വന്ദേഭാരത് ഗണഗീതത്തില്‍ സംസ്ഥാനത്ത് രാഷ്ട്രീയ പോര് രൂക്ഷമാകുന്നു. കേരളത്തിന് അനുവദിച്ച വന്ദേഭാരത് എക്‌സ്പ്രസിന്റെ കന്നി യാത്രയില്‍ വിദ്യാര്‍ത്ഥികള്‍ ആര്‍എസ്എസ് ഗണഗീതം പാടുന്ന വീഡിയോ ദക്ഷിണ റെയില്‍വേ എക്‌സില്‍ പങ്കുവെച്ചത് വലിയ വിവാദമായിരുന്നു. ഇത് പിന്നീട് എക്‌സില്‍ നിന്ന് പിന്‍വലിച്ചിരുന്നു. എന്നാല്‍ യുഡിഎഫും എല്‍ഡിഎഫും വിമര്‍ശനം ഉന്നയിച്ചതിന് പിന്നാലെ വീഡിയോ വീണ്ടും ദക്ഷിണ റെയില്‍വേ പോസ്റ്റ് ചെയ്തത് വിവാദത്തിന് ചൂട് പകര്‍ന്നിരിക്കുകയാണ്.

ഗണഗീതത്തിന്റെ ഇംഗ്ലീഷ് വിവര്‍ത്തനംകൂടി ചേര്‍ത്താണ് വീണ്ടും പോസ്റ്റ് ചെയ്തിരിക്കുന്നത്.
സംഭവത്തില്‍ മുഖ്യമന്ത്രി പിണറായി വിജയന്‍, പ്രതിപക്ഷ നേതാവ് വിഡി സതീശന്‍ ഉള്‍പ്പെടെയുള്ളവര്‍ നടത്തിയ വിമര്‍ശനത്തില്‍ ബിജെപി സംസ്ഥാന പ്രസിഡന്റ് രാജീവ് ചന്ദ്രശേഖര്‍ പ്രതികരിച്ചു. കുട്ടികള്‍ അവര്‍ക്ക് ഇഷ്ട്ടുള്ള ദേശഭക്തി ഗാനം പാടിയതാണോ പ്രശ്‌നമെന്ന് രാജീവ് ചന്ദ്രശേഖര്‍ ചോദിച്ചു. വിമര്‍ശനങ്ങളെ ബിജെപി പ്രതിരോധിക്കാന്‍ തുടങ്ങിയതോടെ വിവാദം ദേശീയ ശ്രദ്ധ ആകര്‍ഷിക്കുകയാണ്.

അതിനിടെ, പാലക്കാട് ഇന്നലെ രാത്രിയുണ്ടായ വാഹനാപകടത്തില്‍ മൂന്ന് യുവാക്കള്‍ക്ക് ദാരുണാന്ത്യം. കാട്ടുപന്നി കുറുകെച്ചാടിയാണ് അപകടം ഉണ്ടായത്. പന്നി കുറുകെച്ചാടിയതിനെ തുടര്‍ന്ന് നിയന്ത്രണംവിട്ട കാര്‍ മരത്തില്‍ ഇടിച്ച് പാടത്തേക്കു മറിയുകയായിരുന്നു. പാലക്കാട് സ്വദേശികളായ റോഹന്‍ സന്തോഷ് (22), സനൂഷ് (19), രോഹന്‍ രഞ്ജിത് (24) എന്നിവരാണു മരിച്ചത്. രണ്ടു പേര്‍ക്ക് ഗുരുതരമായി പരിക്കേറ്റു. യാത്രപോയി മടങ്ങി വരുമ്പോഴാണ് അപകടം ഉണ്ടായത്.

ദേശീയ രാഷ്ട്രീയത്തിലേക്കു വന്നാല്‍ ബീഹാറില്‍ അവസാന ഘട്ട തെരഞ്ഞെടുപ്പ് ചൊവ്വാഴ്ച നടക്കും. പരസ്യപ്രചാരണം ഇന്നവസാനിക്കും. 122 മണ്ഡലങ്ങളാണ് ചൊവ്വാഴ്ച വിധിയെഴുതുന്നത്. ഇതോടെ രണ്ട് ഘട്ടങ്ങളിലായി നടക്കുന്ന തെരഞ്ഞെടുപ്പിന്റെ പ്രചാരണത്തിന് തിരശീല വീഴും.