കാല്‍വഴുതി വീണ പാപ്പാന് മേല്‍ ആന കിടന്നു; കോട്ടയത്ത് പാപ്പാന് ദാരുണാന്ത്യം - വീഡിയോ

കോട്ടയം: ആന കിടക്കാന‍് ശ്രമിക്കുന്നതിനിടെ കാല്‍വഴുതി ആനയ്ക്ക് അടിയില്‍പ്പെട്ട് പാപ്പാന്‍ മരിച്ചു. ഭാരത് വിശ്വാനാഥന്‍ എന്ന ആനയുടെ പാപ്പാന്‍ ചെന്നിത്തല സ്വദേശി അരുണ്‍ പണിക്കരാണ് മരിച്ചത്. രാവിലെ ഒന്‍പതര മണിയോടെ കോട്ടയം കാരാപ്പുഴ മാളികപീടികയിലാണ് സംഭവം.

വിവിധ ക്ഷേത്രങ്ങളിലെ എഴുന്നള്ളിപ്പിന് ശേഷം മാളികപീടികയില്‍ എത്തിച്ച ആനയെ കുളിപ്പിക്കുകയായിരുന്നു ഒന്നാം പാപ്പാനായ അരുണ്‍. കുളിപ്പിക്കുന്നതിനിടെ ആനയോട് അരുണ്‍ കിടക്കാന്‍ ആവശ്യപ്പെട്ടു.

നിര്‍ദ്ദേശം നല്‍കികൊണ്ടിരിക്കെ അരുണ്‍ കിടക്കാന്‍ ശ്രമിക്കുന്ന ആനയുടെ അടിയിലേക്ക് വീഴുകയായിരുന്നു. അരുണിന്‍റെ ശരീരം പൂര്‍ണ്ണമായും ആനയുടെ ശരീരത്തിനുള്ളില്‍ അകപ്പെട്ടുപോയി. അരുണിന്‍റെ നിലവിളി കേട്ട് രണ്ടാം പാപ്പാന്‍ ഓടിയെത്തി ആനയെ എഴുന്നേല്‍പ്പിച്ചെങ്കിലും അരുണ്‍ സംഭവ സ്ഥലത്തു തന്നെ മരിച്ചു.

ഒരു വര്‍ഷം മുമ്പാണ് ആലപ്പുഴ ചെന്നിത്തല സ്വദേശിയായ അരുൺ പണിക്കര്‍ 22 വയസ്സുള്ള ഭാരത് വിശ്വനാഥന്‍റെ പാപ്പാനായി ചുമതല ഏറ്റെടുത്തത്. പാപ്പാന്‍റെ മൃതദേഹം കോട്ടയം മെഡിക്കൽ കോളേജ് ആശുപത്രിയിലേക്ക് മറ്റി. പോസ്റ്റ്മോര്‍ട്ടത്തിന് ശേഷം ബന്ധുക്കൾക്ക് വിട്ട് നൽകും. അസ്വാഭാവിക മരണത്തിന് പൊലീസ് കേസെടുത്തിട്ടുണ്ട്.

English summary

mahout traps under the elephant