ടിപി വധക്കേസ് പ്രതികൾക്ക് സർക്കാർ ചെലവിൽ ആയുർവേദ സുഖചികിത്സ! കതിരൂർ കേസിലെ പ്രതികളും...

ടിപി കേസിൽ ശിക്ഷിക്കപ്പെട്ട് ജയിലിൽ കഴിയുന്ന കെസി രാമചന്ദ്രനും ടികെ രജീഷുമാണ് സുഖചികിത്സ തേടിയത്.

കണ്ണൂർ: ടിപി വധക്കേസിലെ പ്രതികൾക്ക് സർക്കാർ വക സുഖചികിത്സയെന്ന് റിപ്പോർട്ട്. കണ്ണൂർ സെൻട്രൽ ജയിലിൽ കഴിയുന്ന പ്രതികൾ കണ്ണൂർ ആയുർവേദ ആശുപത്രിയിൽ സുഖ ചികിത്സ തേടിയെന്ന് മാതൃഭൂമിയാണ് റിപ്പോർട്ട് ചെയ്തിരിക്കുന്നത്.

ടിപി കേസിൽ ശിക്ഷിക്കപ്പെട്ട് ജയിലിൽ കഴിയുന്ന കെസി രാമചന്ദ്രനും ടികെ രജീഷുമാണ് സുഖചികിത്സ തേടിയത്. രജീഷിന് ഒക്ടോബർ 11 മുതൽ നവംബർ 25 വരെ 45 ദിവസമായിരുന്നു സുഖചികിത്സ. കെസി രാമചന്ദ്രൻ ഇപ്പോഴും ചികിത്സയിൽ തുടരുകയാണ്.

ആശുപത്രിയിൽ പ്രവേശിപ്പിക്കുന്ന തടവുകാരെ ചികിത്സിക്കാൻ പോലീസ് സുരക്ഷയുള്ള സെല്ലുകൾ വേണമെന്നും, കാവൽ വേണമെന്നുമാണ് നിയമം. എന്നാൽ ഇതെല്ലാം ലംഘിച്ചാണ് ഇവരുടെ സുഖ ചികിത്സ നടക്കുന്നത്. ജയിൽ സൂപ്രണ്ടിന്റെ നിർദേശപ്രകാരമാണ് ചികിത്സയെന്നാണ് ആശുപത്രി രേഖയിലുള്ളത്.

ടിപി വധക്കേസ് പ്രതികൾക്ക് പുറമേ, കതിരൂർ മനോജ് വധക്കേസിലെ പ്രതികളായ ജിജേഷ്, റിജു, സിനിൽ എന്നിവരും സുഖ ചികിത്സ തേടിയിട്ടുണ്ട്. ജിജഷ്, റിജു എന്നിവർ ഡിസംബർ മുതൽ ജനുവരി വരെയാണ് ചികിത്സ നടത്തിയത്. സിനിൽ ഇപ്പോഴും ചികിത്സയിൽ കഴിയുകയാണ്.

English summary

media report; tp case convicts got special ayurveda treatment.