പീഡനശ്രമം എതിര്ത്തു: അക്രമികള് പകതീര്ത്തത് കുഞ്ഞിനെ വെട്ടിപ്പരിക്കേൽപ്പിച്ച്, സംഭവം മലപ്പുറത്ത്!
മഞ്ചേരി: പീഡനശ്രമത്തെ പ്രതിരോധിച്ച യുവതിയുടെ കുഞ്ഞിനെ യുവാവ് വെട്ടിപ്പരിക്കേൽപ്പിച്ചു. മലപ്പുറം മഞ്ചേരിയിലാണ് സംഭവം. തെരുവില് താമസിക്കുന്ന യുവതിയും മകളുമാണ് യുവാവിന്റെ ക്രൂരതയ്ക്ക് ഇരയായത്. സംഭവത്തിന് പിന്നിൽ അയൂബ് എന്ന യുവാവാണെന്ന് ചൂണ്ടിക്കാണിച്ച് യുവതി പോലീസിനെ സമീപിച്ചെങ്കിലും പോലീസ് കേസെടുക്കാൻ തയ്യറായായിട്ടില്ല. ചൊവ്വാഴ്ചയാണ് സംഭവം.
മഞ്ചേരിയിലെ ഐജിബിടി ബസ് സ്റ്റാന്ഡിൽ കഴിയുന്ന ഒമ്പത് വയസ്സ് പ്രായമുള്ള കുഞ്ഞിനാണ് വെട്ടേറ്റത്. തങ്ങളെ സ്ഥിരം ശല്യം ചെയ്യാറുള്ള അയുബാണ് കുഞ്ഞിനെ വെട്ടിപ്പരിക്കേൽപ്പിച്ചതെന്നാണ് കുഞ്ഞിന്റെ അമ്മയും ദൃക്സാക്ഷികളും ചൂണ്ടിക്കാണിക്കുന്നത്. തന്നെ പീഡിപ്പിക്കാൻ ശ്രമിച്ചപ്പോൾ സഹോദരനും താനും ചേർന്ന് പ്രതിരോധിക്കാന് ശ്രമിച്ചുവെന്നും ഇതിനിടെ അക്രമി കത്തിയെടുത്ത് കുഞ്ഞിനെ വെട്ടുകയായിരുന്നുവെന്നാണ് മാധ്യമറിപ്പോർട്ടുകൾ. കാലിന് പരിക്കേറ്റ കുഞ്ഞിന്റെ കാലിന് മൂന്ന് തുന്നുണ്ടെന്നും മാധ്യമറിപ്പോർട്ടുകൾ സൂചിപ്പിക്കുന്നു.
അതേസമയം കുഞ്ഞ് ആക്രമിക്കപ്പെട്ട സംഭവത്തിൽ പരാതിയുമായി പോലീസിനെ സമീപിച്ചെങ്കിലും പോലീസ് അക്രമിയെ അറസ്റ്റ് ചെയ്യാൻ തയ്യറായില്ലെന്നാണ് യുവതിയുടെ ഭർത്താവ് ചൂണ്ടിക്കാണിക്കുന്നത്. അക്രമിയായ അയൂബ് യുവതിയെ പലതവണ ശല്യം ചെയ്തിരുന്നതായും ദൃക്സാക്ഷികള് ചൂണ്ടിക്കാണിക്കുന്നു.