ബേബിയുടെ രാജി തീരുമാനം ഉടന്?
തിരുവനന്തപുരം: എംഎല്എ സ്ഥാനം രാജിവയ്ക്കാന് അനുവദിയ്ക്കണമെന്ന സിപിഎം പൊളിറ്റ് ബ്യൂറോ അംഗം എംഎ ബേബിയുടെ ആവശ്യത്തിന്മേല് പാര്ട്ടിയുടെ തീരുമാനം ഉടന് ഉണ്ടാകാന് സാധ്യത. ജൂണ് 21 മുതല് ചേരുന്ന സംസ്ഥാന സെക്രട്ടറിയേറ്റ്-സംസ്ഥാന സമിതി യോഗങ്ങളില് ഇത് സംബന്ധിച്ച് തീരുമാനം ഉണ്ടാകും. പൊളിറ്റ് ബ്യൂറോ യോഗത്തിലും ബേബി രാജിസന്നദ്ധത അരിയിക്കുകയും നിലപാടില് ഉറച്ച് നില്ക്കുകയും ചെയ്തതോടെയാണ് ഇക്കാര്യം വീണ്ടും പരിശോധിയ്ക്കാന് സംസ്ഥാന നേതൃത്വത്തോട് പൊളിറ്റ് ബ്യൂറോ നിര്ദ്ദേശിയ്ക്കുകയായിരുന്നു.
സംസ്ഥാന സെക്രട്ടറിയേറ്റും സംസ്ഥാന സമിതിയും വീണ്ടും വിഷയം പരിഗണിച്ചശേഷമാകും അന്തിമ തീരുമാനം എടുക്കുക. ബേബി പൊളിറ്റ് ബ്യൂറോ അംഗമായതിനാല് സംഘടന രീതിയനുസരിച്ച് തീരുമാനം കേന്ദ്രക്കമ്മിറ്റിയിലാകും കൈക്കൊള്ളുക.
ലോക്സഭ തിരഞ്ഞെടുപ്പില് കൊല്ലം മണ്ഡലത്തില് ഏറ്റ പരാജയവും സ്വന്തം നിയോജക മണ്ഡലമായ കുണ്ടറയില് വോട്ട് കുറഞ്ഞതുമാണ് എംഎ ബേബിയെ രാജിയ്ക്ക് പ്രേരിപ്പിച്ചത്. ഈ സാഹചര്യത്തില് എംഎല്എ ആയി തുടരുന്നത് ധാര്മികല്ലെന്ന് കണ്ടാണ് പാര്ട്ടിയ്ക്കുള്ളില് ബേബി രാജി സന്നദ്ധത അറിയിച്ചത്.