മഴ തുടരുന്നു, കാര്‍ തിരിച്ച് കിട്ടാന്‍ ദുല്‍ഖര്‍ ഹൈക്കോടതിയില്‍, ബമ്പര്‍ നറുക്കെടുപ്പ് നാളെയില്ല

സംസ്ഥാനത്ത് മഴ തുടരും. തെക്കന്‍ കേരളത്തിലും മധ്യ കേരളത്തിലും മാത്രമല്ല നാളെ വടക്കന്‍ കേരളത്തിലും തീവ്ര മഴയ്ക്ക് സാധ്യതയുണ്ടെന്നാണ് മുന്നറിയിപ്പ്. ഇന്ന് തിരുവനനന്തപുരം ഉള്‍പ്പെടെ തെക്കന്‍ ജില്ലകളില്‍ മഴ വ്യാപകമായി വെള്ളക്കെട്ടുണ്ടാക്കി. മഴ മാത്രമല്ല ബമ്പറിന്റെ ഭാഗ്യം ആര്‍ക്കെന്ന കാത്തിരിപ്പും തുടരും. നാളെ നിശ്ചയിച്ചിരുന്ന ഓണം ബമ്പര്‍ നറുക്കെടുപ്പ് നീട്ടിവെച്ചു. ഒക്ടോബര്‍ നാലിനാണ് ബമ്പര്‍ ഭാഗ്യവാനെ കണ്ടെത്താനുള്ള നറുക്കെടുപ്പ്.

ജിഎസ്ടിയിലെ മാറ്റവും മഴ കാരണം വില്‍പന കുറഞ്ഞതും ഉന്നയിച്ച് ഏജന്റുമാര്‍ മുന്നോട്ട് വെച്ച അഭ്യര്‍ത്ഥന പരിഗണിച്ചാണ് നറുക്കെടുപ്പ് മാറ്റിവെച്ചത്. ഇതിനിടെ നവരാത്രി കണക്കിലെടുത്ത് ചൊവ്വാഴ്ച, സെപ്റ്റംബര്‍ 30ന് സര്‍ക്കാര്‍ സ്ഥാപനങ്ങള്‍ക്കും വിദ്യാഭ്യാസ സ്ഥാപനങ്ങള്‍ക്കും സര്‍ക്കാര്‍ അവധി പ്രഖ്യാപിച്ചു. ഇതോടെ തുടര്‍ച്ചയായി മൂന്ന് ദിവസം അവധി ദിവസങ്ങളായിരിക്കും.

ഇതിനിടെ ഓപ്പറേഷന്‍ നുംകൂറിന്റെ ഭാഗമായി കസ്റ്റംസ് പിടിച്ചെടുത്ത കാര്‍ വിട്ടുകിട്ടണമെന്ന് ആവശ്യപ്പെട്ട് ദുല്‍ഖര്‍ സല്‍മാന്‍ ഹൈക്കോടതിയെ സമീപിച്ചതും വാര്‍ത്തയായി.

ലഡാക് സംഘര്‍ഷത്തിന് പിന്നാലെ പരിസ്ഥിതി പ്രവര്‍ത്തകനായ സോനം വാങ്ചുക്കിനെ പൊലീസ് അറസ്റ്റ് ചെയ്ത് അജ്ഞാത കേന്ദ്രത്തിലേക്ക് മാറ്റി. സോനത്തിന്റെ എന്‍ജിഒയുടെ എഫ്‌സിആര്‍എ ലൈസന്‍സ് കേന്ദ്ര ആഭ്യന്തര മന്ത്രാലയം ഇന്നലെ റദ്ദാക്കിയിരുന്നു. പതിറ്റാണ്ടുകളായി ഇന്ത്യന്‍ വ്യോമസേനയുടെ ഭാഗമായി മിഗ് 21 വിമാനങ്ങളെ സര്‍വീസില്‍ നിന്ന് പിന്‍വലിച്ചു. ചണ്ഡീഗഡില്‍ വിപുലമായ ചടങ്ങുകളോടെയാണ് മിഗ് 21ന് വ്യോമസേനയും രാജ്യവും വിട നല്‍കിയത്. തേജസ് വിമാനങ്ങളാണ് മിഗ് വിമാനങ്ങള്‍ക്ക് പകരമെത്തുക.

അടുത്ത മാസം ഒന്നു മുതല്‍ ബ്രാന്‍ഡഡ്, പേറ്റന്റ് നേടിയ ഫാര്‍മസ്യൂട്ടിക്കല്‍ ഉല്‍പ്പന്നങ്ങള്‍ക്ക് 100 ശതമാനം വരെ തീരുവ ചുമത്തുമെന്ന് യുഎസ് പ്രസിഡന്റ് ഡൊണാള്‍ഡ് ട്രംപ് അറിയിച്ചത് തീരുവ യുദ്ധത്തിന്റെ അടുത്ത ഘട്ട പ്രഖ്യാപനമായി. അമേരിക്കയില്‍ ഫാക്ടറി സ്ഥാപിച്ച് മരുന്നുല്‍പാദനം നടത്തുന്ന കമ്പനികള്‍ക്ക് ഈ തീരുവ ബാധകമല്ലെന്നും ട്രംപ് അറിയിച്ചിട്ടുണ്ട്. അമേരിക്കയിലേക്ക് ഏറ്റവും കൂടുതല്‍ മരുന്ന് എത്തിക്കുന്ന ഇന്ത്യക്കാണ് പുതിയ തീരുമാനം ഏറ്റവും തിരിച്ചടിയാവുക.