ഇറാനിലെ എണ്ണപ്പാടം ആക്രമിച്ച് ഇസ്രയേല്‍; പോരാട്ടം രൂക്ഷം: സംസ്ഥാനത്ത് കനത്ത മഴ

ലോക രാജ്യങ്ങളെയും സമാധാന പ്രേമികളെയും ആശങ്കയിലാഴ്ത്തി മധ്യപൂര്‍വ ദേശത്തെ അശാന്തി രൂക്ഷമാകുന്നതാണ് ഇന്നത്തെ ഏറ്റവും പ്രധാനപ്പെട്ട വാര്‍ത്ത. ഇറാന്‍-ഇസ്രയേല്‍ പോര് ഇരുപക്ഷത്തും വിട്ടുവീഴ്ച്ചയില്ലാതെ തുടരുകയാണ്. ഇറാനിലെ എണ്ണപ്പാടം ഇസ്രയേല്‍ ആക്രമിച്ചതാണ് ഏറ്റവും പുതിയ വാര്‍ത്ത. ബുഷഹ്ര് പ്രവിശ്യയിലെ പാര്‍സ് റിഫൈനറിയാണ് ആക്രമിച്ചത്. ലോകത്തെ ഏറ്റവും വലിയ എണ്ണപ്പാടങ്ങളില്‍ ഒന്നാണ് പാര്‍സ് റിഫൈനറി.

പിന്നാലെ ഇസ്രയേലിന്റെ വിവിധ കേന്ദ്രങ്ങള്‍ ലക്ഷ്യമിട്ട് ഇറാന്‍ മിസൈലാക്രമണം നടത്തി. ഹൈഫ, ടെല്‍ അവീവ് തുടങ്ങിയ ഇസ്രയേല്‍ നഗരങ്ങളെ ലക്ഷ്യമിട്ടാണ് ഇറാന്റെ ആക്രമണം. ഇരുന്നൂറോളം മിസൈലുകളാണ് ഇറാന്‍ വിക്ഷേപിച്ചത്. ആക്രമണങ്ങളില്‍ എട്ടു പേര്‍ കൊല്ലപ്പെട്ടതായാണ് റിപ്പോര്‍ട്ടുകള്‍. നിരവധി പേര്‍ക്ക് പരുക്കേറ്റിട്ടുണ്ട്.

ഇറാനിലെ സിവിലിയന്‍, ഊര്‍ജ്ജ അടിസ്ഥാന സൗകര്യങ്ങള്‍ ഇസ്രയേല്‍ ബോംബിട്ട് തകര്‍ത്തു. നിലവില്‍ മധ്യസ്ഥ ശ്രമങ്ങളെയെല്ലാം വൃഥാവിലാക്കിയാണ് ഇരു രാജ്യങ്ങളും പോരാട്ടം തുടരുന്നത്. അമേരിക്കയില്‍ മിനസോഡ സംസ്ഥാനത്ത് ഡെമോക്രാറ്റ് വനിതാ നേതാവിനെയും ഭര്‍ത്താവിനെയും വീട്ടില്‍ക്കയറി വെടിവച്ചു കൊന്നതാണ് മറ്റൊരു പ്രധാനപ്പെട്ട അന്താരാഷ്ട്ര വാര്‍ത്ത.

കേരളത്തിലേക്കു വന്നാല്‍ കാലവര്‍ഷം തകര്‍ത്തു പെയ്യുകയാണ്. കനത്ത മഴയാണ് സംസ്ഥാനത്തുടനീളം പെയ്യുന്നത്. പലയിടങ്ങളിലും വൈദ്യുതി വിതരണം തടസപ്പെട്ടു. വെള്ളപ്പൊക്കവും ശക്തമായിട്ടുണ്ട്. ജനജീവിതം ദുസഹമായി. അടുത്ത അഞ്ച് ദിവസം തീവ്ര, അതിതീവ്ര മഴ തുടരുമെന്നാണ് കാലാവസ്ഥാ വകുപ്പിന്റെ പ്രവചനം.

ഇന്ന് അഞ്ച് ജില്ലകളില്‍ റെഡ് അലര്‍ട്ടാണ് പ്രഖ്യാപിച്ചിട്ടുള്ളത്. മലപ്പുറം, കോഴിക്കോട്, വയനാട്, കണ്ണൂര്‍, കാസര്‍ഗോഡ് ജില്ലകളിലാണ് റെഡ് അലര്‍ട്ട്. ഒമ്പത് ജില്ലകളില്‍ ഓറഞ്ച് അലര്‍ട്ടും പ്രഖ്യാപിച്ചിട്ടുണ്ട്.

ഇന്ത്യയെ നടുക്കിയ അഹമ്മദാബാദിലെ എയര്‍ ഇന്ത്യ വിമാന ദുരന്തത്തില്‍ കൊല്ലപ്പെട്ട 19 പേരുടെ മൃതദേഹങ്ങള്‍ ഡിഎന്‍എ പരിശോധനയിലൂടെ തിരിച്ചറിഞ്ഞു.