യുഎസിൽ ട്രംപിന്റെ വിശ്വസ്തൻ വെടിയേറ്റ് മരിച്ചു; യെമനിൽ ഇസ്രായേൽ ആക്രമണത്തിൽ 35 മരണം..മറ്റ് വാർത്തകൾ
വലതുപക്ഷ ആക്റ്റിവിസ്റ്റും അമേരിക്കൻ പ്രസിഡന്റ് ഡൊണാൾഡ് ട്രംപിന്റെ വിശ്വസ്തനുമായ ചാർലി കിർക്ക് (31) കൊല്ലപ്പെട്ടു. യൂട്ട വാലി സര്വകലാശാലയില് നടന്ന ചടങ്ങിനിടെ വെടിയേറ്റ് മരിക്കുകയായിരുന്നു. അതേസമയം കൊലപാതകിയെ കണ്ടെത്താനായിട്ടില്ല. ഒരാൾ കസ്റ്റഡിയിൽ ഉണ്ടെന്നാണ് റിപ്പോർട്ടുകൾ. കിർക്കിന്റെ മരണവാർത്ത ട്രംപ് തന്നെയാണ് സമൂഹമാധ്യമങ്ങളിലൂടെ പുറത്തുവിട്ടത്. 'അമേരിക്കയിലെ യുവാക്കളുടെ ഹൃദയം ചാൾട്ടനെപ്പോലെ മറ്റാർക്കും മനസ്സിലായിട്ടില്ലെന്ന്' ട്രംപ് കുറിച്ചു.
അതിനിടെ ഖത്തറിനെ ആക്രമിച്ചതിന് പിന്നാലെ യെമൻ തലസ്ഥാനമായ സനായിലും ഇസ്രായേൽ ബോംബാക്രമണം നടത്തി. ആക്രമണത്തിൽ 35 പേർ കൊല്ലപ്പെട്ടെന്നാണ് റിപ്പോർട്ട്. ഏകദേശം നൂറോളം പേർക്ക് പരിക്കേറ്റതായി ഹൂതി ആരോഗ്യമന്ത്രാലയം അറിയിച്ചു. ഹൂതികളുടെ സൈനികകേന്ദ്രങ്ങളിൽ ആക്രമണം നടത്തിയെന്നാണ് ഇസ്രായേൽ സ്ഥിരീകരണം.മറ്റ് പ്രധാനവാർത്തകൾ കൂടി അറിയാം
വടക്കു കിഴക്കന് സംസ്ഥാനങ്ങളിലേക്കുള്ള പ്രധാനമന്ത്രി നരേന്ദ്ര മോദിയുടെ സന്ദര്ശനത്തിന് ദിവസങ്ങള് മാത്രം ബാക്കിനില്ക്കെ, മണിപ്പുരില് ബിജെപി അംഗങ്ങള് കൂട്ടമായി രാജിവച്ചു. നാഗാ ഭൂരിപക്ഷ ജില്ലയിലെ പാര്ട്ടിയുടെ ഫുന്ഗ്യര് മണ്ഡലത്തില് നിന്ന് രാജിവച്ചവരില് മണ്ഡലം പ്രസിഡന്റ്, മഹിളാ, യുവ, കിസാന് മോര്ച്ചകളുടെ തലവന്മാരും, മണ്ഡലത്തിലെ ബൂത്ത് പ്രസിഡന്റുമാരും ഉള്പ്പെടുന്നു.
പിപി തങ്കച്ചന്റെ സംസ്കാരം മറ്റന്നാള്
അന്തരിച്ച മുതിര്ന്ന കോണ്ഗ്രസ് നേതാവ് പിപി തങ്കച്ചന്റെ സംസ്കാരം മറ്റന്നാള് നെടുമ്പാശേരി അകപ്പറമ്പ് യാക്കോബായ പള്ളിയില് നടക്കും. മൃതദേഹം പൊതുദര്ശനത്തിന് വയ്ക്കില്ല. പൊതുദര്ശനം ഒഴിവാക്കണമെന്ന് പിപി തങ്കച്ചന് ആവശ്യപ്പെട്ടത് പ്രകാരമാണിത്. നാളെ രാവിലെ 11 മണിക്ക് വീട്ടില് എത്തിക്കുന്ന മൃതദേഹം ശനിയാഴ്ച ഉച്ചയോടെ പള്ളിയിലേക്ക് കൊണ്ടുപോകും.
മുതിര്ന്ന കോണ്ഗ്രസ് നേതാവ് പിപി തങ്കച്ചന് അന്തരിച്ചു
മുതിര്ന്ന കോണ്ഗ്രസ് നേതാവ് പിപി തങ്കച്ചന് അന്തരിച്ചു. 86 വയസായിരുന്നു. ആലുവയിലെ സ്വകാര്യ ആശുപത്രിയില് വൈകീട്ടാണ് അന്ത്യം സംഭവിച്ചത്. വാര്ധക്യസഹജമായ അസുഖങ്ങളെ തുടര്ന്നായിരുന്നു അന്ത്യം. മുന് കൃഷി മന്ത്രിയും കെപിസിസി പ്രസിഡന്റും യുഡിഎഫ് കണ്വീനറുമായിരുന്നു.
മുസ്ലിം ലീഗ് നേതാവും കൊടുവള്ളി എംഎല്എയുമായ എംകെ മുനീറിന്റെ ആരോഗ്യനിലയില് പുരോഗതി. കോഴിക്കോട്ടെ സ്വകാര്യ ആശുപത്രിയിലാണ് മുനീര് ചികിത്സയില് കഴിയുന്നത്. രക്തത്തില് പൊട്ടാസ്യത്തിന്റെ അളവ് കുറഞ്ഞതിന് പിന്നാലെ ഹൃദയാഘാതം കൂടി ഉണ്ടായതോടെയാണ് മുനീറിനെ ആശുപത്രിയില് പ്രവേശിപ്പിച്ചത്. കഴിഞ്ഞ ദിവസം കൊടുവള്ളി മണ്ഡലത്തിലെ വിവിധ പരിപാടികളില് പങ്കെടുത്തതിന് പിന്നാലെ ആയിരുന്നു മുനീറിന് ശാരീരിക അവശത അനുഭവപ്പെട്ടത്.
ആഗോള അയ്യപ്പസംഗമം
നിർദേശങ്ങളോടെ അനുമതി നിൽകി ഹൈക്കോടതി. സാധാരണ അയ്യപ്പ ഭക്തർക്ക് ബുദ്ധിമുട്ടുണ്ടാകരുത്. സംഗമത്തിന് എത്തുന്ന പ്രതിനിധികൾക്ക് പ്രത്യേക പരിഗണന പാടില്ല
പമ്പയുടെ പരിശുദ്ധി സംരക്ഷിക്കണം
വരവ് ചെലവ് കണക്ക് സുതാര്യമാകണം
കണക്കുകളുടെ വിശദമായ റിപ്പോർട്ട് 45ദിവസത്തിനകം നൽകണം
ദേശീയപാതാ പ്രവൃത്തികള് വേഗത്തില് പൂര്ത്തീകരിക്കണം: മുഖ്യമന്ത്രി
സാങ്കേതിക കാര്യങ്ങളില് വിട്ടുവീഴ്ചയില്ലാതെ ദേശീയപാതാ പ്രവൃത്തികള് വേഗത്തില് പൂര്ത്തീകരിക്കാന് മുഖ്യമന്ത്രി പിണറായി വിജയന് നിര്ദ്ദേശിച്ചു. ദേശീയപാതയുമായി ബന്ധപ്പെട്ട് ചേര്ന്ന റിവ്യൂ യോഗത്തില് സംസാരിക്കുകയായിരുന്നു മുഖ്യമന്ത്രി.
ദേശീയപാതാ അതോറിറ്റി പൊതുവില് നല്ല പ്രവര്ത്തനമാണ് കാഴ്ചവെക്കുന്നതെങ്കിലും ചില മേഖലകളില് സ്തംഭനമുണ്ടെന്ന് മുഖ്യമന്ത്രി ചൂണ്ടിക്കാട്ടി. വടകര, തുറവൂര്, തിരുവനന്തപുരം ഉള്പ്പെടെ ചില സ്ഥലങ്ങളിലെങ്കിലും പ്രവൃത്തി മന്ദഗതിയിലാണ്. മെല്ലെപ്പോക്ക് നടത്തുന്ന കരാറുകാര്ക്കെതിരെ കര്ശന നടപടിയിലേക്ക് നീങ്ങണമെന്ന് മുഖ്യമന്ത്രി ദേശീയപാത അധികൃതരോട് ആവശ്യപ്പെട്ടു.
റഷ്യൻ സൈന്യത്തിൽ ചേരരുത്, അപകടം; മുന്നറിയിപ്പുമായി ഇന്ത്യ
റഷ്യൻ സൈന്യത്തിൽ ഇന്ത്യൻ പൗരന്മാരെ നിയമിക്കുന്നുവെന്ന വാർത്തകൾ പുറത്ത് വന്നതിന് പിന്നാലെ പൗരൻമാർക്ക് മുന്നറിയിപ്പുമായി വിദേശകാര്യമന്ത്രാലയം. സൈന്യത്തിൽ ചേരുന്നതിൽ പൗരൻമാർ വിട്ട് നിൽക്കണമെന്നും റഷ്യൻ സൈന്യത്തിലേക്കുള്ള ഇന്ത്യൻ പൗരന്മാരുടെ റിക്രൂട്ട്മെന്റ് ഉടൻ അവസാനിപ്പിക്കണമെന്നും വിദേശകാര്യ മന്ത്രാലയം (MEA) പ്രസ്താവനയിലൂടെ അറിയിച്ചു.
നിലവിൽ റഷ്യൻ സായുധസേനയിൽ സേവനം അനുഷ്ഠിക്കുന്ന എല്ലാ ഇന്ത്യക്കാരെയും മോചിപ്പിക്കണമെന്നും ഇന്ത്യ ആവശ്യപ്പെട്ടു. ഇന്ത്യക്കാരില് പലര്ക്കും യുക്രൈന് യുദ്ധത്തില് റഷ്യന് സൈന്യത്തിന്റെ ഭാഗമാകേണ്ടിവരുന്നുവെന്ന മാധ്യമവാർത്തകൾ പുറത്തുവന്നിരുന്നു.
ഐസകിന്റെ ഹൃദയവുമായി കൊച്ചിയിലേക്ക് പറന്ന് എയർ ആംബുലൻസ്
തിരുവനന്തപുരത്ത് സ്വകാര്യ ആശുപത്രിയിൽ മസ്തിഷ്ക മരണമടഞ്ഞ കൊല്ലം കൊട്ടാരക്കര സ്വദേശിയായ ഐസക് ജോര്ജിന്റെ (33) ഹൃദയം എറണാകുളത്ത് ഗുരുതരാവസ്ഥയിൽ ചികിത്സയിലുള്ള രോഗിക്ക് നല്കും. എറണാകുളത്ത് എത്രയും പെട്ടെന്ന് ഹൃദയം എത്തിക്കാനുള്ള നടപടി സ്വീകരിച്ചിട്ടുണ്ടെന്ന് ആരോഗ്യ മന്ത്രി വീണ ജോർജ് അറിയിച്ചു. മുഖ്യമന്ത്രിയുടെ നിർദ്ദേശപ്രകാരം ആഭ്യന്തരവകുപ്പിന്റെ ഹെലികോപ്റ്റർ ആണ് ഇതിനായി ഉപയോഗിക്കുന്നത്. റോഡ് മാർഗമുള്ള ഗതാഗതവും പോലീസ് ക്രമീകരിക്കുന്നുണ്ട്. കെ സോട്ടോയാണ് പ്രവർത്തനങ്ങൾ ഏകോപിപ്പിക്കുന്നത്. തീവ്ര ദുഃഖത്തിലും അവയവം ദാനം നൽകാൻ സന്നദ്ധരായ ബന്ധുക്കളെ നന്ദി അറിയിക്കുന്നു. അതോടൊപ്പം ആദരാഞ്ജലികൾ അർപ്പിക്കുകയും അദ്ദേഹത്തിന്റെ കുടുംബത്തിന്റെ ദുഃഖത്തിൽ പങ്കുചേരുകയും ചെയ്യുന്നുവെന്നും മന്ത്രി പറഞ്ഞു.
സ്വർണപ്പാളികൾ ഇപ്പോൾ തിരികെ കൊണ്ടുവരാൻ കഴിയില്ല; ദേവസ്വം ബോർഡ് പ്രസിഡന്റ്
ശബരിമല ശ്രീകോവിലിലെ അറ്റകുറ്റപ്പണിക്കായി അയച്ച സ്വർണപ്പാളികൾ ഇപ്പോൾ തിരികെ കൊണ്ടുവരാൻ കഴിയില്ലെന്ന് തിരുവിതാംകൂർ ദേവസ്വം ബോർഡ് പ്രസിഡന്റ് പി.എസ്. പ്രശാന്ത്. നാണയത്തുട്ടുകള് കൊണ്ട് സ്വര്ണപ്പാളികള്ക്ക് കേടുപാട് സംഭവിച്ചിട്ടുണ്ട്. രണ്ട് തന്ത്രിമാരും രേഖാമൂലം അത് മാറ്റണമെന്ന് ആവശ്യപ്പെട്ടു. അങ്ങനെ ബോര്ഡ് തീരുമാനമെടുത്തു.അറ്റകുറ്റപ്പണി രാസപ്രക്രിയയാണ്. അതിനാല് അതിന്റേതായ പ്രശ്നങ്ങളുണ്ട്. അത് ഇപ്പോള് തിരിച്ചുകൊണ്ടുവരല് അസാധ്യമായ കാര്യമാണ്. ഇക്കാര്യം കോടതിയെ അറിയിക്കുമെന്നും പുനഃപരിശോധന ഹർജി നൽകുമെന്നും അദ്ദേഹം പറഞ്ഞു.
താമരശ്ശേരി ചുരം മണ്ണിടിച്ചില്; എന്ഐടി വിദഗ്ധ സംഘം പരിശോധന നടത്തി
താമരശ്ശേരി ചുരം റോഡില് മണ്ണിടിച്ചിലുണ്ടായ സ്ഥലത്ത് ജില്ലാ കലക്ടര് സ്നേഹില് കുമാര് സിംഗിന്റെ നിര്ദേശപ്രകാരം എന്ഐടിയിലെ വിദഗ്ധ സംഘം പരിശോധന നടത്തി. എന്ഐടി സിവില് വിഭാഗം പ്രൊഫസര് സന്തോഷ് ജി തമ്പി, അസി. പ്രൊഫസര്മാരായ പ്രദീക് നേഗി, അനില്കുമാര്, റിസര്ച്ച് ഫെലോ മനു ജോര്ജ് എന്നിവരടങ്ങിയ സംഘമാണ് പരിശോധന നടത്തിയത്. മണ്ണിടിച്ചിലുണ്ടായ പ്രദേശത്തിന്റെയും സമീപ പ്രദേശങ്ങളുടെയും ദൃശ്യങ്ങള് ഡ്രോണ് ഉപയോഗിച്ചുള്ള റിയല് ടൈം കൈനമാറ്റിക് സര്വേയിലൂടെ സംഘം ശേഖരിച്ചു. ഇവ ഉപയോഗിച്ച് നിര്മിക്കുന്ന ത്രിമാന ദൃശ്യങ്ങളിലൂടെ ഭാവിയില് ഉണ്ടായേക്കാവുന്ന മണ്ണിടിച്ചില് സാധ്യത, ഭൂമിയുടെ സ്വഭാവം, ആഘാത സാധ്യത തുടങ്ങിയ കാര്യങ്ങള് കണ്ടെത്താന് സാധിക്കുമെന്ന് ഡോ. സന്തോഷ് ജി തമ്പി പറഞ്ഞു. ഇനിയും പാറ ഇടിയാനുള്ള സാധ്യത പരിശോധിക്കുന്നുണ്ട്. പ്രാഥമിക പരിശോധനാ റിപ്പോര്ട്ട് ജില്ലാ കലക്ടര്ക്ക് നല്കും. പരിശോധന വിവരങ്ങള് വിശകലനം ചെയ്ത ശേഷം ആവശ്യമെങ്കില് പ്രദേശത്ത് ജിപിആര് (ഗ്രൗണ്ട് പെനട്രേറ്റിങ് റഡാര്) പരിശോധന നടത്തുമെന്നും അദ്ദേഹം പറഞ്ഞു.
ഓഗസ്റ്റ് 26നാണ് താമരശ്ശേരി ചുരത്തിലെ ഒമ്പതാം വളവില് മണ്ണിടിച്ചിലുണ്ടായത്. തുടര്ന്ന് ദിവസങ്ങളോളം ചുരത്തിലൂടെയുള്ള ഗതാഗതത്തിന് നിയന്ത്രണം ഏര്പ്പെടുത്തിയിരുന്നു.
മൂകാംബികയിൽ വജ്ര കിരീടങ്ങളും സ്വര്ണവാളും സമര്പ്പിച്ച് ഇളയരാജ
മൂകാംബിക ക്ഷേത്രത്തില് എട്ടുകോടിയോളം രൂപയുടെ വജ്ര കിരീടങ്ങളും സ്വര്ണവാളും സമര്പ്പിച്ച് സംഗീത സംവിധായകൻ ഇളയരാജ. മൂകാംബിക ക്ഷേത്രത്തിലെ അര്ച്ചകന് കെഎന് സുബ്രഹ്മണ്യ അഡിഗയാണ് സമൂഹമാധ്യമത്തിലൂടെ ഇക്കാര്യം പങ്കുവച്ചത്. ബുധനാഴ്ച രാവിലെ കൊല്ലൂരിലെത്തിയ ഇളയരാജ ക്ഷേത്രദര്ശനം നടത്തിയശേഷം മടങ്ങി.
മോഹൻ ഭാഗവതിന് പിറന്നാൾ ആശംസ നേർന്ന് മോദി
ആർഎസ്എസ് മേധാവി മോഹൻ ഭാഗവതിന് 75-ാം പിറന്നാൾ ആശംസകൾ നേർന്ന് പ്രധാനമന്ത്രി നരേന്ദ്ര മോദി. സമൂഹത്തിന്റെ പരിവർത്തനത്തിനും സൗഹാർദത്തിൻ്റെയും സാഹോദര്യത്തിൻ്റെയും മനോഭാവം ശക്തിപ്പെടുത്തുന്നതിനും ജീവിതം ഉഴിഞ്ഞുവെച്ച നേതാവാണ് ഭാഗവതെന്ന് പ്രധാനമന്ത്രി അഭിപ്രായപ്പെട്ടു. ലോകം ഒരു കുടുംബമാണെന്ന 'വസുധൈവ കുടുംബകം' എന്ന തത്വത്തിൻ്റെ ഉത്തമ മാതൃകയാണ് മോഹൻ ഭാഗവതെന്ന് പ്രധാനമന്ത്രി മോദി പറഞ്ഞു. രാജ്യസേവനത്തിനായി അദ്ദേഹത്തിന് ദീർഘായുസ്സും ആരോഗ്യവും നേരുന്നതായും പ്രധാനമന്ത്രി കൂട്ടിച്ചേർത്തു.
അമീബിക് മസ്തിഷ്ക ജ്വരം ബാധിച്ച ഒരാള് കൂടി മരിച്ചു
അമീബിക് മസ്തിഷ്ക ജ്വരം ബാധിച്ച ഒരാള് കൂടി മരിച്ചു. മലപ്പുറം ചേലമ്പ്ര സ്വദേശി ഷാജിയാണ് (51) മരിച്ചത്. കോഴിക്കോട് മെഡിക്കൽ കോളേജിൽ ചികിത്സയിലിരിക്കെയാണ് മരണം. ഇദ്ദേഹത്തിന് എവിടെ നിന്നാണ് രോഗം ബാധിച്ചതെന്ന് വ്യക്തമല്ല. നിലവിൽ 10 പേരാണ് അമീബിക് മസ്തിഷ്കജ്വരം ബാധിച്ച് ചികിത്സയിൽ കഴയുന്നത്. ഷാജിയുടെ മരണത്തോടെ കഴിഞ്ഞ ഒരു മാസത്തിനിടെ രോഗം ബാധിച്ച് മരിച്ചവരുടെ എണ്ണം 6 ആയി.
ഖത്തർ ആക്രമണം; തീരുമാനം ബുദ്ധിപരമായിരുന്നില്ലെന്ന് ട്രംപിന്റെ വിമർശനം
ഹമാസിനെ ലക്ഷ്യം വെച്ചുള്ള ഖത്തർ ആക്രമണം ബുദ്ധിപരമായ തീരുമാനം ആയിരിക്കില്ലെന്ന് ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവിനെ യുഎസ് പ്രസിഡന്റ് ഡൊണാൾഡ് ട്രംപ് അറിയിച്ചതായി വാൾസ്ട്രീറ്റ് ജേണൽ. മുതിർന്ന ഭരണകൂട ഉദ്യോഗസ്ഥരെ ഉദ്ധരിച്ചുകൊണ്ടുള്ളതാണ് റിപ്പോർട്ട്. ആക്രമണം നടത്താൻ തനിക്ക് കുറഞ്ഞ സമയം മാത്രമേ ഉണ്ടായിരുന്നുള്ളൂവെന്നും ആ അവസരം ഉപയോഗിക്കുകയായിരുന്നുവെന്നും നെതന്യാഹു മറുപടി നൽകിയതായി റിപ്പോർട്ടിൽ പറയുന്നു. അതേസമയം പിന്നീട് നടത്തിയ സംഭാഷണത്തിൽ ആക്രമണത്തെ കുറിച്ച് ട്രംപ് കൂടുതൽ ചോദിച്ചറിഞ്ഞതായും റിപ്പോർട്ടിൽ ഉണ്ട്.
നേപ്പാളിലെ മലയാളി ടൂറിസ്റ്റുകളുടെ സുരക്ഷ ഉറപ്പാക്കണം: കേന്ദ്ര വിദേശകാര്യമന്ത്രിക്ക് മുഖ്യമന്ത്രി കത്തയച്ചു
നേപ്പാളിലെ മലയാളി ടൂറിസ്റ്റുകളുടെ സുരക്ഷ ഉറപ്പാക്കണമെന്ന് ആവശ്യപ്പെട്ട് മുഖ്യമന്ത്രി പിണറായി വിജയൻ കേന്ദ്ര വിദേശകാര്യമന്ത്രി എസ് ജയശങ്കറിന് കത്തയച്ചു. നേപ്പാളിലെ പൊഖ്റയിൽ വിനോദ സഞ്ചാരത്തിനായി എത്തിയ പ്രായമായവർ അടക്കമുള്ളവർ കുടുങ്ങി കിടക്കുകയാണ്.
നേപ്പാളിലെ പ്രക്ഷോഭത്തിന്റെ ഭാഗമായി അനിഷ്ടസംഭവങ്ങൾ അരങ്ങേറിയതിന് സമീപത്തായിട്ടാണ് ഇവർ താമസിക്കുന്നത്. അവർ വീണ്ടും അവിടെ തുടരുന്നത് അതീവ ദുഷ്കരമാണെന്നും ഇവരുടെ സുരക്ഷ ഉറപ്പുവരുത്തണമെന്നും മുഖ്യമന്ത്രി കത്തിലൂടെ അഭ്യർത്ഥിച്ചു.
കുടുങ്ങി കിടക്കുന്നവരെ അടിയന്തരമായി സുരക്ഷിതമായി നാട്ടിലെത്തിക്കുന്നതിനും യാത്രാ സൗകര്യം ഏർപ്പെടുത്തുന്നതിനും ഇടപെടണം. വിനോദ സഞ്ചാരികളെ നാട്ടിലെത്തിക്കുന്നതിന് കേന്ദ്ര സർക്കാരിന് കേരളത്തിന്റെ എല്ലാ പിന്തുണയും സഹകരണവും ഉണ്ടാവുമെന്നും മുഖ്യമന്ത്രി കത്തിൽ ചൂണ്ടിക്കാട്ടി.
ഇസ്രായേൽ ആക്രമണം; ഖത്തർ അമീറുമായി സംസാരിച്ച് പ്രധാനമന്ത്രി
ത്തർ അമീർ ഷെയ്ഖ് തമീം ബിൻ ഹമദ് അൽ-താനിയുമായി ടെലിഫോണിൽ സംസാരിച്ച് പ്രധാനമന്ത്രി നരേന്ദ്ര മോദി.ദോഹയിലുണ്ടായ സമീപകാല ആക്രമണങ്ങളിൽ ആശങ്ക അറിയിച്ചതായി മോദി എക്സിൽ കുറിച്ചു. 'സാഹോദര്യ രാജ്യമായ ഖത്തറിന്റെ പരമാധികാരം ലംഘിച്ചതിനെ ഇന്ത്യ അപലപിക്കുന്നു. ചർച്ചകളിലൂടെയും നയതന്ത്രത്തിലൂടെയും പ്രശ്നങ്ങൾ പരിഹരിക്കുന്നതിനെ ഞങ്ങൾ പിന്തുണയ്ക്കുന്നു. സംഘർഷം ഒഴിവാക്കണം. മേഖലയിലെ സമാധാനത്തിനും സ്ഥിരതയ്ക്കും ഇന്ത്യ ഉറച്ചുനിൽക്കുന്നു. എല്ലാ രൂപത്തിലുമുള്ള ഭീകരതയ്ക്കെതിരെയും ഞങ്ങൾ നിലകൊള്ളുന്നു', മോദി പോസ്റ്റിൽ പറഞ്ഞു.
കിർക്ക് "സത്യത്തിനുവേണ്ടി രക്തസാക്ഷിത്വം വരിച്ചയാൾ"; ട്രംപ്
ചാർലി കിർക്ക് "സത്യത്തിനുവേണ്ടി രക്തസാക്ഷിത്വം വരിച്ചയാൾ" എന്ന് ഡൊണാൾഡ് ട്രംപ്."തീവ്ര ഇടതുപക്ഷം" നടത്തിയ വിമർശനങ്ങൾ ഈ യാഥാസ്ഥിതിക പ്രവർത്തകന്റെ മരണത്തിന് കാരണമായെന്ന് ട്രംപ് ആരോപിച്ചു. രാഷ്ട്രീയപരമായ അക്രമങ്ങൾ ചെയ്യുന്നവർക്കെതിരെ കർശന നടപടി സ്വീകരിക്കുമെന്നും ട്രംപ് പറഞ്ഞു.ർഷങ്ങളായി, തീവ്ര ഇടതുപക്ഷക്കാർ ചാർലിയെപ്പോലുള്ള നല്ല അമേരിക്കക്കാരെ നാസികളോടും ലോകത്തിലെ ഏറ്റവും വലിയ കൊലപാതകികളോടും കുറ്റവാളികളോടും ഉപമിക്കുകയാണെന്നും ട്രംപ് കുറ്റപ്പെടുത്തി.
Click it and Unblock the Notifications
Sign in with Google