പിഎം ശ്രീയിൽ പുകഞ്ഞ് ഇടതുമുന്നണി: ബിഹാറിന്റെ നേതാവ് നിതീഷെന്ന് മോദി

പിഎം ശ്രീയിൽ പുകഞ്ഞ് ഇടതുമുന്നണി. ആശങ്കകൾക്ക് അടിസ്ഥാനമില്ലെന്നും ആയിരക്കണക്കിന് രൂപയുടെ ഫണ്ട് തടഞ്ഞുള്ള കേന്ദ്രനീക്കത്തെ മറികടക്കാനുള്ള തന്ത്രമാണെന്നും എൻഇപിയെ ലോകാവസാനം വരെ എതിർക്കാനാവില്ലെന്നും വിദ്യാഭ്യാസമന്ത്രി വി ശിവൻകുട്ടി പറയുന്നു. കടുത്ത സാമ്പത്തിക പ്രതിസന്ധി നേരിടുന്ന സമയത്ത് ആയിരക്കണക്കിന് രൂപയുടെ ഫണ്ട് വേണ്ടെന്ന് വെക്കാനാവില്ലെന്ന് വിശദീകരിച്ച മന്ത്രി പാഠപുസ്തകങ്ങൾ മാറ്റില്ലെന്നും ആർഎസ്എസ് നയങ്ങൾക്ക് എതിരായ പോരാട്ടം തുടരുമെന്നും കൂട്ടിച്ചേർക്കുന്നു.

പക്ഷേ ഇത്ര വലിയൊരു വിഷയത്തിൽ ഘടകകക്ഷികളെ ഇരുട്ടിൽ നിർത്തിയത് അംഗീകരിക്കാനാകില്ലെന്ന് സിപിഐ ആവർത്തിച്ചു. ആരോടും ചർച്ച ചെയ്യാതെ തീരുമാനങ്ങളെടുക്കുന്നത് ഇടതുമുന്നണി ശൈലിയല്ലെന്ന് സിപിഐ സംസ്ഥാന സെക്രട്ടറി ബിനോയ് വിശ്വം ആഞ്ഞടിച്ചു. ചർച്ചകളില്ലാതെ ധാരണ ഒപ്പിട്ടത് മുന്നണി മര്യാദയുടെ ലംഘനമാണെന്നും ബിനോയ് വിശ്വം കുറ്റപ്പെടുത്തി. ഈ രീതി തിരുത്തിയേ തീരൂ എന്ന് ആവശ്യപ്പെട്ട് ഇടതുമുന്നണി കൺവീനർക്ക് കത്ത് നൽകിയെന്നും അദ്ദേഹം അറിയിച്ചു.

ബീഹാർ നിയമസഭ തിരഞ്ഞെടുപ്പില്‍ പ്രധാനമന്ത്രിയുടെ പ്രചരണത്തിന് ഇന്ന് സമസ്തിപൂരില്‍ തുടക്കമായി പട്‌നയില്‍ നിന്ന് 90 കിലോമീറ്റര്‍ അകലെയുള്ള സമസ്തിപൂരിലെ ദൂധ്പൂര ഹെലിപാഡ് ഗ്രൗണ്ടില്‍ നടക്കുന്ന പൊതുയോഗത്തെ പ്രധാനമന്ത്രി പ്രവര്‍ത്തകരെ അഭിസംബോധന ചെയ്തു. മുഖ്യമന്ത്രി നിതീഷ് കുമാറും റാലിയെ അഭിസംബോധന ചെയ്തു. ബിഹാറിന്‍റെ നേതാവ് നിതീഷ് കുമാറാണെന്ന് പ്രധാനമന്ത്രി യോഗത്തില്‍ വ്യക്തമാക്കി.