ഇറാന്‍ വ്യോമപാത തുറന്നു; ഇന്ത്യന്‍ വിദ്യാര്‍ത്ഥികളുമായി വിമാനം ഡല്‍ഹിയിലെത്തി; ഇന്ന് യോഗ ദിനം

ലോകത്തെ മുള്‍മുനയില്‍ നിര്‍ത്തുന്ന ഇറാന്‍-ഇസ്രായേല്‍ യുദ്ധത്തിനിടെ ഇന്ത്യയെ സംബന്ധിച്ചിടത്തോളം ആശ്വാസകരമായ ഒരു വാര്‍ത്തയാണ് ഇന്നുണ്ടായത്. ഓപ്പറേഷന്‍ സിന്ധുവിന്റെ ഭാഗമായി ഇറാനില്‍ കുടുങ്ങിയ ഇന്ത്യന്‍ വിദ്യാര്‍ത്ഥികളുമായി വിമാനം ഇന്നലെ രാത്രി ഡല്‍ഹിയിലെത്തി. ഇറാന്‍ സംഘര്‍ഷം രൂക്ഷമായതോടെ അടച്ച വ്യോമപാത ഇന്ത്യന്‍ വിമാനങ്ങള്‍ക്കു വേണ്ടി ഇറാന്‍ താല്‍ക്കാലികമായി തുറന്നുകൊടുത്തിരുന്നു.

290 ഇന്ത്യന്‍ വിദ്യാര്‍ഥികളാണ് വിമാനത്തിലുണ്ടായിരുന്നത്. ഇറാനിലെ മഷ്ഹദില്‍നിന്നുള്ള ആദ്യ വിമാനമാണ് ഇന്നലെ രാത്രി പതിനൊന്നരയോടെ ഡല്‍ഹിയിലെത്തിയത്. ഇവരിലേറെയും ജമ്മു കശ്മീരില്‍ നിന്നുള്ളവരാണ്. കേരളത്തില്‍ നിന്ന് ആരുമില്ല. അടുത്ത രണ്ടു വിമാനങ്ങള്‍ വൈകാതെ ഡല്‍ഹിയിലെത്തും. ആയിരത്തോളം ഇന്ത്യക്കാരെ മൂന്ന് വിമാനങ്ങളിലാണ് തിരിച്ചെത്തിക്കുന്നത്. അഷ്ഗാബത്തില്‍ നിന്നുള്ള രണ്ടാമത്തെ വിമാനം ശനിയാഴ്ച രാവിലെ ഏകദേശം 10 മണിയോടെയും മൂന്നാമത്തെ വിമാനം ശനിയാഴ്ച വൈകുന്നേരവും ഇന്ത്യയിലെത്തും.

അതേസമയം, വാല്‍പ്പാറയില്‍ പുലി പിടിച്ചു കൊണ്ടുപോയ നാലര വയസുകാരിക്കായി തിരച്ചില്‍ തുടരുകയാണ്. ഇന്നലെ വൈകുന്നേരം നാലരയോടെയാണ് സംഭവം. വാല്‍പ്പാറ നഗരത്തോടു ചേര്‍ന്നുള്ള പച്ചമല എസ്റ്റേറ്റിലെ തോട്ടം തൊഴിലാളിയായ ജാര്‍ഖണ്ഡ് സ്വദേശി മനോജ് കുന്ദയുടെ മകള്‍ റൂസ്നിയെയാണ് വീടിനു മുന്നില്‍ കളിച്ചു കൊണ്ടിരിക്കെ പുലി പിടിച്ചത്. തോട്ടത്തില്‍ മുഴുവനും തിരഞ്ഞെങ്കിലും കുട്ടിയെ കണ്ടെത്താനായിട്ടില്ല.

തുടര്‍ച്ചയായ ഒന്‍പതാം ദിവസവും ഇസ്രയേല്‍-ഇറാന്‍ ആക്രമണം രൂക്ഷമായി തുടരുകയാണ്. ഇസ്രായേല്‍ ആക്രമണത്തില്‍ ഇറാനില്‍ ഇതുവരെ 639 പേര്‍ കൊല്ലപ്പെട്ടതായാണ് കണക്കുകള്‍. ഇറാന്റെ ആക്രമണങ്ങളില്‍ 24 പൗരന്മാര്‍ കൊല്ലപ്പെട്ടതായാണ് ഇസ്രായേലിന്റെ കണക്കുകള്‍.

ഇന്ത്യയില്‍ അന്താരാഷ്ട്ര യോഗ ദിനാചരണ ആഘോഷങ്ങള്‍ ആരംഭിച്ചുകഴിഞ്ഞു. പ്രധാനമന്ത്രിയുടെ നേതൃത്വത്തില്‍ വിശാഖപട്ടണത്ത് മൂന്നു ലക്ഷത്തിലധികം ആളുകള്‍ പങ്കെടുക്കുന്ന യോഗാ സംഗമം തുടങ്ങി.