മലയാളി മെഡിക്കല് വിദ്യാര്ത്ഥിനി കോയമ്പത്തൂരില് ആത്മഹത്യ ചെയ്തു
കോയമ്പത്തൂര്/കൊച്ചി: മെഡിക്കല് വിദ്യാര്ത്ഥിനി കെട്ടിടത്തിന്റെ മുകളില് നിന്ന് ചാടി ആത്മഹത്യ ചെയ്തതായി റിപ്പോര്ട്ട്. കോയമ്പത്തൂരിലെ പിഎസ്ജി ഇന്സ്റ്റിറ്റ്യൂട്ട് ഓഫ് മെഡിക്കല് സയന്സസ് ആന്റ് റിസെര്ച്ച് സെന്ററിലെ മെഡിക്കല് പിജി വിദ്യാര്ത്ഥിനിയായ ലക്ഷ്മി ആണ് മരിച്ചത്. 26 വയസ്സായിരുന്നു.
കൊച്ചി സ്വദേശിയാണ് ലക്ഷ്മി. മെഡിക്കല് പിജി ഒന്നാം വര്ഷ വിദ്യാര്ത്ഥിനി ആയിരുന്നു. കോളേജ് കെട്ടിടത്തിന്റെ അഞ്ചാം നിലയില് നിന്ന് താഴേയ്ക്ക് ചാടിയ നിലയിലാണ് ലക്ഷ്മിയെ കണ്ടെത്തിയത്. ജൂലായ് 19 ചൊല്ലാഴ്ച രാവിലെ 11 മണിയോടെയാണ് സംഭവം. ഗുരുതരമായി പരിക്കേറ്റ ലക്ഷ്മിയ്ക്ക് ഉടന് തന്നെ അടിയന്തര വൈദ്യസഹായം ലഭ്യമാക്കിയെങ്കിലും ജീവന് രക്ഷിയ്ക്കാനായില്ല.
കോളേജിലെ ഒരു പ്രൊഫസര് കഴിഞ്ഞ ദിവസം ലക്ഷ്മിയെ ദേഷ്യപ്പെട്ടിരുന്നു എന്നും ഇതാണ് ആത്മഹത്യക്ക് കാരണം എന്നും ചില റിപ്പോര്ട്ടുകളുണ്ട്. എന്നാല് കോളേജ് അധികൃതര് ഇക്കാര്യം നിഷേധിച്ചു. അമ്മയുടെ രോഗങ്ങള് ലക്ഷ്മിയെ അലട്ടിയിരുന്നു എന്നാണ് മറ്റൊരു റിപ്പോര്ട്ട്. ഇതുകാരണം പഠനത്തിലും കാര്യമായി ശ്രദ്ധിയ്ക്കാന് കഴിഞ്ഞിരുന്നില്ലത്രെ.
കൊല്ലത്തെ അമൃത ഇന്സ്റ്റിറ്റിയൂട്ടില് നിന്നാണ് ലക്ഷ്മി എംബിബിഎസ് പൂര്ത്തിയാക്കിയത്. പിഎസ്ജിയില് ഉപരിപഠനത്തിന് ചേര്ന്നിട്ട് നാല്പത് ദിവസമേ ആയിട്ടുള്ളു.