മെഡിക്കല്‍ കോളേജ് കെട്ടിടം തകര്‍ന്ന് വീണതില്‍ പ്രതിഷേധം ശക്തം; കേരളത്തില്‍ വീണ്ടും നിപ?

കോട്ടയത്ത് മെഡിക്കല്‍ കോളേജ് കെട്ടിടം തകര്‍ന്ന് വീണതില്‍ പ്രതിഷേധം ശക്തമാകുന്നു. ആരോഗ്യമന്ത്രി വീണ ജോര്‍ജ് രാജി വെക്കണം എന്നാവശ്യപ്പെട്ട് പ്രതിപക്ഷ സംഘടനകള്‍ ഒന്നടങ്കം രംഗത്തെത്തി. ആരും കുടുങ്ങി കിടക്കുന്നില്ല എന്ന മന്ത്രിമാരുടെ പ്രസ്താവന രക്ഷാദൗത്യം വൈകിപ്പിച്ചു എന്നാണ് ആരോപണം. അപകടത്തില്‍ രോഗിയുടെ കൂട്ടിരിപ്പുകാരിയായി എത്തിയ തലയോലപറമ്പ് സ്വദേശി ബിന്ദു മരിച്ചിരുന്നു. അതിനിടെ മുഖ്യമന്ത്രി പിണറായി വിജയന്‍ കോട്ടയം മെഡിക്കല്‍ കോളേജ് സന്ദര്‍ശിച്ചു.

അതേസമയം കേരളത്തില്‍ വീണ്ടും നിപ ബാധയെന്ന് സംശയം. രോഗലക്ഷണങ്ങളോടെ 38 കാരിയെ പെരിന്തല്‍മണ്ണയിലെ സ്വകാര്യ ആശുപത്രിയില്‍ പ്രവേശിപ്പിച്ചിരിക്കുകയാണ്. പ്രാഥമിക പരിശോധനയില്‍ വൈറസ് ബാധ സ്ഥിരീകരിച്ചിട്ടുണ്ട്. വിശദമായ പരിശോധനയ്ക്കായി സാംപിള്‍ പൂനൈ വൈറോളജി ഇന്‍സ്റ്റിറ്റ്യൂട്ടിലേക്ക് അയച്ചിരിക്കുകയാണ്

മുൻ മുഖ്യമന്ത്രി വിഎസ് അച്യുതാനന്ദന്റെ ആരോഗ്യനില അതീവ ഗുരുതരമായി തുടരുന്നു. ഡയാലിസിസ് ചെയ്യാനായിരുന്നു മെഡിക്കൽ ബോർഡ് നിർദേശം. എന്നാൽ ഇതിനോട് അദ്ദേഹത്തിന്റെ ശരീരം പ്രതികരിച്ചിട്ടില്ല. രക്തസമ്മർദ്ദവും സാധാരണ നിലയിൽ അല്ല. വെന്റിലേറ്ററിന്റെ സഹായത്തോടെയാണ് അദ്ദേഹത്തിന്റെ ജീവൻ നിലനിർത്തുന്നത്.

അതിനിടെ സംസ്ഥാനത്ത് വീണ്ടും മഴ കനക്കുന്നു. ഇന്ന് കോഴിക്കോട്, വയനാട്, കണ്ണൂർ, കാസറഗോഡ് ജില്ലകളിൽ മഞ്ഞ അലർട്ട് പ്രഖ്യാപിച്ചിട്ടുണ്ട്. ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്. 24 മണിക്കൂറിൽ 64.5 മില്ലിമീറ്ററിൽ മുതൽ 115.5 മില്ലിമീറ്റർ വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് കേന്ദ്ര കാലാവസ്ഥ വകുപ്പ് അർത്ഥമാക്കുന്നത്. ഇടിമിന്നലോടു കൂടിയ മഴയാണ് പ്രതീക്ഷിക്കുന്നത്. ഇന്നത്തെ മറ്റ് പ്രധാന വാർത്തകൾ അറിയാം