രമേഷ് പിഷാരടിയുടെ പിറന്നാള്‍ ഫ്രെയിമില്‍ കൈയടിച്ച് മമ്മൂട്ടിയും കുഞ്ചാക്കോ ബോബനും; വൈറലായി ചിത്രങ്ങള്‍

മിമിക്രിയിലൂടെയും സ്റ്റേജ് ഷോകളിലൂടെയും വളര്‍ന്നുവന്ന് ചലച്ചിത്ര മേഖലയില്‍ തന്റേതായ സ്ഥാനം ഉറപ്പിച്ച കലാകാരനാണ് രമേഷ് പിഷാരടി. നടനും സംവിധായകനുമായി മലയാള സിനിമയില്‍ വര്‍ഷങ്ങളായി നിലനില്‍ക്കുന്ന പിഷാരടിയുടെ പിറന്നാളായിരുന്നു കഴിഞ്ഞ ഒക്ടോബര്‍ ഒന്നിന്. അന്ന് നിരവധി പേരാണ് പിഷാരടിക്ക് ആശംസകള്‍ അര്‍പ്പിച്ചത്. സ്വന്തം ആധാര്‍ കാര്‍ഡ് സമൂഹ മാധ്യമത്തില്‍ പങ്കുവെച്ചായിരുന്നു പിറന്നാള്‍ ആശംസിച്ചവര്‍ക്ക് പിഷാരടി നന്ദി പറഞ്ഞത്.

അതേസമയം, ആധാര്‍ കാര്‍ഡിലെ പ്രായം വെളിപ്പെടുത്തുന്ന ഭാഗം മറച്ചുവെച്ചാണ് ഫേസ്ബുക്കില്‍ രമേഷ് പിഷാരടി തിരിച്ചറിയല്‍ രേഖ പങ്കുവെച്ചത്. എന്നാല്‍ താരത്തിന്റെ ലക്ഷക്കണക്കിന് ഫോളോവേഴ്‌സ് പ്രായം എത്രയാണെന്ന് കണ്ടെത്തുകയും ചെയ്തു. 1981 ല്‍ ജനിച്ച പിഷാരടിക്ക് കഴിഞ്ഞ ഒക്ടോബര്‍ ഒന്നിന് 44 വയസ് പൂര്‍ത്തിയായി. ഇക്കാര്യം പല ഫോളോവേഴ്‌സും കമന്റ് ബോക്‌സിലൂടെ വെളിപ്പെടുത്തുന്നുണ്ട്. പിറന്നാള്‍ ദിനത്തില്‍ ആധാര്‍ കാര്‍ഡിന്റെ ഫോട്ടോ പങ്കുവയ്ക്കാന്‍ കാണിച്ച പിഷാരടിയുടെ ധൈര്യത്തെ പലരും തമാശരൂപേണ അഭിനന്ദിക്കുകയും ചെയ്തു.

ഇപ്പോഴിതാ പിറന്നാള്‍ ദിനത്തിന്റെ പത്താം നാളില്‍ പിറന്നാളാഘോഷത്തിന്റെ ചിത്രങ്ങളാണ് രമേഷ് പിഷാരടി പങ്കുവെച്ചിരിക്കുന്നത്. മലയാള സിനിമയിലെ മനോഹരമായ സൗഹൃദത്തെ അടയാളപ്പെടുത്തുന്ന മൂന്നു ചിത്രങ്ങളാണ് പിഷാരടി പങ്കുവെച്ചിരിക്കുന്നത്. പിറന്നാള്‍ കേക്ക് മുറിക്കുന്ന ചിത്രങ്ങളില്‍ പിഷാരടിയുടെ ഒപ്പമുള്ളത് മെഗാസ്റ്റാര്‍ മമ്മൂട്ടിയും കുഞ്ചാക്കോ ബോബനുമാണ്. എല്ലാവരും ചേര്‍ന്ന് ബര്‍ത്ത്‌ഡേ കളറായി ആഘോഷിക്കുന്ന ചിത്രങ്ങളാണ് പിഷാരടി ഫേസ്ബുക്കില്‍ പങ്കുവെച്ചത്.

മമ്മൂക്കയും കുഞ്ചാക്കോ ബോബനുമായുള്ള പിഷാരടിയുടെ അടുത്ത സൗഹൃദം മലയാള സിനിമയിലും ആരാധകര്‍ക്കിടയിലും ഏറെ പ്രശസ്തമാണ്. മമ്മൂട്ടിയുമായുള്ള അടുപ്പത്തിന്റെ പേരില്‍ നിരവധി വിമര്‍ശനങ്ങളും പിഷാരടി കേട്ടിട്ടുണ്ട്. 'മമ്മൂട്ടിയുടെ പിന്നാലെ നടക്കുന്നു' എന്ന രീതിയിലാണ് പല വിമര്‍ശനങ്ങളും ഉയര്‍ന്നിട്ടുള്ളത്. എന്നാല്‍ ഇതൊന്നും ഇരുവരും തമ്മിലുള്ള സൗഹൃദത്തെ ബാധിച്ചിട്ടില്ല.

ഇപ്പോള്‍, സിനിമയില്‍ നിന്ന് ചെറിയ ഒരിടവേള എടുത്ത മമ്മൂട്ടി, രോഗത്തില്‍ നിന്നും പൂര്‍ണമായി മുക്തി നേടി സിനിമകളില്‍ വീണ്ടും സജീവമായിരിക്കുകയാണ്. ഈ അവസരത്തിലാണ് രമേഷ് പിഷാരടിയുടെ പിറന്നാള്‍ ചിത്രങ്ങളും വൈറലാകുന്നത്. പിഷാരടി കേക്ക് മുറിക്കുമ്പോള്‍ ഏറെ സന്തോഷത്തോടെ കയ്യടിക്കുന്ന മമ്മൂട്ടിയെ ചിത്രത്തില്‍ കാണാം. പിഷാരടിക്കും ഈ വിലയേറിയ സൗഹൃദത്തിനും നിരവധി പേരാണ് ആശംസകള്‍ അറിയിക്കുന്നത്.

ആരാണ് കുഞ്ചാക്കോ ബോബന്റെയും രമേഷ് പിഷാരടിയും നടുക്ക് നില്‍ക്കുന്ന ചെറിയ പയ്യന്‍ എന്നാണ് പലരും ചോദിക്കുന്നത്. കൂടുതല്‍ പേരും മമ്മൂട്ടിയുടെ ചിരിയെ പ്രശംസിച്ചാണ് കമന്റുകള്‍ ഇട്ടിരിക്കുന്നത്. ഈ പോസ്റ്റിനു താഴെ നിരവധി പേരാണ് ആശംസകള്‍ അറിയിക്കുന്നത്. പാലക്കാട് എംഎല്‍എ രാഹുല്‍ മാങ്കൂട്ടത്തില്‍ അടക്കമുള്ളവരും ചിത്രങ്ങള്‍ക്കു താഴെ രമേഷ് പിഷാരടിക്ക് ആശംസകള്‍ അറിയിക്കുന്നുണ്ട്.