പിഎം ശ്രീ പദ്ധതി നടപ്പാക്കുന്നതില്‍ പുനഃപരിശോധന; റഫേല്‍ യുദ്ധവിമാനത്തില്‍ രാഷ്ട്രപതി

പിഎം ശ്രീ വിവാദത്തില്‍ സിപിഐ സമ്മര്‍ദത്തിന് വഴങ്ങി സിപിഎം. പിഎം ശ്രീ പദ്ധതി നടപ്പാക്കുന്നതില്‍ പുനഃപരിശോധന. പദ്ധതി പരിശോധിച്ച് റിപ്പോര്‍ട്ട് തയാറാക്കാന്‍ മന്ത്രിസഭാ ഉപസമിതി രൂപീകരിച്ചു. വിദ്യാഭ്യാസ മന്ത്രി വി ശിവന്‍കുട്ടി അധ്യക്ഷനായി ഏഴംഗ സമിതിയെയാണ് നിയോഗിച്ചത്. കെ രാജന്‍, പി പ്രസാദ്, പി രാജീവ്, റോഷി അഗസ്റ്റിന്‍, കെ കൃഷ്ണന്‍കുട്ടി, എകെ ശശീന്ദ്രന്‍ എന്നിവരാണ് സമിതി അംഗങ്ങള്‍. സമിതി റിപ്പോര്‍ട്ട് വരും വരെ പദ്ധതിയിന്‍മേല്‍ തുടര്‍ നടപടികളുണ്ടാവില്ല. അക്കാര്യം അറിയിച്ച് കേന്ദ്രത്തിന് കത്തയക്കുമെന്നും മുഖ്യമന്ത്രി പിണറായി വിജയന്‍ വിശദീകരിച്ചു.

ധാരണാപത്രം ഒപ്പിട്ട് ഒരാഴ്ച പിന്നിടുമ്പോഴുള്ള പുനഃപരിശോധന സിപിഐയുടെ കടുത്ത നിലപാടിന് പിന്നാലെയാണ്. കരാര്‍ പഠിക്കാനുള്ള ഉപസമിതിയില്‍ സിപിഎമ്മിന്റേയും സിപിഐയുടേയും രണ്ട് വീതം മന്ത്രിമാരാണ് ഉള്ളത്.

പിഎം ശ്രീ വിഷയത്തില്‍ കടുംപിടിത്തം തുടരുന്ന സിപിഐയെ അനുനയിപ്പിക്കാന്‍ തിരുവനന്തപുരത്ത് തിരക്കിട്ട രാഷ്ട്രീയ യോഗങ്ങള്‍ നടന്നിരുന്നു. പ്രശ്‌നം പരിഹരിക്കാന്‍ മുഖ്യമന്ത്രി പിണറായി വിജയന്‍ തന്നെ മുന്നിട്ടിറങ്ങുകയായിരുന്നു.

ആന്ധ്രപ്രദേശില്‍ ആറു പേരുടെ ജീവന്‍ എടുത്ത് മോന്‍താ ചുഴലിക്കാറ്റ്. ഇന്നത്തെ അര്‍ധരാത്രിയോടെയാണ് ചുഴലിക്കാറ്റ് മഛിലിപട്ടണത്തിനും കലിംഗപട്ടണത്തിനും ഇടയില്‍ കാക്കിനാട ഭാഗത്ത് കരതൊട്ടത്. ആയിരക്കണക്കിന് ആളുകളെ തീരത്തു നിന്ന് മുന്‍കൂട്ടി ഒഴിപ്പിച്ചതിനാല്‍ വലിയ അപകടങ്ങള്‍ ഒഴിവായി. കനത്ത മഴ കാരണം ജനജീവിതം സ്തംഭിച്ചു.

ആന്ധ്രാപ്രദേശില്‍ വ്യാപകമായ കൃഷിനാശമുണ്ടായി. 38,000 ഹെക്ടറില്‍ വ്യാപിച്ചുകിടക്കുന്ന വിളകളും 1.38 ലക്ഷം ഹെക്ടറിലെ ഹോര്‍ട്ടികള്‍ച്ചര്‍ വിളകളും നശിച്ചതായി അധികൃതര്‍ അറിയിച്ചു. മോന്‍ത ചുഴലിക്കാറ്റ് കരതൊട്ടതിന് പിന്നാലെ ചുഴലിക്കാറ്റിന്റെ ശക്തി ക്ഷയിച്ചത് ആശ്വാസം പകരുന്നുണ്ട്. ആന്ധ്രയില്‍ പല സ്ഥലങ്ങളിലും അതിശക്തമായ മഴ റിപ്പോര്‍ട്ട് ചെയ്തു.

ആന്ധ്രയില്‍ റെഡ് അലേര്‍ട്ട് പിന്‍വലിച്ചു. അതേസമയം, ഒഡിഷയില്‍ കാര്യമായ നാശനഷ്ടങ്ങള്‍ വരുത്താതെയാണ് ചുഴലിക്കാറ്റ് കടന്നുപോയത്. നിരവധി ട്രെയിന്‍ സര്‍വീസുകള്‍ റദ്ദാക്കി. 35 വിമാന സര്‍വീസുകള്‍ റദ്ദാക്കി. വിശാഖപട്ടണം വിമാനത്താവളത്തിലെ എല്ലാ പ്രവര്‍ത്തനങ്ങളും നിര്‍ത്തിവച്ചു.

അതേസമയം, ഗാസയില്‍ പ്രതിസന്ധി രൂക്ഷമായിരിക്കുകയാണ്. സമാധാന കരാറിന്റെ ഭാവിയും അനിശ്ചിത്വത്തിലാണ്. ഹമാസ് വെടിനിര്‍ത്തല്‍ കരാര്‍ ലംഘിച്ചുവെന്ന് ആരോപിച്ച് ഗാസയില്‍ ശക്തമായ ആക്രമണങ്ങള്‍ നടത്താന്‍ ഇസ്രായേല്‍ പ്രധാനമന്ത്രി ബെഞ്ചമിന്‍ ഉത്തരവിട്ടിരിക്കുകയാണ്. ഹമാസിന്റെ ലംഘനങ്ങള്‍ക്ക് മറുപടി നല്‍കാന്‍ ഇസ്രായേലിന് അവകാശമുണ്ടെന്ന യുഎസ് പ്രസിഡന്റ് ഡൊണാള്‍ഡ് ട്രംപിന്റെ പ്രസ്താവന കൂടി വന്നതോടെ സംഘര്‍ഷത്തിന് ആക്കം കൂട്ടിയിരിക്കുകയാണ്.