മാരാരിക്കുളം - ആലപ്പുഴ പാത ഇരട്ടിപ്പിക്കൽ പദ്ധതിക്ക് പച്ചക്കൊടി, 220 കോടി അനുവദിച്ച് റെയിൽവേ മന്ത്രാലയം

മാരാരിക്കുളം - ആലപ്പുഴ പാത ഇരട്ടിപ്പിക്കൽ പദ്ധതിക്ക് അനുമതി നൽകി കേന്ദ്ര സർക്കാർ. ദക്ഷിണ റെയിൽവേയ്ക്ക് കീഴിലുള്ള 10.65 കിലോമീറ്റർ വരുന്ന പാത ഇരട്ടിപ്പിക്കാൻ 220.51 കോടി രൂപ അനുവദിച്ചതായി കേന്ദ്ര റെയിൽവേ മന്ത്രാലയം വാർത്താക്കുറിപ്പിൽ അറിയിച്ചു. കേരളത്തിലെ റെയിൽവേ അടിസ്ഥാന സൌകര്യ വികസനത്തിന് വലിയ ഉത്തേജനം നൽകുന്ന തീരുമാനമാണിത്.

റെയിൽവേ ശൃംഖലയുടെ ശേഷി വർദ്ധിപ്പിക്കുന്നതിനായി നടപ്പിലാക്കുന്ന പാത ഇരട്ടിപ്പിക്കൽ, മൂന്നുവരി-നാലുവരി പാതകൾ, ഫ്ലൈഓവറുകൾ, ബൈപ്പാസ് ജോലികൾ എന്നിവ ഉൾപ്പെടുന്ന സമഗ്ര പദ്ധതിക്ക് കീഴിലാണ് ഇതിനും അനുമതി നൽകിയിരിക്കുന്നത്.

എറണാകുളം - ആലപ്പുഴ - കായംകുളം തീരദേശ പാതയിൽ നിലവിൽ സിംഗിൾ ലൈൻ ആയി അവശേഷിക്കുന്ന ഏക ഭാഗമാണ് മാരാരിക്കുളം - ആലപ്പുഴ പാത. ഈ റൂട്ടിലെ മറ്റ് ഭാഗങ്ങളിലെല്ലാം പാത ഇരട്ടിപ്പിക്കൽ ജോലികൾ ഒന്നുകിൽ പൂർത്തിയാവുകയോ അല്ലെങ്കിൽ വിവിധ ഘട്ടങ്ങളിലായി പുരോഗമിക്കുകയോ ചെയ്യുകയാണ്. കേന്ദ്ര അനുമതിയോടെ തീരദേശ പാത പൂർണ്ണമായും ഇരട്ടപ്പാതയാകുന്നതിലേക്ക് ഒരുപടി കൂടി അടുക്കുകയാണ്.

AI Generated Image

പദ്ധതി പൂർത്തിയാകുന്നതോടെ രണ്ട് ദിശകളിലേക്കുമായി പ്രതിദിനം 9 അധിക പാസഞ്ചർ ട്രെയിനുകൾ കൂടി സർവീസ് നടത്തുന്നതിന് സൗകര്യമൊരുങ്ങും. കൂടാതെ പ്രതിവർഷം 2.88 മില്യൺ ടൺ ചരക്കുനീക്കത്തെ പിന്തുണയ്ക്കാനും ഇതിലൂടെ സാധിക്കും. യാത്രാ-ചരക്ക് ഗതാഗതത്തിലെ ഈ വർദ്ധനവിലൂടെ റെയിൽവേയ്ക്ക് പ്രതിവർഷം ഏകദേശം 3.08 കോടി രൂപയുടെ അധിക അറ്റാദായം ലഭിക്കുമെന്നും പ്രതീക്ഷിക്കുന്നു.

സിംഗിൾ ലൈൻ ആയതുമൂലം ട്രെയിൻ ക്രോസിംഗിനായി ഉണ്ടാകുന്ന വലിയ താമസം ഒഴിവാക്കാൻ ഈ പദ്ധതി സഹായിക്കും. യാത്രാ-ചരക്ക് ട്രെയിനുകളുടെ വേഗതയും സുഗമമായ സർവീസും ഉറപ്പാക്കാനും സമയനിഷ്ഠ പാലിക്കാനും ഇത് വഴി സാധിക്കും. കൂടാതെ ഈ മേഖലയിലെ കണക്റ്റിവിറ്റിയും ഗതാഗത സൗകര്യങ്ങളും ഇത് കൂടുതൽ ശക്തമാക്കും.
ഈ പ്രോജക്റ്റിന് മികച്ച സാമ്പത്തിക ലാഭക്ഷമതയുണ്ടെന്ന് റെയിൽവേ വ്യക്തമാക്കി. കേരളത്തിലെ റെയിൽവേ വികസനത്തിനും സുഗമമായ യാത്രാ സൗകര്യങ്ങൾക്കും ഈ പദ്ധതി വലിയ രീതിയിൽ ഗുണകരമാകുമെന്നാണ് വിലയിരുത്തപ്പെടുന്നത്.