നിമിഷ പ്രിയയുടെ വധശിക്ഷ നീട്ടിവച്ചു; സ്ഥിരീകരിച്ച് കേന്ദ്രസര്‍ക്കാര്‍; ശുഭാന്‍ഷു ഭൂമി തൊട്ടു

യെമനിൽ വധശിക്ഷയ്ക്ക് വിധിക്കപ്പെട്ട മലയാളി നഴ്സ് നിമിഷ പ്രിയയുടെ വധശിക്ഷ നടപ്പിലാക്കുന്നത് നീട്ടിവെച്ചു. നിമിഷ പ്രിയയുടെ മോചനത്തിനായി നടന്ന ചർച്ചകൾക്കൊടുവിൽ, യെമനിലെ മനുഷ്യാവകാശ പ്രവർത്തകൻ സാമുവൽ ജെറോയും കേന്ദ്രസർക്കാരും ഇത് സ്ഥിരീകരിച്ചു. യെമൻ പൗരന്റെ കൊലപാതകവുമായി ബന്ധപ്പെട്ട കേസിൽ വധശിക്ഷയ്ക്ക് വിധിക്കപ്പെട്ട് നിമിഷപ്രിയ ജയിലിൽ കഴിയുകയാണ്. വധശിക്ഷ നടപ്പിലാക്കാനിരുന്ന തീയതി നാളെയായിരുന്നു.

കാന്തപുരം എപി അബൂബക്കർ മുസ്ലിയാർ നടത്തിയ ഇടപെടലാണ് വധശിക്ഷ നീട്ടിവെക്കുന്നതില്‍ നിർണ്ണായകമായത്. അദ്ദേഹത്തിന്റെ നേതൃത്വത്തില്‍ ഇന്ന് മധ്യസ്ഥ ചർച്ചകള്‍ നടന്നു. കൊല്ലപ്പെട്ട തലാലിന്റെ കുടുംബവുമായി സൂഫി പണ്ഡിതർ നടത്തിയ മധ്യസ്ഥ ചർച്ചയിൽ കുടുംബം വഴങ്ങിയതായാണ് സൂചന.

അതേസമയം, അന്താരാഷ്ട്ര ബഹിരാകാശ നിലയത്തില്‍ നിന്ന് ശുഭാംശു ശുക്ല ഉള്‍പ്പെടെയുള്ള ആക്‌സിയം ദൗത്യസംഘം ഭൂമിയില്‍ മടങ്ങിയെത്തി. ഇന്നലെ വൈകീട്ടാണ് അന്താരാഷ്ട്ര ബഹിരാകാശ നിലയവുമായി വേര്‍പെടുത്തി മടക്കയാത്ര തുടങ്ങിയത്. ഇന്ന് വൈകീട്ട് 3.01-ന് ഡ്രാഗണ്‍ ക്രൂ മൊഡ്യൂള്‍ കാലിഫോര്‍ണിയ തീരത്ത് പസഫിക് സമുദ്രത്തില്‍ സുരക്ഷിതമായി ഇറങ്ങി. ശുഭാംശുവിന്റെ വരവിനെ ഏറെ പ്രതീക്ഷയോടെയാണ് ഇന്ത്യക്കാര്‍ കാത്തിരിക്കുന്നത്.