നിമിഷപ്രിയ: ചര്‍ച്ചകള്‍ ഇന്നും തുടരും; ഓറഞ്ച് അലര്‍ട്ട് ഈ ജില്ലകളില്‍; പുടിനോട് ഇടഞ്ഞ് ട്രംപ്

സംസ്ഥാനത്ത് ഇന്ന് എല്ലാ ജില്ലകളിലും മഴ മുന്നറിയിപ്പ് പുറപ്പെടുവിച്ചിട്ടുണ്ട്. വരുന്ന അഞ്ച് ദിവസം വ്യാപകമായ മഴയ്ക്ക് സാധ്യതയെന്നാണ് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്. ഇന്ന് എറണാകുളം, ഇടുക്കി, തൃശൂര്‍, കണ്ണൂര്‍, കാസര്‍ഗോഡ് ജില്ലകളില്‍ അതിശക്തമായ മഴയ്ക്കുള്ള ഓറഞ്ച് അലര്‍ട്ട് പ്രഖ്യാപിച്ചു. ബാക്കി ജില്ലകളായ തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, പാലക്കാട്, മലപ്പുറം, കോഴിക്കോട്, വയനാട് എന്നിവിടങ്ങളില്‍ യെല്ലോ അലര്‍ട്ടും നിലവിലുണ്ട്. മഴയോടൊപ്പം മണിക്കൂറില്‍ 40 മുതല്‍ 50 കിലോമീറ്റര്‍ വരെ വേഗതയില്‍ ശക്തമായ കാറ്റിനും സാധ്യതയുണ്ട്.

ഇന്നായിരുന്നു യെമനില്‍ ജയിലില്‍ കഴിയുന്ന നിമിഷപ്രിയയുടെ വധശിക്ഷ നടപ്പാക്കേണ്ടിയിരുന്നത്. എന്നാല്‍ കേരളം കാത്തിരുന്ന ആശ്വാസ വാര്‍ത്ത ഇന്നലെ എത്തി. വധശിക്ഷ നീട്ടിവച്ചു. ജയിലില്‍ കഴിയുന്ന നിമിഷപ്രിയയുടെ മോചനവുമായി ബന്ധപ്പെട്ട് ഇന്നും ചര്‍ച്ചകള്‍ തുടരുമെന്നാണ് പുറത്തുവരുന്ന വാര്‍ത്തകള്‍. ദയാധനം സ്വീകരിക്കുന്നതില്‍ അന്തിമ തീരുമാനത്തില്‍ എത്തുകയാണ് അടുത്ത ഘട്ടം. വിഷയത്തില്‍ ഇടപെട്ടെന്ന് ചൂണ്ടിക്കാട്ടി കൂടുതല്‍ പേര്‍ എത്തിയിട്ടുണ്ട്.