റാണിയും പത്മിനിയും എത്തി, പക്ഷേ മുടിമുറിച്ചത് പത്മപ്രിയ
കൊച്ചി: ആഷിക് അബു സംവിധാന ചെയ്യുന്ന പുതിയ ചിത്രമാണ് റാണി പത്മിനി. മഞ്ജു വാര്യരും റീമ കല്ലിങ്കലും ആണ് ഇതിലെ നായികമാര്. എന്തായാലും പത്മപ്രിയ ഈ സിനിമയില് അഭിനയിക്കുന്നില്ല.
ഇവിടെ പറയാന് പോകുന്നത് ആ സിനിമയെ കുറിച്ചും അല്ല. കൊച്ചിയിലെ സെന്റ് തെരേസാസ് കോളേജില് നടന്ന ഒരു പരിപാടിയെ കുറിച്ചാണ്. ക്യാന്സര് രോഗികള്ക്ക് മുടി ദാനം നല്കുന്നതായിരുന്നു സംഭവം. ഉദ്ഘാടനത്തിനെത്തിയത് മഞ്ജുവും റീമയും.
ഹോട്ടല് ഉദ്ഘാടനം ചെയ്യുമ്പോള് ഭക്ഷണം കഴിച്ചുകൊണ്ട് വേണമെന്ന് പറയാം. എന്നാല് മൊബൈല് മോര്ച്ചറി ഉദ്ഘാടനം ചെയ്യുമ്പോള് ശവമാകണം എന്ന് പറയാന് പറ്റില്ലല്ലോ. ഏതാണ്ട് അതുപോലെയായിരുന്നു ഇവിടേയും കാര്യങ്ങള്.
മുടി ദാനം ചെയ്യുന്നതിന്റെ മഹത്വത്തെ കുറിച്ച് താരങ്ങള് നന്നായി തന്നെ പറഞ്ഞു. ഇത് കേട്ടപ്പോള് സെന്റ് തെരേസാസിലെ പെണ്കുട്ടികള്ക്കും ആവേശമായി. അങ്ങനെ ആകെ 14 പേര് മുടി ദാനം ചെയ്യാന് സന്നദ്ധരായി.
എന്നാല് ഇക്കൂട്ടത്തില് സ്റ്റാര് ആയത് വേറെ ഒരു ആളാണ്. അതായിരുന്നു പത്മപ്രിയ. കോളേജിലെ രണ്ടാം വര്ഷ ബിരുദ വിദ്യാര്ത്ഥി. വീല് ചെയറിലാണ് പത്മപ്രിയ എത്തിയത്. കാന്സര് ബാധിതനായ പിതാവ് മരിച്ചിട്ട് നാല്പത് നാള് പൂര്ത്തിയാകുന്ന ദിനത്തിലായിരുന്നു പത്മപ്രിയയുടെ മുടി ദാനം എന്ന പ്രത്യേകതയും ഉണ്ട്.