ആര്യയുടെ നില അതീവ ഗുരുതരമെന്ന് മെഡിക്കല് ബുള്ളറ്റിന്
തൃശൂര് : ട്രെയിനില് നിന്ന് വീണു പരുക്കേറ്റ് ചികില്സയിലുള്ള ആര്യ കെ. സുരേഷിന്റെ ആരോഗ്യനില ഗുരുതരമായി തുടരുന്നു. തൃശൂര് മെഡിക്കല് കോളേജില് വെന്റിലേറ്ററില് കഴിയുന്ന ആര്യയുടെ ആരോഗ്യനില വീണ്ടെടുക്കാന് കഴിയാത്തവിധം മോശമായി കൊണ്ടിരിക്കുകയാണെന്ന് ഡോക്ടര്മാര് അറിയിച്ചു.
വെന്റിലേറ്ററിന്റെ സഹായം 24 മണിക്കൂര് കൂടി തുടരും. ഇന്നലെയാണ് ആന്റിബയോട്ടിക്കുകള് നല്കി തുടങ്ങിയിരിക്കുന്നത് എന്നാല് അതിന്റെ പ്രവര്ത്തനം ശക്തമാവാന് രണ്ട് മൂന്ന് ദിവസം കഴിയുമെന്ന് ഡോക്ടര്മാര് അറിയിച്ചു.
ആര്യ മരുന്നുകളോട് പ്രതികരിക്കുന്നില്ലെന്നും ശ്വാസകോശത്തിലെ പഴുപ്പ് നീക്കം ചെയ്തുവെന്നും മെഡിക്കല് ബുള്ളറ്റിന് അറിയിച്ചു.ന്യുമോണിയ ബാധിച്ചതാണ് ആര്യയുടെ ആരോഗ്യനില വഷളാക്കിയത്. കൂടാതെ തലച്ചോറിനേറ്റ് പരുക്കും ഗുരുതരമായി. മരുന്നുകളോട് ഭാഗികമായേ പ്രതികരിക്കുന്നുള്ളൂ.
രക്തസമ്മര്ദ്ദം സാധാരണ നിലയില് എത്തിക്കാനുള്ള ശ്രമമാണ് നിലവില് നടന്നുവരുന്നത്. പള്സും കുറഞ്ഞുവരികയാണ്. കഴിഞ്ഞ ദിവസം ആര്യയുടെ നില മെച്ചപ്പെട്ടിരുന്നെങ്കിലും പിന്നിട് വഷളാകുകയായിരുന്നു.