ക്ഷാമ ബത്ത ഉയർത്തി ഉത്തരവിറക്കി; ക്ഷേമ പെൻഷൻ ഈ മാസം 3600 രൂപ കൈയ്യിൽ കിട്ടും

സംസ്ഥാന ചലച്ചിത്ര പുരസ്ക്കാര പ്രഖ്യാപനം ഇനിയും വൈകും. കേരളപ്പിറവി ദിനത്തിൽ നടത്താനിരുന്ന പുരസ്ക്കാര പ്രഖ്യാപനം നവംബർ 3ലേക്ക് മാറ്റി. തൃശൂരിൽ വെച്ചാണ് പ്രഖ്യാപനം. സർക്കാർ ജീവനക്കാരുടെ ക്ഷാമബത്ത ഉയർത്തി ഉത്തരവിറക്കി സർക്കാർ. നാല് ശതമാനം ഡിഎയാണ് അനുവദിച്ചിരിക്കുന്നത്.. വർധിപ്പിച്ച ഡിഎ ഒക്ടോബറിലെ ശമ്പളത്തോടൊപ്പം നൽകും.

സാമൂഹ്യ സുരക്ഷ, ക്ഷേമനിധി പെൻഷൻ ഗുണഭോക്താക്കൾക്ക് നവംബറിൽ 3,600 രൂപ വീതം നൽകുമെന്നും സർക്കാർ അറിയിച്ചു. ഇതിനായി 1,864 കോടി രൂപ അനുവദിച്ചതായി ധനകാര്യ മന്ത്രി കെ എൻ ബാലഗോപാൽ പറഞ്ഞു. വർധിപ്പിച്ച 2000 രൂപ പെൻഷൻ നവംബറിൽ തന്നെ വിതരണം ആരംഭിക്കുകയാണ്. അതിനോടൊപ്പമാണ് നേരത്തെ ഉണ്ടായ കുടിശികയിലെ അവസാന ഗഡുവും ലഭിക്കും. നവംബർ 20 മുതൽ പെൻഷൻ വിതരണം ആരംഭിക്കുമെന്നും മന്ത്രി അറിയിച്ചു.

സെക്രട്ടറിയേറ്റിന് മുന്നിലെ ആശ പ്രവർത്തകരുടെ രാപ്പകല്‍ സമരം അവസാനിക്കുന്നു. സർക്കാറിന്‍റെ പ്രഖ്യാപനം നേട്ടമെന്ന് വിലയിരുത്തിക്കൊണ്ടാണ് ഇത്തരമൊരു തീരുമാനത്തിലേക്ക് ആശ ഹെൽത്ത് വർക്കേഴ്സ് അസോസിയേഷൻ നേതാക്കള്‍ കടന്നിരിക്കുന്നത്. ശനിയാഴ്ച വിജയദിനമായി ആഘോഷിക്കും. സെക്രട്ടറിയേറ്റിന് മുന്നിലെ സമരം അവസാനിപ്പിക്കുമെങ്കിലും ജില്ലാതലങ്ങളില്‍ പുതിയ സമരമുഖം തുറക്കും.

തദ്ദേശ തിരഞ്ഞെടുപ്പില്‍ ഇടതുമുന്നണിക്കെതിരെ പ്രചരണം നടത്താനും ആശ ഹെൽത്ത് വർക്കേഴ്സ് അസോസിയേഷൻ തീരുമാനിച്ചിട്ടുണ്ട്. യു ഡി എഫിന് അനുകൂലമായ നിലപാടായിരിക്കും തിരഞ്ഞെടുപ്പിലും സ്വീകരിക്കുക. മറുവശത്ത് സർക്കാർ പ്രഖ്യാപനത്തിന്‍റെ പേരില്‍ വലിയ ആഘോഷമാണ് സി ഐ ടി യു വിഭാഗം ആശമാർ നടത്തുന്നത്.

രാഷ്ട്രീയ പാർട്ടികളുടെ ശക്തമായ എതിർപ്പിനിടെ വോട്ടർപട്ടികയിലെ തീവ്രപരിഷ്കരണവുമായി തിരഞ്ഞെടുപ്പ് കമ്മിഷന്‍ മുന്നോട്ട് പോകുന്നു. ത്ത് ലെവല്‍ ഓഫീസര്‍മാര്‍ക്കുള്ള പരിശീലന പരിപാടി ആരംഭിക്കും. ആദ്യ ഘട്ടത്തില്‍ തിരുവനന്തപുരം ജില്ലയിലെ വട്ടിയൂര്‍ക്കാവ്, നേമം മണ്ഡലങ്ങളിലെ ബൂത്ത് ലെവല്‍ ഓഫീസര്‍മാര്‍ക്കാണ് പരിശീലന പരിപാടി സംഘടിപ്പിക്കുന്നത്.