വിമാന ദുരന്തം; പ്രാഥമിക റിപ്പോര്ട്ട് പുറത്ത്: എന്ജിന് ഫ്യൂവല് സ്വിച്ചുകള് ഒരേസമയം പ്രവര്ത്തനം നിലച്ചു
രാജ്യം ഉറ്റുനോക്കിയ എയര് ഇന്ത്യ വിമാന ദുരന്തത്തിന്റെ പ്രാഥമിക റിപ്പോര്ട്ട് പുറത്ത്. എയര്ക്രാഫ്റ്റ് ആക്സിഡന്റ് ഇന്വെസ്റ്റിഗേഷന് ബ്യൂറോ കേന്ദ്രസര്ക്കാരിന് സമര്പ്പിച്ച റിപ്പോര്ട്ടാണ് പുറത്തുവിട്ടത്. ടേക്ക് ഓഫിനിടെ രണ്ട് എന്ജിന് ഫ്യൂഷല് സ്വിച്ചുകളും പ്രവര്ത്തനരഹതമായതായി റിപ്പോര്ട്ടില് പറയുന്നു. ഇക്കാര്യം പൈലറ്റുമാര് തമ്മില് സംസാരിക്കുന്നതിന്റെ കോക്ക്പിറ്റ് വോയ്സ് റെക്കോര്ഡിംഗുകളുടെ വിശദാംശങ്ങളും റിപ്പോര്ട്ടിലുണ്ട്.
അഞ്ചു വര്ഷത്തിനിടെ ഇതാദ്യമായി ഇന്ത്യന് വിദേശകാര്യമന്ത്രി ചൈനയില് സന്ദര്ശനത്തിന് എത്തുന്നതാണ് ഇന്നത്തെ ഏറ്റവും പ്രധാനപ്പെട്ട വാര്ത്ത.
ഉഭയകക്ഷി ചര്ച്ചകള്ക്കായാണ് ഇന്ത്യന് വിദേശകാര്യ മന്ത്രി എസ്. ജയശങ്കര് ചൈനയില് എത്തുന്നത്. ചൈനീസ് വിദേശകാര്യ മന്ത്രി വാങ് യിയുമായി ബീജിങില് വച്ച് നടക്കുന്ന ഉഭയകക്ഷി യോഗത്തിനാണ് എസ് ജയശങ്കര് പോകുന്നത്. തുടര്ന്ന് ടിയാന്ജിനില് നടക്കുന്ന ഷാങ്ഹായ് കോപ്പറേഷന് ഓര്ഗനൈസേഷന്റെ (എസ്സിഒ) വിദേശകാര്യ മന്ത്രിമാരുടെ യോഗത്തിലും ജയശങ്കര് പങ്കെടുക്കും.
കേരളത്തിൽ വീണ്ടും നിപ ബാധിച്ച് മരണം
സംസ്ഥാനത്ത് വീണ്ടും നിപ മരണം. പാലക്കാട് മണ്ണാർക്കാട് കുമരംപുത്തൂർ സ്വദേശിയായ 58 വയസുകാരനാണ് നിപ ബാധിച്ച് മരിച്ചത്. പെരിന്തൽമണ്ണയിലെ ഒരു സ്വകാര്യ ആശുപത്രിയിൽ ചികിത്സയിലിരിക്കെ ഇന്ന് വൈകുന്നേരം 5 മണിയോടെയാണ് മരണം സ്ഥിരീകരിച്ചത്. മഞ്ചേരി മെഡിക്കൽ കോളേജിൽ നടത്തിയ പ്രാഥമിക പരിശോധനയിലാണ് അദ്ദേഹത്തിന് നിപ സ്ഥിരീകരിച്ചത്.
മണ്ണാർക്കാട് സിപിഎം ഓഫിസിന് നേരെ പടക്കമെറിഞ്ഞ കേസിൽ ഒരാളെ പോലീസ് കസ്റ്റഡിയിൽ എടുത്തു. പുല്ലശ്ശേരി സ്വദേശി അഷറഫിനെയാണ് മണ്ണാർക്കാട് പോലീസ് കസ്റ്റഡിയിൽ എടുത്തത്. ഇയാൾ സിപിഎം പ്രവർത്തകനാണ്. പികെ ശശിയുടെ ഡ്രൈവറായി പ്രവർത്തിച്ചിരുന്നുവെന്നും ആക്രമി വന്നത് മണ്ണാർക്കാട് ഏരിയ സെക്രട്ടറിയെ ആക്രമിക്കാനെന്നാണ് നേതാക്കൾ ആരോപിക്കുന്നത്.
കണ്ണൂർ വളപട്ടണത്ത് റെയിൽവേ ട്രാക്കിൽ വീണ്ടും കല്ല്. വളപട്ടണം കണ്ണപുരം റെയിൽവേ സ്റ്റേഷനുകൾക്കിടയിലാണ് കല്ലുകൾ കണ്ടെത്തിയിരിക്കുന്നത്. വന്ദേഭാരത് എക്സ്പ്രസ് കടന്നുപോകും മുമ്പാണ് ട്രാക്കിൽ കല്ല് കണ്ടെത്തിയത്. സംഭവുമായി ബന്ധമുണ്ടെന്ന സംശയത്തെ തുടർന്ന് പ്രായപൂർത്തിയാകാത്ത 2 പേരെ പോലീസ് കസ്റ്റഡിയിൽ എടുത്തിട്ടുണ്ട്.
സംസ്ഥാനത്തെ മഴ മുന്നറിയിപ്പിൽ മാറ്റം.
സംസ്ഥാനത്തെ മഴ മുന്നറിയിപ്പിൽ മാറ്റം. അടുത്ത 3 മണിക്കൂറിൽ കേരളത്തിലെ 2 ജില്ലകളിൽ അതിശക്ത മഴക്ക് സാധ്യതയെന്ന് കാലാവസ്ഥ വകുപ്പിന്റെ മുന്നറിയിപ്പ്. കൊല്ലം, ആലപ്പുഴ ജില്ലകളിൽ വരും മണിക്കൂറുകളിൽ ഓറഞ്ച് അലർട്ട് പ്രഖ്യാപിച്ചിട്ടുണ്ട്. ഇതിനൊപ്പം തന്നെ കേരളത്തിലെ 11 ജില്ലകളിൽ ഇന്ന് രാത്രി യെല്ലോ അലർട്ടും പുറപ്പെടുവിച്ചു.
അനർട്ട് വഴി വൈദ്യുത വകുപ്പ് നടത്തുന്ന അഴിമതികൾ ശരാശരി മലയാളിയെ ഞെട്ടിക്കുന്നതാണെന്ന് മുൻ പ്രതിപക്ഷ നേതാവും മുതിർന്ന കോൺഗ്രസ് നേതാവുമായ രമേശ് ചെന്നത്തല. പിഎം കുസും പദ്ധതി ഒരു ഐസ് ബർഗിന്റെ മുകൾഭാഗം മാത്രമാണെന്നും അതി വ്യാപകമായ അഴിമതി അതിന് താഴേക്ക് പരന്ന് കാൻസർ പോലെ വ്യാപിച്ചു കിടക്കുന്നുവെന്നും രമേശ് ചെന്നിത്തല വ്യക്തമാക്കി.
കോട്ടയം വഴിക്കടവിലെ ചാർജിങ് സ്റ്റേഷനിലേക്ക് കാറിടിച്ചുകയറി നാലു വയസുകാരന് ദാരുണാന്ത്യം. തിരുവനന്തപുരം നേമം സ്വദേശികളുടെ മകനായ ആര്യ മോഹനാണ് പാലാ മാർ സ്ലീവ ആശുപത്രിയിൽ ചികിത്സയിലിരിക്കെ മരണത്തിന് കീഴടങ്ങിയത്. ചാർജ് ചെയ്യാൻ കാർ നിർത്തിയിട്ട് ഇരിക്കുകയായിരുന്ന അമ്മയുടേയും കുഞ്ഞിന്റേയും ദേഹത്തേക്ക് മറ്റൊരു കാർ വന്ന് ഇടിച്ചു കയറുകയായിരുന്നു. ഇവരെ ആശുപത്രിയിൽ എത്തിച്ചെങ്കിലും കുഞ്ഞിനെ രക്ഷിക്കാൻ കഴിഞ്ഞില്ല.
യെമനിൽ വധശിക്ഷയ്ക്ക് വിധിക്കപ്പെട്ട മലയാളി നഴ്സ് നിമിഷ പ്രിയയുടെ മോചനത്തിനായി കേന്ദ്ര സർക്കാർ സുപ്രീം കോടതിയിൽ വക്കാലത്ത് ഫയൽ ചെയ്തു. തിങ്കളാഴ്ച ഹർജി പരിഗണിക്കുമ്പോൾ കേന്ദ്ര സർക്കാർ അഭിഭാഷകൻ സുപ്രീം കോടതിയിൽ ഹാജരാകുമെന്നാണ് അറിയിച്ചിരിക്കുന്നത്. നിമിഷ പ്രിയയുടെ വധശിക്ഷ നിർത്തിവെയ്പ്പിക്കാൻ സജീവ ശ്രമം ഇപ്പോഴും തുടരുന്നുണ്ട്.
നിപ സമ്പർക്കപ്പട്ടികയിൽ ആകെ 497 പേർ; മന്ത്രി വീണ ജോർജ്
സംസ്ഥാനത്ത് നിപ സമ്പര്ക്കപ്പട്ടികയില് ആകെ 497 പേര് ഉണ്ടെന്ന് വ്യക്തമാക്കി ആരോഗ്യ വകുപ്പ് മന്ത്രി വീണ ജോര്ജ്. മലപ്പുറം ജില്ലയില് 203 പേരും കോഴിക്കോട് 114 പേരും പാലക്കാട് 178 പേരും എറണാകുളത്ത് 2 പേരുമാണ് നിലവിലെ സമ്പര്ക്കപ്പട്ടികയിലുള്ളത്. മലപ്പുറത്ത് 10 പേരാണ് ചികിത്സയിലുള്ളത്. ഒരാള് ഐസിയു ചികിത്സയിലുണ്ടെന്നും മന്ത്രി അറിയിച്ചു. സംസ്ഥാനത്ത് ആകെ 14 പേര് ഹൈയസ്റ്റ് റിസ്കിലും 82 പേര് ഹൈ റിസ്ക് വിഭാഗത്തിലും നിരീക്ഷണത്തിലാണെന്നും മന്ത്രി അറിയിച്ചു.
ഡ്രൈവറുമായി അവിഹിത ബന്ധമുണ്ടെന്ന ആരോപണത്തിൽ കെഎസ്ആർടിസയിലെ വനിതാ കണ്ടക്ടറെ സസ്പെൻഡ് ചെയ്ത സംഭവത്തിൽ ഇടപെട്ട് ഗതാഗതമന്ത്രി കെബി ഗണേഷ് കുമാർ. മന്ത്രി കെഎസ്ആർടിസി വിജിലൻസ് വിഭാഗത്തിന് നിർദ്ദേശം നൽകിയതിന് പിന്നാലെ സസ്പെൻഷൻ ഉത്തരവ് പിൻവലിച്ചു. വിജിലൻസ് വിഭാഗം എക്സിക്യൂട്ടീവ് ഡയറക്ടറാണ് വിവാദ നടപടി പിൻവലിച്ച് ഉത്തരവിറക്കിയത്.
വീണ്ടും മഴ വരുന്നു; രണ്ട് ജില്ലകളിൽ ഓറഞ്ച് അലർട്ട്
സംസ്ഥാനത്ത് ജൂലൈ 16 വരെ വിവിധ ജില്ലകളിൽ ഒറ്റപ്പെട്ടയിടങ്ങളിൽ അതിശക്തമായ മഴയ്ക്കുള്ള സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ്. ഇന്ന് മുതൽ ജൂലൈ 16 വരെ മണിക്കൂറിൽ 40 മുതൽ 50 കിലോമീറ്റർ വരെ വേഗതയിൽ ശക്തമായ കാറ്റിനും സാധ്യതയുണ്ടെന്ന് പ്രവചനത്തിൽ പറയുന്നു. പതിനാറാം തീയതി കണ്ണൂർ, കാസർഗോഡ് ജില്ലകളിൽ ഓറഞ്ച് അലർട്ടാണ്. ഇന്ന് ഏഴിടത്ത് യെല്ലോ അലർട്ടും നിലവിലുണ്ട്.
ഡൽഹിയിൽ നാല് നില കെട്ടിടം തകർന്നുവീണുണ്ടായ അപകടത്തിൽ രണ്ട് മരണം. ഒരു സ്ത്രീയുടെയും പുരുഷന്റെയും മൃതദേഹങ്ങൾ കെട്ടിടാവശിഷ്ടത്തിനടിയിൽ നിന്നും കണ്ടെടുത്തിട്ടുണ്ട്. മൃതദേഹങ്ങൾ ജിടിബി ആശുപത്രിയിലേക്ക് മാറ്റിയിട്ടുണ്ട്. വടക്കുകിഴക്കൻ ഡൽഹിയിൽ ഇന്ന് രാവിലെ 7 മണിയോടെയായിരുന്നു അപകടം.
മംഗളൂരുവില് വിഷവാതക ചോര്ച്ച; മലയാളി ഉള്പ്പെടെ രണ്ടു മരണം
മംഗളൂരു റിഫൈനറി ആന്ഡ് പെട്രോകെമിക്കല് ലിമിറ്റഡിലുണ്ടായ വിഷവാതക ചോര്ച്ചയില് മലയാളി ഉള്പ്പെടെ രണ്ടു മരണം. ഇവിടുത്തെ തൊഴിലാളികളായ കോഴിക്കോട് കക്കോടി സ്വദേശി ബിജില് പ്രസാദ്, പ്രയാഗ്രാജ് സ്വദേശി ദീപ് ചന്ദ്ര എന്നിവരാണ് മരിച്ചത്. ഇന്ന് രാവിലെയായിരുന്നു അപകടം. ഇരുവരെയും സംഭരണ പ്ലാന്റിലെ ടാങ്ക് പ്ലാറ്റ്ഫോമിനു മുകളില് ബോധരഹിതരായി കണ്ടെത്തുകയായിരുന്നു.
കേരളത്തില് ബിജെപി അധികാരത്തില് എത്തും: അമിത് ഷാ
കേരളത്തില് ബിജെപി അധികാരത്തില് വരുമെന്ന് കേന്ദ്ര ആഭ്യന്തരമന്ത്രി അമിത്ഷാ. തിരുവനന്തപുരത്ത് ബിജെപി നേതൃസംഗമം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. 2026ലെ നിയമസഭാ തിരഞ്ഞെടുപ്പില് ബിജെപിയുടെ നേതൃത്വത്തിലുള്ള സര്ക്കാര് കേരളത്തില് അധികാരത്തിലെത്തുമെന്നും അമിത്ഷാ അവകാശപ്പെട്ടു. എല്ഡിഎഫിനും യുഡിഎഫിനും അഴിമതിയുടെ ചരിത്രമാണുള്ളത്. ബിജെപി ഇല്ലാതെ കേരളത്തില് വികസിത കേരളം സാധ്യമാകില്ലെന്നും അദ്ദേഹം പറഞ്ഞു.
കാര് പൊട്ടിത്തെറിച്ച് പൊള്ളലേറ്റ പിഞ്ചു സഹോദരങ്ങള് മരിച്ചു
പാലക്കാട് കാര് പൊട്ടിത്തെറിച്ച് പൊള്ളലേറ്റ് അതീവ ഗുരുതരാവസ്ഥയില് ചികിത്സയിലായിരുന്ന പിഞ്ചു സഹോദരങ്ങള് മരിച്ചു. ആല്ഫിന് (ആറ്), എമിലീന മറിയം (നാല്) എന്നീ കുഞ്ഞുങ്ങളാണ് മരിച്ചത്. അതീവ ഗുരുതരാവസ്ഥയില് കൊച്ചിയിലെ ആശുപത്രിയില് ചികിത്സയില് കഴിയുകയായിരുന്നു കുട്ടികള്. ആന്തരികാവയവങ്ങളെ അടക്കം പൊള്ളല് ബാധിച്ചു. മാതാവും സ്വകാര്യ ആശുപത്രിയിലെ നഴ്സുമായ എല്സി മാര്ട്ടിനും ഗുരുതരമായി പൊള്ളലേറ്റ് ചികിത്സയിലാണ്.
നിഗമനങ്ങളിലേക്ക് എടുത്ത് ചാടരുതെന്ന് വ്യോമയാന മന്ത്രി
എയര് ഇന്ത്യ വിമാന ദുരന്തത്തില് പ്രാഥമിക അന്വേഷണ റിപ്പോര്ട്ട് പുറത്തു വന്നതിനു പിന്നാലെ പ്രതികരണവുമായി വ്യോമയാന മന്ത്രി റാം മോഹന് നായിഡു. ഒരു നിഗമനത്തിലേക്കും എടുത്ത് ചാടരുതെന്നും അന്തിമ റിപ്പോര്ട്ടിനായി കാത്തിരിക്കണമെന്നും അദ്ദേഹം ആവശ്യപ്പെട്ടു. ലോകത്തിലെ ഏറ്റവും മികച്ച പൈലറ്റുകളും വിമാന ക്രൂവുമാണ് രാജ്യത്തുള്ളത്. വ്യോമയാന മേഖലയിലെ നട്ടെല്ല് അവരാണ്. അതിനാല് അന്വേഷണത്തിന്റെ തുടക്കത്തില് നിഗമനങ്ങളില് എത്തേണ്ടതില്ലെന്നും വ്യോമയാന മന്ത്രി നിര്ദേശിച്ചു.
ഡിസിസി പ്രസിഡന്റ് എന്ഡി അപ്പച്ചന് കോണ്ഗ്രസ് പ്രവര്ത്തകരുടെ മര്ദനം
വയനാട് ഡിസിസി പ്രസിഡന്റ് എന്ഡി അപ്പച്ചന് കോണ്ഗ്രസ് പ്രവര്ത്തകരുടെ മര്ദനം. പുല്പ്പള്ളി മുള്ളന്കൊല്ലിയില് വെച്ചാണ് മര്ദനമേറ്റത്. പാര്ട്ടി പരിപാടിക്കിടെ ഒരു വിഭാഗം കോണ്ഗ്രസ് പ്രവര്ത്തകരാണ് ഡിസിസി പ്രസിഡന്റിനെ കയ്യേറ്റം ചെയ്തത്. കയ്യേറ്റത്തിനിടെ ഡിസിസി പ്രസിഡന്റ് നിലത്ത് വീണു. മണ്ഡലം പ്രസിഡന്റ് സ്ഥാനത്തെ ചൊല്ലി തര്ക്കം നിലനില്ക്കുന്നുണ്ട്.
ഡല്ഹിയില് നാലുനില കെട്ടിടം തകര്ന്നു; രക്ഷാപ്രവര്ത്തനം പുരോഗമിക്കുന്നു
ഡല്ഹിയില് നാലുനില കെട്ടിടം തകര്ന്നു വീണു. നിരവധി പേര് കുടുങ്ങിക്കിടക്കുന്നതായി ആശങ്കയുണ്ട്. സീലംപൂരിലാണ് കെട്ടിടം തകര്ന്നു വീണ് വലിയ അപകടം ഉണ്ടായത്. സംഭവ സ്ഥലത്ത് രക്ഷാപ്രവര്ത്തനം പുരോഗമിക്കുകയാണ്. കെട്ടിടത്തിന്റെ അവശിഷ്ടങ്ങള് നീക്കി തിരച്ചില് നടത്തുന്ന ദൃശ്യങ്ങള് പുറത്തുവന്നു. ഇന്ന് രാവിലെയാണ് സംഭവം ഉണ്ടായത്.
അനുമതിയില്ലാതെ പാട്ടുപയോഗിച്ചു; ഇളയരാജ കോടതിയില്
വനിതാ വിജയകുമാര് സംവിധാനം ചെയ്ത 'മിസിസ് ആന്ഡ് മിസ്റ്റര്' എന്ന തമിഴ് ചിത്രത്തില് തന്റെ ഗാനം അനുമതിയില്ലാതെ ഉപയോഗിച്ചെന്ന് ആരോപിച്ച് സംഗീത സംവിധായകന് ഇളയരാജ മദ്രാസ് ഹൈക്കോടതിയില് ഹര്ജി നല്കി. 1990-ല് പുറത്തിറങ്ങിയ 'മൈക്കിള് മദന കാമ രാജന്' എന്ന സിനിമയിലെ 'ശിവരാത്രി' എന്ന ഗാനം അനുമതിയില്ലാതെ ഉപയോഗിച്ചെന്നാണ് പരാതി. സിനിമയില് നിന്ന് പാട്ട് നീക്കം ചെയ്യണം എന്നാണ് ഇളയരാജയുടെ ആവശ്യം. അതേസമയം ഇളയരാജയെ നേരില് കണ്ട് ചിത്രത്തില് പാട്ട് ഉപയോഗിക്കുന്നത് അറിയിച്ചിരുന്നെന്നുവെന്നാണ് വനിത വിജയകുമാര് പറയുന്നത്.
'ജാനകി' വിവാദം; സെന്സര് ബോര്ഡിന്റെ അനുമതി ഇന്ന് ലഭിച്ചേക്കും
ജാനകി വേഴ്സസ് സ്റ്റേറ്റ് ഓഫ് കേരള എന്ന ചിത്രത്തിന്റെ പുതുക്കിയ പതിപ്പിന് ഇന്ന് സെന്സര് ബോര്ഡിന്റെ പ്രദര്ശനാനുമതി ലഭിച്ചേക്കും. കോടതിയില് വിചാരണ നടക്കുന്ന ഭാഗത്ത് അനുപമ അവതരിപ്പിക്കുന്ന കഥാപാത്രത്തെ പേരെടുത്ത് വിളിക്കുന്ന ഭാഗം മ്യൂട്ട് ചെയ്തിട്ടുണ്ട്. രണ്ടര മിനിറ്റിനിടെ ആറ് ഭാഗങ്ങളിലാണ് ഇത്തരത്തില് മ്യൂട്ട്. കൂടാതെ ജാനകി വി എന്ന് ചിത്രത്തിന്റെ സബ് ടൈറ്റിലും മാറ്റിയിട്ടുണ്ട്. ചിത്രം വൈകാതെ പ്രദര്ശനത്തിനെത്തിക്കാമെന്ന പ്രതീക്ഷയിലാണ് നിര്മാതാക്കള്.
പാലക്കാട് മാരുതി 800 പൊട്ടിത്തെറിച്ച് അപകടം; അമ്മയുടെയും മക്കളുടെയും നില ഗുരുതരം
പാലക്കാട് കാര് പൊട്ടിത്തെറിച്ചുണ്ടായ അപകടത്തില് പൊള്ളലേറ്റ യുവതിയുടെയും രണ്ടു മക്കളുടെയും നില ഗുരുതരം. യുവതിയും മക്കളും എറണാകുളത്തെ സ്വകാര്യ ആശുപത്രിയില് ചികിത്സയിലാണ്. മൂവര്ക്കും 90 ശതമാനത്തിലധികം പൊള്ളലേറ്റിട്ടുണ്ടെന്നാണ് ഡോക്ടര്മാര് പറയുന്നത്. മറ്റൊരു മകള്ക്കും അപകടത്തില് പരിക്കേറ്റിട്ടുണ്ട്. ഈ പെണ്കുട്ടിക്ക് 40 ശതമാനം പൊള്ളലേറ്റിട്ടുണ്ട്. മാരുതി 800 കാര് ആണ് പൊട്ടിത്തെറിച്ചത്. കാലപ്പഴക്കവും ഷോര്ട്ട് സര്ക്യൂട്ടും കാരണം തീപിടിച്ചതെന്നാണു പ്രാഥമിക നിഗമനം.
ഇടുക്കിയില് ഇന്ന് മൂന്നു പഞ്ചായത്തുകളില് ഹര്ത്താല്
ഇടുക്കിയില് യുഡിഎഫ് ആഹ്വാനം ചെയ്ത ഹര്ത്താല് ആരംഭിച്ചു. ഇന്ന് രാവിലെ ആറ് മണി മുതല് വൈകുന്നേരം ആറ് മണി വരെയാണ് ഹര്ത്താല്. മൂന്ന് പഞ്ചായത്തുകളിലാണ് ഹര്ത്താല്. അടിമാലി, വെളളത്തൂവല്, പളളിവാസല് പഞ്ചായത്തുകളില് യുഡിഎഫും അടിമാലി പഞ്ചായത്തില് എല്ഡിഎഫും ഹര്ത്താലിന് ആഹ്വാനം ചെയ്തിരുന്നു. ദേശീയപാത 85-ലെ നേര്യമംഗലം മുതല് വാളറ വരെയുളള നിര്മാണ പ്രവര്ത്തനങ്ങള് തടഞ്ഞ ഹൈക്കോടതി ഉത്തരവിനെതിരെ പ്രതിഷേധിച്ചാണ് ഹര്ത്താല്. ആദ്യ മണിക്കൂറുകളില് ഹര്ത്താല് ഭാഗികമാണ്.
അമിത്ഷാ കേരളത്തിലെത്തി
കേന്ദ്ര ആഭ്യന്തര മന്ത്രി അമിത്ഷാ കേരളത്തിലെത്തി. ഇന്നലെ രാത്രി തിരുവനന്തപുരത്ത് എത്തിയ അമിത്ഷായെ ബിജെപി സംസ്ഥാന അധ്യക്ഷന് രാജീവ് ചന്ദ്രശേഖറിന്റെ നേതൃത്വത്തില് സ്വീകരിച്ചു. ബിജെപി സംസ്ഥാന കമ്മിറ്റി ഓഫിസ് ഉദ്ഘാടനം അമിത്ഷാ ഇന്ന് നിര്വഹിക്കും. രാവിലെ 11 നാണ് ഓഫിസ് ഉദ്ഘാടനം. തുടര്ന്ന് 11.30ന് പുത്തരിക്കണ്ടം മൈതാനിയില് നടക്കുന്ന വാര്ഡുതല നേതൃസംഗമം ഉദ്ഘാടനം ചെയ്യും.
മഴ മുന്നറിയിപ്പ്: യെല്ലോ അലര്ട്ട് ഇന്ന് ഏഴ് ജില്ലകളില്
തൃശൂര്, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്, കാസര്കോട് ജില്ലകളില് ഇന്ന് യെല്ലോ അലര്ട്ട് പ്രഖ്യാപിച്ചു. തൃശൂര്, പാലക്കാട്, മലപ്പുറം, കോഴിക്കോട്, വയനാട്, കണ്ണൂര്, കാസര്കോട് ജില്ലകളില് നാളെയും എറണാകുളം, തൃശൂര്, മലപ്പുറം, കോഴിക്കോട്, വയനാട്, കണ്ണൂര്, കാസര്കോട് ജില്ലകളില് 14നും യെലോ അലര്ട്ട് തുടരും. മധ്യകേരളത്തിലും വടക്കന് കേരളത്തിലും അഞ്ച് ദിവസം മഴ ശക്തമായി തുടരും. കേരള, കര്ണാടക, ലക്ഷദ്വീപ് തീരങ്ങളില് ഇന്നു മത്സ്യബന്ധനത്തിന് നിയന്ത്രണമില്ല.
നിമിഷ പ്രിയയുടെ ശിക്ഷ ഒഴിവാക്കാന് ബോബി ചെമ്മണ്ണൂര് ഒരു കോടി നല്കും
യെമനില് വധശിക്ഷയ്ക്ക് വിധിക്കപ്പെട്ട നിമിഷ പ്രിയയുടെ രക്ഷാപ്രവര്ത്തന ഫണ്ടിലേക്ക് ബോച്ചെ ഫാന്സ് ചാരിറ്റിബിള് ട്രസ്റ്റ് വഴി ഒരു കോടി നല്കും. ബോബി ചെമ്മണ്ണൂരാണ് ഇക്കാര്യം അറിയിച്ചത്. അബുദാബിയിലെ സുഹൃത്ത് അബ്ദു റൗഫുമായി ചേര്ന്നുകൊണ്ടാണ് നിമിഷ പ്രിയയെ ഇവിടെയെത്തിക്കാനുള്ള ശ്രമം തുടരുന്നതെന്ന് അദ്ദേഹം പറഞ്ഞു. യെമനിലുള്ള ഗ്രാമത്തലവനുമായി ഇതുസംബന്ധിച്ച് സംസാരിച്ചിട്ടുണ്ട്. അവരില് വിശ്വസിച്ചാണ് ഒരു കോടി നല്കാമെന്ന് പറഞ്ഞത്.
Click it and Unblock the Notifications
Sign in with Google