ്മൃതിപഥം ശ്മശാനത്തിൽ വ്യാഴാഴ്ച ഒരു മൃതദേഹം മാത്രമാണ് സംസ്കരിക്കാനായത്.

"സ്മൃതിപഥത്തിൽ മാസത്തിൽ 95 മൃതദേഹങ്ങൾ വരെ സംസ്കരിക്കാറുണ്ട്. എന്നാൽ നിലവിലെ സാഹചര്യത്തിൽ പതിവുപോലെ സേവനം നൽകാൻ കഴിയില്ല. ആവശ്യത്തിന് എൽപിജി സിലിണ്ടറുകൾ മുൻകൂട്ടി ഉറപ്പാക്കാതെ ബുക്കിംഗുകൾ സ്വീകരിക്കാൻ സാധിക്കില്ല," കോഴിക്കോട് കോർപ്പറേഷൻ ഹെൽത്ത് ഇൻസ്പെക്ടർ സതീഷ് ബാബു പറഞ്ഞു. നാല് ഫർണസുകളുള്ള സ്മൃതിപഥത്തിന് ഓരോന്നിനും 12 സിലിണ്ടറുകൾ വീതം ആകെ 48 സിലിണ്ടറുകൾ എപ്പോഴും ആവശ്യമാണ്.

എൽപിജി ലഭ്യമല്ലാത്തതിനെ തുടർന്ന് വെസ്റ്റ് ഹിൽ ശ്മശാനത്തിലും ബുക്കിംഗുകൾ സ്വീകരിക്കാൻ കഴിഞ്ഞില്ല. ഇതോടെ സേവനം തേടുന്നവർക്ക് മറ്റ് പരമ്പരാഗത ശ്മശാനങ്ങളെ ആശ്രയിക്കേണ്ടി വന്നു. ശവസംസ്കാരത്തെ അവശ്യ സേവനമായി പരിഗണിച്ച് എൽപിജി ക്ഷാമം പരിഹരിക്കണമെന്ന് ആവശ്യപ്പെട്ട് കോർപ്പറേഷൻ സെക്രട്ടറി ബിപിസിഎൽ അധികൃതർക്ക് കത്ത് നൽകിയതായി ഡെപ്യൂട്ടി മേയർ എസ്. ജയശ്രീ വ്യാഴാഴ്ച അറിയിച്ചു.

പ്രശ്നം അടിയന്തരമായി പരിഹരിക്കാൻ റവന്യൂ വകുപ്പിലെ ഉന്നത ഉദ്യോഗസ്ഥൻ ഇടപെട്ടിട്ടുണ്ട്. സംസ്ഥാനത്തുടനീളം നിരവധി ഗ്യാസ് ശ്മശാനങ്ങളുടെ പ്രവർത്തനം തടസ്സപ്പെട്ടതിനാൽ, വിതരണക്കാരുടെ പിന്തുണയോടെ ഇത് പരിഹരിക്കാൻ സംസ്ഥാന സർക്കാരും ശ്രമിക്കുന്നു.

കാസർഗോഡ് ഈസ്റ്റ് എളേരി ഗ്രാമപഞ്ചായത്തിലെ കടുമേനി വാർഡിലുള്ള ഗ്യാസ് ശ്മശാനവും എൽപിജി ക്ഷാമം കാരണം പ്രതിസന്ധിയിലായി. ഗാർഹിക വിതരണത്തിന് മുൻഗണന നൽകാനുള്ള കേന്ദ്ര നിർദ്ദേശത്തെ തുടർന്ന് ചെറുപുഴയിലെ പ്രാദേശിക വിതരണക്കാരൻ സിലിണ്ടറുകൾ നിഷേധിച്ചതോടെ ബുധനാഴ്ച പ്രവർത്തനം തടസ്സപ്പെട്ടു. എന്നാൽ, പഞ്ചായത്ത് അധികൃതർ കോഴിക്കോട്ടുള്ള ഇന്ത്യൻ ഓയിൽ കോർപ്പറേഷന്റെ (ഐഒസി) റീജിയണൽ ഓഫീസിനെ സമീപിച്ചതോടെ പ്രശ്നത്തിന് പരിഹാരമായി. ഐഒസിയുടെ നിർദ്ദേശപ്രകാരം വ്യാഴാഴ്ച ആവശ്യമായ സിലിണ്ടറുകൾ എത്തിക്കുകയും ശ്മശാനത്തിന്റെ പ്രവർത്തനം പുനരാരംഭിക്കുകയും ചെയ്തു.

കടുമേനി ശ്മശാനം ബാലൽ, ഈസ്റ്റ് എളേരി, വെസ്റ്റ് എളേരി ഗ്രാമപഞ്ചായത്തുകളിലെയും ചെറുപുഴയിലെയും നിവാസികൾക്ക് ആശ്രയമാണെന്ന് ഈസ്റ്റ് എളേരി ഗ്രാമപഞ്ചായത്ത് വൈസ് പ്രസിഡന്റ് ജോസഫ് മുത്തോലി 'ദി ഹിന്ദു'വിനോട് പറഞ്ഞു. "മുസ്ലീം, ക്രിസ്ത്യൻ കുടുംബങ്ങൾ സാധാരണയായി മൃതദേഹങ്ങൾ അടക്കം ചെയ്യുകയും സമ്പന്ന ഹിന്ദു കുടുംബങ്ങൾ സ്വകാര്യ സ്ഥലങ്ങളിൽ ശവസംസ്കാരം നടത്തുകയും ചെയ്യുമ്പോൾ, പട്ടികവർഗ്ഗ, പട്ടികജാതി വിഭാഗക്കാരും സാമ്പത്തികമായി പിന്നോക്കം നിൽക്കുന്നവരും കൂടുതലും ആശ്രയിക്കുന്നത് പഞ്ചായത്ത് ശ്മശാനത്തെയാണ്," അദ്ദേഹം വ്യക്തമാക്കി.

കടുമേനിയിലെ ശ്മശാനം പൂർണ്ണമായും എൽപിജി ഉപയോഗിച്ചാണ് പ്രവർത്തിക്കുന്നത്. ഒരേ സമയം ആറ് സിലിണ്ടറുകൾ ഉപയോഗിക്കുന്നുണ്ട്, അതിൽ മൂന്നെണ്ണം വീതം ഓരോ ആഴ്ചയും റീഫിൽ ചെയ്യേണ്ടതുണ്ടെന്ന് മുത്തോലി വ്യക്തമാക്കി.