കാനഡയ്ക്ക് 35 ശതമാനം താരിഫ് ചുമത്തുമെന്ന് ട്രംപ്; യുകെ വിമാനം നാട്ടിലേക്ക്: അമിത് ഷാ ഇന്ന് കേരളത്തില്‍

അമേരിക്കയിലേക്കുള്ള കയറ്റുമതിക്ക് ഓഗസ്റ്റ് ഒന്നു മുതല്‍ കാനഡ 35 ശതമാനം താരിഫ് നേരിടേണ്ടി വരുമെന്ന പ്രസിഡന്റ് ഡൊണാള്‍ഡ് ട്രംപിന്റെ മുന്നറിയിപ്പാണ് ഇന്നത്തെ പ്രധാന വാര്‍ത്ത. കാനഡ പ്രധാനമന്ത്രി മാര്‍ക്ക് കാര്‍ണിക്ക് അയച്ച കത്തില്‍ ട്രംപ് ഇക്കാര്യം അറിയിച്ചത്. താരിഫുമായി ബന്ധപ്പെട്ട ചര്‍ച്ചകള്‍ നടക്കുന്നതിനിടെയാണ് ട്രംപിന്റെ ഏകപക്ഷീയമായ തീരുമാനം.

കേളത്തിലേക്കു വന്നാല്‍, രാജ്യാന്തര വിമാനത്താവളത്തില്‍ സാങ്കേതിക തകരാര്‍ മൂലം നിര്‍ത്തിയിട്ടിരുന്ന ബ്രിട്ടീഷ് എഫ്-35ബി യുദ്ധവിമാനം അടുത്ത ആഴ്ച ആദ്യം തന്നെ യുകെയില്‍ തിരിച്ചെത്തിച്ചേക്കുമെന്നാണ് റിപ്പോര്‍ട്ടുകള്‍. അസോസിയേറ്റഡ് പ്രസാണ് ഇന്ത്യന്‍ ഉദ്യോഗസ്ഥരെ ഉദ്ധരിച്ച് ഇക്കാര്യം റിപ്പോര്‍ട്ട് ചെയ്തത്. അറബിക്കടലിനു മുകളിലൂടെയുള്ള പതിവ് പറക്കലിനിടെ മോശം കാലാവസ്ഥ കാരണമാണ് എഫ് 35ബി യുദ്ധവിമാനം ജൂണ്‍ 14ന് തിരുവനന്തപുരം വിമാനത്താവളത്തില്‍ ഇറക്കിയത്.

കേന്ദ്ര ആഭ്യന്തര മന്ത്രി അമിത് ഷാ ഇന്ന് രാത്രി പത്തിന് തിരുവനന്തപുരത്ത് എത്തും. ബിജെപി സംസ്ഥാന അധ്യക്ഷന്‍ രാജീവ് ചന്ദ്രശേഖറിന്റെ നേതൃത്വത്തില്‍ സ്വീകരിക്കും. രണ്ട് പരിപാടികളിലാണ് കേന്ദ്ര ആഭ്യന്തര മന്ത്രി തിരുവനന്തപുരത്ത് പങ്കെടുക്കുന്നത്. ബിജെപി സംസ്ഥാന ഓഫീസ് ഉദ്ഘാടനത്തിന് ശേഷം പുത്തരിക്കണ്ടം മൈതാനത്ത് നടക്കുന്ന വാര്‍ഡുതല നേതൃസംഗമവും ഉദ്ഘാടനം ചെയ്യും.