ഇന്ത്യക്കെതിരെ തീരുവ ചുമത്തിയത് റഷ്യ-യുക്രൈൻ യുദ്ധം അവസാനിപ്പിക്കാൻ; ട്രംപ്, മറ്റ് പ്രധാന വാർത്തകൾ
താരിഫ് നയങ്ങൾ നിയമവിരുദ്ധമാണെന്ന് വിധിച്ച ഫെഡറൽ അപ്പീൽ കോടതി വിധി ചോദ്യം ചെയ്ത് സുപ്രീം കോടതിയെ സമീപിച്ച് ട്രംപ് ഭരണകുടം. യുക്രെയ്നിൽ സമാധാനം ഉറപ്പാക്കുന്നതിനുള്ള തങ്ങളുടെ ശ്രമങ്ങളുടെ ഭാഗമായാണ് വിദേശ രാജ്യങ്ങൾക്ക് മേൽ നികുതി ചുമത്തിയത് എന്നാണ് ട്രംപിന്റെ വാദം. റഷ്യ-യുക്രൈന് യുദ്ധം അവസാനിപ്പിക്കാനുള്ള നിര്ണായകശ്രമങ്ങളുടെ ഭാഗമായാണ് ഇന്ത്യയ്ക്കുമേല് തീരുവ ചുമത്തിയതെന്നും അപ്പീലിൽ പറയുന്നു. റഷ്യൻ എണ്ണ വാങ്ങുന്നത് തുടർന്നാൽ ഇന്ത്യയ്ക്ക് മേൽ കൂടുതൽ നികുതി ചുമത്തുമെന്ന ട്രംപിന്റെ ഭീഷണിക്കിടെയാണ് തങ്ങളുടെ നടപടിയെ ന്യായീകരിച്ച് കൊണ്ടുള്ള യുഎസ് ഭരണകുടത്തിന്റെ നീക്കം.
അതിനിടെ ഇന്ത്യയോടും ചൈനയോടും ഭീഷണി വേണ്ടെന്ന് യുഎസിന് മുന്നറിയിപ്പ് നൽകിയിരിക്കുകയാണ് റഷ്യ. കോളനി ഭരണമൊക്കെ കഴിഞ്ഞുവെന്നും മറ്റ് രാജ്യങ്ങൾക്ക് മേൽ തിട്ടൂരമിറക്കുന്നത് അംഗീകരിക്കാൻ സാധിക്കില്ലെന്നും റഷ്യൻ പ്രസിഡന്റ് വ്ളാഡിമർ പുടിൻ പറഞ്ഞു. ഇന്നത്തെ മറ്റ് പ്രധാന വാർത്തകൾ കൂടി അറിയാം
വന്ദേഭാരത് സ്ലീപ്പര് ട്രെയിന് ഒരു മാസത്തിനകം ഓടിത്തുടങ്ങും. ദീപാവലി സമ്മാനമായി ഡല്ഹിയില് നിന്ന് പ്രയാഗ്രാജ് വഴി പാട്നയിലേക്കായിരിക്കും ആദ്യ ട്രെയിന് ഓടിക്കുക.
കേരളത്തില് അടുത്ത ഘട്ടത്തിലാകും വന്ദേഭാരത് സ്ലീപ്പര് എത്തുക. തിരുവനന്തപുരം-ബെംഗളൂരു, തിരുവനന്തപുരം- മംഗളൂരു റൂട്ടുകളാണ് പരിഗണനയില് ഉള്ളത്.
അമേരിക്കയുടെ അധിക തീരുവ പ്രഹരം മറികടക്കാന് ഇന്ത്യയില് നിന്നുള്ള കയറ്റുമതിക്കാര്ക്ക് സമാശ്വാസ പാക്കേജ് കൊണ്ടുവരുമെന്ന് കേന്ദ്ര ധനമന്ത്രി നിര്മല സീതാരാമന്. പാക്കേജിന് അന്തിമ രൂപം നല്കുന്ന പ്രവര്ത്തനങ്ങളിലാണ് ധനമന്ത്രാലയമെന്നും അവര് വ്യക്തമാക്കി. ഇന്ത്യയില് നിന്നുള്ള ഉല്പ്പന്നങ്ങള്ക്ക് മേല് 25 ശതമാനം അധിക തീരുവ ഉള്പ്പെടെ 50 ശതമാനം തീരുവയാണ് യുഎസ് പ്രസിഡന്റ് ഡോണാള്ഡ് ട്രംപ് പ്രഖ്യാപിച്ചത്.
ബോളിവുഡ് നടി ശില്പ ഷെട്ടിക്കും ഭര്ത്താവ് രാജ് കുന്ദ്രക്കുമെതിരെ ലുക്ക്ഔട്ട് നോട്ടീസ് പുറപ്പെടുവിച്ച് മുംബൈ പൊലീസ്. കോടിക്കണക്കിന് രൂപയുടെ തട്ടിപ്പ് കേസില് പ്രതികളായതിനെ തുടര്ന്നാണ് നടപടി. തങ്ങളുടെ ഉടമസ്ഥതയിലുള്ള ബെസ്റ്റ് ഡീല് ടിവി പ്രൈവറ്റ് ലിമിറ്റഡ് എന്ന കമ്പനിയുടെ നിക്ഷേപവുമായി ബന്ധപ്പെട്ട് വ്യവസായിയില് നിന്ന് 60 കോടി രൂപ തട്ടിച്ചെന്നാണ് ആരോപണം.
ചൈനീസ് ബന്ധത്തിന്റെ പേരില് ഇന്ത്യയേയും റഷ്യയേയും പരിഹസിച്ച് അമേരിക്കന് പ്രസഡന്റ് ഡൊണാള്ഡ് ട്രംപ്. ഇന്ത്യയും റഷ്യയും 'കൂടുതൽ ഇരുണ്ട' ചൈനയിലേക്ക് പോയെന്ന് അദ്ദേഹം തന്റെ സ്വന്തം സോഷ്യല് മീഡിയ പ്ലാറ്റ് ഫോമായ ട്രൂത്ത് സോഷ്യലില് കുറിച്ചു. ചൈനയിലെ ടിയാൻജിനിൽ നടന്ന ഷാങ്ഹായ് കോർപ്പറേഷൻ ഓർഗനൈസേഷൻ (എസ്സിഒ) ഉച്ചകോടിയിൽ നരേന്ദ്ര മോദി, പുടിന്, ഷീ ജിന്പിങ് എന്നിവരുടെ ഫോട്ടോ പങ്കുവെച്ചുകൊണ്ടാണ് ട്രംപിന്റെ പരിഹാസം.
കുന്നംകുളം പൊലീസ് സ്റ്റേഷനിലെ മർദ്ദനത്തില് ഉദ്യോഗസ്ഥര്ക്കെതിരെ നടപടി സ്വീകരിച്ചതിലും ഒത്തുകളിയെന്ന് ആരോപണം. കോടതി പ്രതിചേര്ത്ത സിപിഒ ശശിധരനെതിരെ പൊലീസ് അച്ചടക്ക നടപടി സ്വീകരിച്ചില്ല. സുജിത്ത് വിഎസിനെ ശശിധരന് മര്ദ്ദിക്കുന്നത് ദൃശ്യങ്ങളില് ഇല്ലെന്ന പേരിലായിരുന്നു നടപടി ഒഴിവാക്കിയത്.
ചൈന സൈനിക പരേഡ് ഒരുക്കിയത് ഞാൻ കാണുന്നുണ്ടെന്ന പ്രതീക്ഷയിൽ; ട്രംപ്
ചൈനയുടെ സൈനിക പരേഡ് തന്നെ ആകർഷിക്കാൻ ശ്രദ്ധാപൂർവ്വം ഒരുക്കിയ ഒരു കാഴ്ച്ച മാത്രമായിരുന്നുവെന്ന് യുഎസ് പ്രസിഡൻ്റ് ഡൊണാൾഡ് ട്രംപ് . 'വളരെ ഗംഭീരമായ പരിപാടിയായിരുന്നു. നന്നായി ആകർഷിച്ചു. ഞാൻ അത് കാണുന്നുണ്ടെന്ന പ്രതീക്ഷയിലാണ് അവർ അത് ചെയ്തത്', ട്രംപ് പറഞ്ഞു.
ബിഹാറിനെ കുറിച്ചുള്ള കോൺഗ്രസ് പോസ്റ്റ് വിവാദത്തിൽ; പിന്നാലെ പിൻവലിച്ചു
കോൺഗ്രസിനെ കുറിച്ചുള്ള കോൺഗ്രസിന്റെ കേരള ഘടകത്തിൽ സോഷ്യൽ മീഡിയ പോസ്റ്റ് വിവാദത്തിൽ. ബീഡിയും ബിഹാറും 'ബി'യിലാണ് തുടങ്ങുന്നത്, അതിനെ ഇനി പാപമായി കണക്കാക്കാനാവില്ല' എന്ന പോസ്റ്റാണ് വിവാദമായത്.ബിഹാറിനെ അപമാനിക്കുന്നതാണ് പോസ്റ്റെന്ന് ബിജെപി വിമർശിച്ചു. വിവാദമായോതോടെ കോണ്ഗ്രസ് പോസ്റ്റ് പിൻവലിച്ചു.
സോഷ്യൽ മീഡിയാ പ്ലാറ്റ്ഫോമുകൾക്ക് നിരോധനം ഏർപ്പെടുത്തി നേപ്പാൾ
നേപ്പാളിൽ പ്രമുഖ സോഷ്യൽ മീഡിയാ പ്ലാറ്റ്ഫോമുകൾക്ക് നിരോധനം ഏർപ്പെടുത്തി. ഫേസ്ബുക്ക്, യൂട്യൂബ്, ഇൻസ്റ്റാഗ്രാം, എക്സ് (മുമ്പ് ട്വിറ്റർ), ലിങ്ക്ഡ്ഇൻ, റെഡിറ്റ്, വാട്ട്സ്ആപ്പ്, സ്നാപ്ചാറ്റ് എന്നിവയുൾപ്പെടെ 26 പ്രധാന സോഷ്യൽ മീഡിയ, ആശയവിനിമയ പ്ലാറ്റ്ഫോമുകൾക്ക് വിലക്കേർപ്പെടുത്താൻ ഇൻ്റർനെറ്റ് സേവന ദാതാക്കൾക്ക് നേപ്പാൾ സർക്കാർ നിർദ്ദേശം നൽകി. സർക്കാർ നിശ്ചയിച്ച ഏഴു ദിവസത്തെ സമയപരിധിക്കുള്ളിൽ ഈ കമ്പനികൾ രജിസ്റ്റർ ചെയ്യുന്നതിൽ പരാജയപ്പെട്ടതിനെ തുടർന്നാണ് ഈ തീരുമാനം. രാജ്യത്ത് പ്രവർത്തിക്കുന്ന എല്ലാ ആഭ്യന്തര, വിദേശ ഓൺലൈൻ പ്ലാറ്റ്ഫോമുകളും അധികാരികളിൽ രജിസ്റ്റർ ചെയ്യണമെന്നും അനാവശ്യ ഉള്ളടക്കങ്ങൾ നിരീക്ഷിക്കണമെന്നും ആവശ്യപ്പെട്ടുകൊണ്ടുള്ള സുപ്രീം കോടതിയുടെ ഉത്തരവിനെ തുടർന്നാണ് സോഷ്യൽ മീഡിയ പ്ലാറ്റ്ഫോമുകൾക്ക് നിരോധനം ഏർപ്പെടുത്തിയത്.
ധർമ്മസ്ഥല വ്യാജ വെളിപ്പെടുത്തൽ: ലോറി ഉടമ മനാഫിന് നോട്ടീസ്
ധർമ്മസ്ഥല വ്യാജ വെളിപ്പെടുത്തൽ കേസുമായി ബന്ധപ്പെട്ട് ലോറി ഉടമയും യൂട്യൂബറുമായ മനാഫിന് നോട്ടീസ് അയച്ച് അന്വേഷണ സംഘം. ബലാത്സംഗത്തിന് ഇരയായി കൊല്ലപ്പെട്ട നിരവധി സ്ത്രീകളുടെ മൃതദേഹം ധർമ്മസ്ഥലയിൽ കുഴിച്ചിട്ടിട്ടുണ്ടെന്ന് മനാഫ് വീഡിയോയിലൂടെ അവകാശപ്പെട്ടിരുന്നു. ഈ സാഹചര്യത്തിലാണ് ചോദ്യം ചെയ്യാനായി വിളിപ്പിച്ചത്.
രാഹുൽ മാങ്കൂട്ടത്തിലിനെതിരായ കേസ്; അന്വേഷണ സംഘം ബാംഗ്ലൂരിലേക്ക്
യൂത്ത് കോണ്ഗ്രസ് മുന് സംസ്ഥാന അധ്യക്ഷനും പാലക്കാട് എംഎല്എയുമായ രാഹുല് മാങ്കൂട്ടത്തിനെതിരെയുള്ള ലൈംഗിക ആരോപണ കേസിൽ തെളിവ് തേടി അന്വേഷണ സംഘം ബാംഗ്ലൂരിലേക്ക്. യുവതികളിലൊരാൾ ബാംഗ്ലൂരിൽ വെച്ചാണ് ഗർഭഛിദ്രം നടത്തിയതെന്ന് അന്വേഷണ സംഘം കണ്ടെത്തിയിരുന്നു.ആശുപത്രി രേഖകള് പരിശോധിച്ച് യുവതി ചികില്സ തേടിയ കാര്യം നേരിട്ട് സ്ഥിരീകരിക്കാനാണ് സംഘം തിരിക്കുന്നത്.
ട്രംപിനെതിരെ മുൻ യുഎസ് സുരക്ഷ ഉപദേഷ്ടാവ്
ട്രംപിനെ വിമർശിച്ച് മുൻ യുഎസ് ദേശീയ സുരക്ഷാ ഉപദേഷ്ടാവ് ജോൺ ബോൾട്ടൺ. ട്രംപിന് പ്രധാനമന്ത്രി നരേന്ദ്ര മോദിയുമായി വ്യക്തിപരമായ മികച്ച ബന്ധമുണ്ടായിരുന്നെങ്കിലും അത് ഇപ്പോൾ ഇല്ലാതായെന്ന് അദ്ദേഹം പറഞ്ഞു. ട്രംപ് അന്താരാഷ്ട്ര ബന്ധങ്ങളെ തൻ്റെ വ്യക്തിപരമായ സൗഹൃദങ്ങളുമായി കൂട്ടിക്കുഴയ്ക്കുകയാണ്. വ്ലാഡിമിർ പുടിനുമായി നല്ല ബന്ധമുണ്ടെങ്കിൽ അമേരിക്കയ്ക്ക് റഷ്യയുമായി നല്ല ബന്ധമുണ്ടെന്നാണ് ട്രംപ് കരുതുന്നത്. എന്നാൽ ഇത് ശരിയല്ല, അദ്ദേഹം പറഞ്ഞു.
പുതുനഗരം സ്ഫോടനത്തിൽ എസ് ഡി പി ഐക്കെതിരെ ബിജെപി
പാലക്കാട് പുതുനഗരം സ്ഫോടനത്തിൽ എസ് ഡി പി ഐക്കെതിരെ ബിജെപി നേതാവ് സി കൃഷ്ണകുമാർ. സ്ഫോടനം നടന്നത് എസ്ഡിപിഐ സ്വാധീന മേഖലയിലാണെന്ും സ്ഫോടനം നടന്ന വീട്ടിലെ മൂന്നുപേരും സജീവ എസ്ഡിപിഐ പ്രവർത്തകരാണെന്നും കൃഷ്ണകുമാർ പറഞ്ഞു. നേരത്തെയും പ്രദേശത്ത് സ്ഫോടനം നടന്ന് പശുവിന് പരിക്കേറ്റിരുന്നു. അന്നുതന്നെ തങ്ങൾ വിശദമായ അന്വേഷണം ആവശ്യപ്പെട്ടിരുന്നുവെന്നും കൃഷ്ണകുമാർ പറഞ്ഞു.
സർവകാല റെക്കോർഡുകൾ തിരുത്തി സപ്ലൈകോയുടെ ഓണ വിൽപന
ചരിത്രം സൃഷ്ടിച്ച് ഈ ഓണക്കാലത്തെ സപ്ലൈകോയുടെ വിൽപന. ഉത്രാട ദിനത്തിൽ ഉച്ചവരെ 55.21 ലക്ഷം ഉപഭോക്താക്കളാണ് സപ്ലൈകോ സ്റ്റോറുകൾ സന്ദർശിച്ചത്. ഓണക്കാല വിൽപന 375 കോടി രൂപ കടന്നതായി സപ്ലൈകോ അറിയിച്ചു. ഇതിൽ 175 കോടി രൂപ സബ്സിഡി സാധനങ്ങളുടെ വിൽപനയിലൂടെയാണ്. സപ്ലൈകോയുടെ ചരിത്രത്തിലെ ഏറ്റവും വലിയ പ്രതിദിന വിറ്റുവരവായ 15.37 കോടിയെ ഭേദിച്ച് 15.7 കോടിയിൽ വിൽപന എത്തിയത് ഓഗസ്റ്റ് 27 നായിരുന്നു. ഓഗസ്റ്റ് മാസം അവസാന വാരം തൊട്ട് പ്രതിദിന വിൽപന റെക്കോർഡുകൾ ഭേദിച്ചു. ഓഗസ്റ്റ് 29 ന് വിൽപന 17.91 കോടിയും 30ന് 19.4 കോടിയും സെപ്റ്റംബർ 1ന് 22.2 കോടിയും 2ന് 24.99 കോടിയും 3 ന് 24.22 കോടിയും കടന്നു.
റഷ്യൻ യുദ്ധം അവസാനിപ്പിക്കാൻ ഇന്ത്യ ഇടപെടണം; ഇയു
പ്രധാനമന്ത്രി നരേന്ദ്ര മോദിയുമായി ഫോണിൽ സംസാരിച്ചത് യൂറോപ്യൻ കമ്മീഷൻ പ്രസിഡന്റ് ഉർസുല വോൺ ഡെർ ലെയ്നും യൂറോപ്യൻ കൗൺസിൽ പ്രസിഡന്റ് അന്റോണിയോ കോസ്റ്റയും. യുക്രൈൻ സംഘർഷം പരിഹരിക്കുന്നതിൽ ഇന്ത്യക്ക് നിർണായക പങ്കുണ്ടെന്ന് വോൺ ഡെർ ലെയ്ൻ പറഞ്ഞു. യുക്രൈൻ യുദ്ധം ആഗോള സുരക്ഷയെ ബാധിക്കുന്നുണ്ട്, സാമ്പത്തിക അസ്ഥിരതയ്ക്ക് വഴിവെക്കുന്നു, ലോകത്തിന് മുഴുവൻ ഭീഷണിയാണ്. അതിനാൽ യുദ്ധം അവസാനിപ്പിക്കേണ്ടത് പ്രധാനമാണ്', അവർ കൂട്ടിച്ചേർത്തു.
Click it and Unblock the Notifications
Sign in with Google