ജനസംഖ്യാപരമായ മാറ്റം നുഴഞ്ഞുകയറ്റത്തേക്കാൾ ഭീഷണിയെന്ന് മോദി; അടച്ചുപൂട്ടൽ ഭീതിയിൽ അമേരിക്ക

അമേരിക്ക അസാധാരണ പ്രതിസന്ധി നേരിടുന്നതാണ് ഇന്നത്തെ ഏറ്റവും പ്രധാനപ്പെട്ട രാജ്യാന്തര വാര്‍ത്ത. അത്യാവശ്യ സേവനങ്ങള്‍ ഒഴികെയുള്ള സര്‍ക്കാര്‍ സേവനങ്ങള്‍ മണിക്കൂറുകള്‍ക്കുള്ളില്‍ നിര്‍ത്തിവയ്ക്കുന്ന അടച്ചുപൂട്ടലിലേക്ക് രാജ്യം നീങ്ങുന്നുവെന്നാണ് ഡൊണാള്‍ഡ് ട്രംപ് ഭരണകൂടം നല്‍കുന്ന മുന്നറിയിപ്പ്. ഷട്ട്ഡൗണ്‍ എന്നാണ് ഇതിനെ വിശേഷിപ്പിക്കുന്നത്.

യുഎസ് കോണ്‍ഗ്രസില്‍ ഫെഡറല്‍ സര്‍ക്കാരിന്റെ പ്രവര്‍ത്തനങ്ങള്‍ക്ക് ആവശ്യമായ ധന ബില്‍ പാസാക്കാനായില്ല. ഇതോടെയാണ് ഷട്ട്ഡൗണിലേക്ക് നീങ്ങുന്ന സാഹചര്യം ഉണ്ടായിരിക്കുന്നത്. ഇതേതുടര്‍ന്ന് അവശ്യ സേവനങ്ങളൊഴികെ മറ്റ് സര്‍ക്കാര്‍ വകുപ്പുകളുടെയെല്ലാം പ്രവര്‍ത്തനം നിലക്കുന്ന സാഹചര്യമുണ്ടാവും. യുഎസില്‍ സാമ്പത്തിക വര്‍ഷം ഒക്ടോബര്‍ ഒന്നിനാണ് ആരംഭിക്കുന്നത്. അതിന് മുന്‍പ് ഫണ്ട് അനുവദിക്കാന്‍ കോണ്‍ഗ്രസിനു കഴിഞ്ഞില്ലെങ്കില്‍ വകുപ്പുകളുടെ പ്രവര്‍ത്തനം തടസപ്പെടും. 2018-19 ല്‍ 35 ദിവസം ഇത്തരത്തില്‍ ഷട്ട്ഡൗണ്‍ നടപ്പാക്കിയിരുന്നു.

കേരളത്തിലേക്കു വന്നാല്‍ കട്ടപ്പനയില്‍ നിന്ന് ദാരുണമായ വാര്‍ത്തയാണ് ഇന്നലെ അര്‍ധരാത്രിയോടെ വന്നത്. ഓട വൃത്തിയാക്കാന്‍ ഇറങ്ങിയ മൂന്ന് ഇതര തൊഴിലാളികളാണ് അതില്‍ കുടുങ്ങി മരിച്ചത്. തമിഴ്‌നാട് കമ്പം സ്വദേശി ജയരാമന്‍, ഗൂഡല്ലൂര്‍ സ്വദേശികളായ സുന്ദരപാണ്ഡ്യന്‍, മൈക്കിള്‍ എന്നിവരാണ് മരിച്ചത്. ഇവരെ പുറത്തെടുക്കാന്‍ ഫയര്‍ഫോഴ്സ് സ്ഥലത്തെത്തിയിരുന്നു. ഒന്നര മണിക്കൂര്‍ നീണ്ട പരിശ്രമത്തിനൊടുവില്‍ മൂന്ന് പേരെയും പുറത്തെടുത്തെങ്കിലും ജീവന്‍ രക്ഷിക്കാനായില്ല.

കേരളത്തില്‍ കാലവര്‍ഷക്കാറ്റ് ദുര്‍ബലമാകുന്നു. ഇന്ന് മഴ മുന്നറിയിപ്പുകളൊന്നും പ്രഖ്യാപിച്ചിട്ടില്ല. പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശ്ശൂര്‍, പാലക്കാട് ജില്ലകളില്‍ ഒറ്റപ്പെട്ടയിടങ്ങളില്‍ നേരിയ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.