'ഈ സ്ഥലം ഞങ്ങളുടേത്, പലസ്തീൻ എന്നൊരു രാജ്യം ഉണ്ടാകില്ല'..ദോഹ ആക്രമണത്തെ ന്യായീകരിച്ചും നെതന്യാഹു

പലസ്തീൻ എന്ന രാജ്യം ഉണ്ടാകില്ലെന്ന് ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു. ആ പ്രദേശം ഞങ്ങളുടേതാണ്, പലസ്തീൻ രാജ്യം എന്നൊരു ആശയം യാഥാർത്ഥ്യമാകില്ലെന്നും നെതന്യാഹു പറഞ്ഞു. ജറുസലേമിന് കിഴക്കുള്ള ഇസ്രായേലി സെറ്റിൽമെന്റായ മാലെ അദുമിമിൽ നടന്ന ചടങ്ങിലായിരുന്നു നെതന്യാഹുവിന്റെ പ്രതികരണം.

' പലസ്തീൻ രാജ്യം ഉണ്ടാകില്ലെന്ന നമ്മുടെ വാഗ്ദാനം നാം നിറവേറ്റാൻ പോകുന്നു, ഈ സ്ഥലം നമുക്ക് അവകാശപ്പെട്ടതാണ്. നമ്മുടെ പാരമ്പര്യം, നമ്മുടെ ഭൂമി, നമ്മുടെ സുരക്ഷ എന്നിവ നാം സംരക്ഷിക്കും. ഈ നഗരത്തിലെ ജനസംഖ്യ നാം ഇരട്ടിയാക്കാൻ പോകുകയാണ്', പ്രസംഗത്തിൽ നെതന്യാഹു പറഞ്ഞു. അതിനിടെ ഇസ്രയേലിന്റെ ദോഹ ആക്രമണത്തെ 'സെപ്റ്റംബർ 11' ഭീകരാക്രമണവുമായി ബന്ധപ്പെടുത്തിയും നെതന്യാഹു ന്യായീകരിച്ചു. 2023 ഒക്ടോബർ ഏഴിനുണ്ടായ ഹമാസ് ആക്രമണം ഇസ്രയേലിനെ സംബന്ധിച്ച് '9/11' നിമിഷമായിരുന്നുവെന്നും അന്ന് യുഎസ് എന്തൊക്കെ ചെയ്തോ അത് മത്രമേ ഇപ്പോൾ ഇസ്രായേൽ ചെയ്യുന്നുള്ളൂവെന്നും നെതന്യാഹു പറഞ്ഞു.

മറ്റ് പ്രധാന വാർത്തകൾ കൂടി അറിയാം