അടിമാലിയില്‍ മണ്ണിടിച്ചിലില്‍ വീടു തകര്‍ന്ന് ഗൃഹനാഥന്‍ മരിച്ചു; ഒഴിവായത് വന്‍ ദുരന്തം: പ്രധാന വാര്‍ത്തകള്‍

ഇടുക്കിയില്‍ നിന്നുണ്ടായ ദാരുണമായ വാര്‍ത്ത കേട്ടാണ് സംസ്ഥാനം ഇന്ന് ഉണര്‍ന്നത്. അടിമാലി കൂമ്പന്‍പാറയില്‍ മണ്ണിടിച്ചിലില്‍ വീടിനുള്ളില്‍ കുടുങ്ങിയ ഗൃഹനാഥന്‍ മരിച്ചു. ബിജുവാണ് മരിച്ചത്. ഭാര്യ സന്ധയ്ക്ക് ഗുരുതര പരിക്ക്. ആറ് വീടുകള്‍ക്ക് മുകളിലേക്കാണ് മണ്ണ് ഇടിഞ്ഞുവീണത്. രണ്ടു വീടുകള്‍ പൂര്‍ണമായും തകര്‍ന്നു. ഇന്നലെ രാത്രി പത്തരയോടെ കൊച്ചി - ധനുഷ്‌കോടി ദേശീയപാതയിലാണ് അപകടം ഉണ്ടായത്.

രാത്രി മുഴുവന്‍ നീണ്ട രക്ഷാപ്രവര്‍ത്തനത്തിനൊടുവിലാണ് ബിജുവിനെയും സന്ധ്യയെയും പൂര്‍ണമായും തകര്‍ന്ന വീട്ടില്‍ നിന്ന് പുറത്തെത്തിച്ചത്. ഈ പ്രദേശത്ത് ധനുഷ്‌കോടി ദേശീയപാതയുടെ നിര്‍മാണത്തിനായി മണ്ണെടുത്തിരിക്കുകയായിരുന്നു. ഉയരത്തില്‍ നിന്ന് വീടുകള്‍ക്കു മുകളിലേക്കു മണ്ണ് ഇടിഞ്ഞ് വീണാണ് അപകടം ഉണ്ടായത്. പ്രദേശത്ത് വൈദ്യുതി ബന്ധവും നിലച്ചു. മണ്ണിടിച്ചില്‍ ഭീഷണിയെ തുടര്‍ന്ന് ഇന്നലെ ഇവിടെയുള്ള നിരവധി കുടുംബങ്ങളെ വൈകിട്ടോടെ ക്യാമ്പിലേക്കു മാറ്റി പാര്‍പ്പിച്ചിരുന്നു. അതിനാല്‍ വലിയ ദുരന്തമാണ് ഒഴിവായത്.

ബിജുവും ഭാര്യയും ഭക്ഷണം കഴിക്കാനും അത്യാവശ്യമുള്ള ഏതാനും സാധനങ്ങള്‍ എടുക്കാനും വീട്ടില്‍ തിരിച്ചെത്തിയപ്പോഴാണ് അപകടം ഉണ്ടായത്. സംഭവത്തില്‍ പ്രദേശവാസികള്‍ വലിയ പ്രതിഷേധത്തിലാണ്.

സംസ്ഥാന രാഷ്ട്രീയവും ഏറെ കലുഷിതമായാണ് മുന്നോട്ടു പോകുന്നത്. പിഎംശ്രീ പദ്ധതിയില്‍ ഇടഞ്ഞ സിപിഐയെ അനുനയിപ്പിക്കാനുള്ള ശ്രമത്തിലാണ് സിപിഎം. വീണ്ടും ചര്‍ച്ചകളിലൂടെ തര്‍ക്കം പരിഹരിക്കാനാണ് ശ്രമിക്കുന്നത്. അതിനിടെ, ശബരിമല സ്വര്‍ണക്കൊള്ള കേസില്‍ തെളിവെടുപ്പ് തുടരുകയാണ്. ചെന്നൈയിലാണ് പ്രത്യേക അന്വേഷണ സംഘം തെളിവെടുപ്പ് നടത്തുന്നത്.