മലാല 17കാരിയല്ല 37കാരി!
തിരുവനന്തപുരം: കേരളത്തിലെ വിദ്യാഭ്യാസ മന്ത്രിയും പൊതുവിദ്യാഭ്യാസ വകുപ്പും അങ്ങനെയാണ്. എങ്ങനെയെന്നല്ലേ...വിവാദങ്ങള് ഇല്ലാതെ വകുപ്പിന് മുന്നോട്ട് പോകാനാകില്ല. എസ്എസ്എല്സി ചോദ്യപേപ്പറില് മതചിഹ്നമായിരുന്നെങ്കില് ആറാം ക്ളാസിലെ വാര്ഷിക പരീക്ഷയുടെ ചോദ്യപേപ്പറില് വന് മണ്ടത്തരങ്ങളാണ് വകുപ്പ് അച്ചടിച്ച് വിട്ടിരിയ്ക്കുന്നത്.
സര്വ ശിക്ഷ അഭിയാന് ആറാം ക്ളാസിലെ വാര്ഷിക പരീക്ഷയുടെ ചോദ്യപേപ്പറിലാണ് തെറ്റുകള് കടന്ന് കൂടിയത്. അഭിമുഖം തയ്യാറാക്കാനുള്ള ചോദ്യത്തിലാണ് ഒന്നിന് പിറകേ ഒന്നായി തെറ്റുകള് ഉള്ളത്. മലാലയെക്കുറിച്ചുള്ള രണ്ട് ഖണ്ഡികയാണ് ചോദ്യമായി നല്കിയത്. ഈ ഖണ്ഡിക വായിച്ച ശേഷം മലാലയെ അഭിമുഖം ചെയ്യാനുളള ചോദ്യാവലി തയ്യാറാക്കണം.
ഇനി ഖണ്ഡികയില് പറയുന്നതെന്താണെന്നോ. 1977 ജൂലൈ 12 നാണ് മലാല ജനിച്ചത്. അപ്പോള് പൊതുവിദ്യാഭ്യാസ വകുപ്പ് പറയുന്നത് വച്ച് നോക്കിയാല് മലാലയ്ക്ക് ഇപ്പോള് 37 വയസായി. 17കാരിയെ 37കാരിയാക്കിയത് ആദ്യത്തെ തെറ്റ്. ഇനി ഐക്യരാഷ്ട്ര സഭയുടെ ആഹ്വാനത്തെ ആഹ്വാദം എന്നാണ് നല്കിയിരിയ്ക്കുന്നത്. യുഎന്നിന്റെ പ്രചാരണ പരിപാടിയായ ഞാന് മലാലയെ ഞാനും മലാല എന്നാക്കിയും മാറ്റിയിട്ടുണ്ട്. ഇനി ഈ കുറിപ്പ് വായിച്ച് അഭിമുഖം എഴുതിയാലോ കുട്ടികള്ക്ക് നാല് മാര്ക്കും ലഭിയ്ക്കും.