ഓപ്പറേഷന്‍ സിന്ദൂറില്‍ ലോക്‌സഭയില്‍ ചര്‍ച്ച; ഇന്ത്യയുടെ ശക്തി ലോകത്തെ അറിയിച്ചതായി രാജ്‌നാഥ് സിങ്

രാജ്യം ഉറ്റുനോക്കുന്ന പ്രധാനപ്പെട്ട വിഷയങ്ങളില്‍ പാര്‍ലമെന്റില്‍ ചര്‍ച്ച. പഹല്‍ഗാം ഭീകരാക്രമണം, ഓപ്പറേഷന്‍ സിന്ദൂര്‍ എന്നിവയിലാണ് ചര്‍ച്ച നടക്കുന്നത്. ഓപ്പറേഷന്‍ സിന്ദൂറിലൂടെ ഇന്ത്യന്‍ സായുധ സേന പാകിസ്ഥാനിലെയും പാക് അധീന കശ്മീരിലെയും ഒമ്പത് ഭീകര കേന്ദ്രങ്ങള്‍ ആക്രമിച്ച് 100 ലധികം ഭീകരരെ വധിച്ചത് എങ്ങനെയെന്ന് പ്രതിരോധ മന്ത്രി രാജ്‌നാഥ് സിങ് ലോക്‌സഭയില്‍ വിശദീകരിച്ചു.

സൈനിക നടപടി അവസാനിപ്പിക്കണമെന്ന് പാകിസ്ഥാന്‍ അഭ്യര്‍ത്ഥിച്ചു. ലക്ഷ്യം കണ്ടതോടെയാണ് ആക്രമണം അവസാനിപ്പിച്ചത്. ഇന്ത്യന്‍ സൈന്യത്തിന് ഒരു നഷ്ടവും ഉണ്ടായില്ലെന്നും രാജ്‌നാഥ് സിങ് പറഞ്ഞു.

കേന്ദ്ര സര്‍ക്കാരിനെതിരെ രൂക്ഷ വിമര്‍ശനം ഉന്നയിച്ച് കോണ്‍ഗ്രസ് നേതാവ് ഗൗരവ് ഗൊഗോയ് രംഗത്തുവന്നു. പഹല്‍ഗാം ഭീകരാക്രമണത്തെക്കുറിച്ച് പ്രതിരോധ മന്ത്രി ധാരാളം വിവരങ്ങള്‍ നല്‍കിയെങ്കിലും തീവ്രവാദികള്‍ എങ്ങനെ പഹല്‍ഗാമില്‍ എത്തി എന്നതിനെക്കുറിച്ച് വിശദാംശങ്ങളൊന്നും തന്നില്ലെന്ന് ഗൗരവ് ഗൊഗോയ് ആരോപിച്ചു. ചോദ്യങ്ങള്‍ ചോദിക്കേണ്ടത് പ്രതിപക്ഷത്തിന്റെ ഉത്തരവാദിത്തമാണെന്ന് ഗൊഗോയ് കൂട്ടിച്ചേര്‍ത്തു.

രാവിലെ ലോക്‌സഭാ നടപടിക്രമങ്ങള്‍ ആരംഭിച്ചതിനു പിന്നാലെ പ്രതിപക്ഷ ബഹളമുണ്ടായി. ഛത്തീസ്ഗഢില്‍ കന്യാസ്ത്രീകള്‍ അറസ്റ്റിലായ സംഭവത്തിലാണ് പ്രതിഷേധം. കേരളത്തിലെ എംപിമാരാണ് പ്രതിഷേധിക്കുന്നത്. രണ്ട് സഭകളിലും ഈ വിഷയം ഉന്നയിക്കാനുള്ള അടിയന്തര പ്രമേയത്തിന് നോട്ടീസ് നല്‍കിയിരുന്നു. അടിയന്തര പ്രമേയ നോട്ടീസുകള്‍ തള്ളി. ബഹളത്തെ തുടര്‍ന്ന് സഭകള്‍ 12 മണി വരെ നിര്‍ത്തിവച്ചു.

വര്‍ഷകാല സമ്മേളനത്തിന്റെ ആദ്യ ആഴ്ച പാര്‍ലമെന്റിന്റെ ഇരു സഭകളും പൂര്‍ണമായി തടസപ്പെട്ടതിനാല്‍ ചര്‍ച്ചകള്‍ നടന്നിരുന്നില്ല. പ്രധാനമന്ത്രി നരേന്ദ്ര മോദി സംസാരിക്കുമെന്ന റിപ്പോര്‍ട്ടുകളും പുറത്തുവരുന്നുണ്ട്.

അതേസമയം, സംസ്ഥാനത്ത് ഇന്ന് തെളിഞ്ഞ കാലാവസ്ഥയാണ്. മഴയുടെ ശക്തി കുറയുന്നുവെന്ന പ്രവചനങ്ങളും വരുന്നുണ്ട്. ഇന്ന് കോഴിക്കോട്, വയനാട്, കണ്ണൂര്‍, കാസര്‍കോട് ജില്ലകളിലാണ് യെല്ലോ അലേര്‍ട്ട്. കോട്ടയത്തും വയനാടും ദുരിതാശ്വാസ ക്യാമ്പുകള്‍ പ്രവര്‍ത്തിക്കുന്ന സ്‌കൂളുകള്‍ക്ക് ഇന്ന് അവധിയാണ്. വെള്ളക്കെട്ട് രൂക്ഷമായതിനാല്‍ കുട്ടനാട് താലൂക്കിലെ വിദ്യാഭ്യാസ സ്ഥാപനങ്ങള്‍ക്കും ഇന്ന് അവധി പ്രഖ്യാപിച്ചിട്ടുണ്ട്.

പത്തനംതിട്ട ആറന്മുളയില്‍ പാടശേഖരത്തിലെ വെള്ളത്തില്‍ മീന്‍ പിടിക്കാനിറങ്ങവേ വള്ളം മറിഞ്ഞ് 3 യുവാക്കള്‍ മരിച്ചതാണ് ഇന്നത്തെ ഏറ്റവും ദുഖകരമായ വാര്‍ത്ത. രാഹുല്‍, മിഥുന്‍, ദേവ് ശങ്കര്‍ എന്നിവരാണ് മരിച്ചത്.