ഇന്ന് ആറ് ജില്ലകളില്‍ യെല്ലോ അലേര്‍ട്ട്; ഇടിമിന്നലിനു സാധ്യത; ബസ് അപകടത്തില്‍ മരണം 20

സംസ്ഥാനത്തുടനീളം ഇന്നും കനത്ത മഴയ്ക്കു സാധ്യത. ഇടിമിന്നലോടു കൂടിയുള്ള മഴ പെയ്യാന്‍ സാധ്യതയുള്ളതിനാല്‍ ജാഗ്രത പുലര്‍ത്തണമെന്നാണ് കേന്ദ്ര കാലാവസ്ഥ വകുപ്പിന്റെ മുന്നറിയിപ്പ്. ഇന്ന് ആറു ജില്ലകളിലാണ് യെല്ലോ അലേര്‍ട്ട് പ്രഖ്യാപിച്ചിട്ടുള്ളത്. തിരുവനന്തപുരം, കൊല്ലം, പത്തനംതിട്ട, കോട്ടയം, ഇടുക്കി, എറണാകുളം ജില്ലകളിലാണ് യെല്ലോ അലേര്‍ട്ട്. കഴിഞ്ഞ ദിവസം കണ്ണൂരില്‍ ഇടിമിന്നലേറ്റ് രണ്ട് തൊഴിലാളികള്‍ മരിച്ചതിന്റെ പശ്ചാത്തലത്തില്‍ മിന്നലുള്ള സമയത്ത് അതീവ ജാഗ്രത പുലര്‍ത്തണം. മഴയ്‌ക്കൊപ്പം ശക്തമായ കാറ്റിനും സാധ്യതയുണ്ട്. ഇന്ന് കേരള, ലക്ഷദ്വീപ് തീരങ്ങളില്‍ മത്സ്യബന്ധനത്തിന് വിലക്കേര്‍പ്പെടുത്തിയിട്ടുണ്ട്. മലയോര മേഖലകളിലേക്കുള്ള അത്യാവശ്യമല്ലാത്ത യാത്രകളും ഒഴിവാക്കുന്നതാണ് നല്ലത്.

ദേശീയ വാര്‍ത്തകളിലേക്കു നോക്കിയാല്‍ ഒരു വലിയ ബസ് ദുരന്തത്തിന്റെ വാര്‍ത്തയുടെ ദാരുണമായ വിശദാംശങ്ങളാണ് പുറത്തേക്കു വരുന്നത്. ജയ്സാല്‍മീറില്‍ നിന്ന് ജോധ്പൂരിലേക്ക് പോവുകയായിരുന്ന സ്വകാര്യ ബസിന് തീപിടിച്ച് 20 യാത്രക്കാര്‍ വെന്തുമരിച്ചു. 16 പേര്‍ക്കാണ് ഗുരുതരമായി പരിക്കേറ്റത്. ബസില്‍ 57 യാത്രക്കാര്‍ ഉണ്ടായിരുന്നുവെന്നാണ് റിപ്പോര്‍ട്ടുകള്‍. ഇന്നലെ ഉച്ചയ്ക്ക് മൂന്നു മണിക്ക് ശേഷമാണ് ബസ് ജയ്സാല്‍മീറില്‍ നിന്ന് യാത്ര തിരിച്ചത്. ഷോര്‍ട്ട് സര്‍ക്യൂട്ടാണ് തീപിടിത്തത്തിന് കാരണമെന്നാണ് പ്രാഥമിക നിഗമനം.

രാജ്യാന്തര വാര്‍ത്തകളില്‍ ഗാസയില്‍ സമാധാനം പുലരുമോ എന്നാണ് എല്ലാവരും ഉറ്റുനോക്കുന്നത്. അതിനിടെ കൊല്ലപ്പെട്ട കൂടുതല്‍ ബന്ദികളുടെ മൃതദേഹങ്ങള്‍ ഹമാസ് ഇസ്രായേലിന് തിരികെ നല്‍കി. മൃതദേഹങ്ങള്‍ കൈമാറുന്നത് ഹമാസ് വൈകിപ്പിക്കുന്നതിന്റെ പേരില്‍ ഗാസയിലേക്കുള്ള സഹായ വിതരണം പകുതിയായി കുറയ്ക്കുമെന്ന് ഇസ്രായേലി സൈനിക ഏജന്‍സി പ്രഖ്യാപിച്ചതിന് പിന്നാലെയാണ് ഈ നടപടി.