ആ പ്രതീക്ഷയും പൊലിഞ്ഞു... ഡോ ദീപക്കും ഡോ ഇര്‍ഷാദും മരിച്ചു

കാഠ്മണ്ഡു: കാഠ്‌മണ്ഡുവില്‍ കാണാതായ രണ്ട് മലയാളി ഡോക്ടര്‍മാരും മരിച്ചതായി റിപ്പോര്‍ട്ട്. ഡോ ദീപക്കും ഡോ ഇര്‍ഷാദും ആണ് മരിച്ചത്. ബന്ധുക്കളാണ് ഇത് സംബന്ധിച്ച വിവരം മാധ്യമങ്ങള്‍ക്ക് നല്‍കിയത്.

രണ്ട് പേരും കാഠ്മണ്ഡുവിലെ ടീച്ചിംഗ് ആശുപത്രിയില്‍ ചികിത്സയിലാണെന്നായിരുന്നു വാര്‍ത്തകള്‍. എന്നാല്‍ ആ പ്രതീക്ഷകളെല്ലാം ഇപ്പോള്‍ അസ്ഥാനത്തായിരിയ്ക്കുകയാണ്. ഏപ്രില്‍ 28 ന് ആണ് ഇവരുടെ മൃതദേഹങ്ങള്‍ രക്ഷാപ്രവര്‍ത്തകര്‍ കെട്ടിടങ്ങളുടെ അവശിഷ്ടങ്ങളില്‍ നിന്ന് പുറത്തെടുത്തത്.

ദീപക്കിന്റേയും ഇര്‍ഷാദിന്റേയും ബന്ധുക്കള്‍ ആശുപത്രി മോര്‍ച്ചറിയില്‍ എത്തി മൃതദേഹങ്ങള്‍ തിരിച്ചറിയുകയായിരുന്നു. ഇവര്‍ താമസിചച്ചിരുന്ന ഹോട്ടല്‍ ഭൂചലനത്തില്‍ പൂര്‍ണമായും തകര്‍ന്നിരുന്നു.

ഗുരുതരമായ പരിക്കുകളാണ് രണ്ട് പേരുടേയും ശരീരങ്ങള്‍ക്കുളളതെന്നാണ് ദൃശ്യമാധ്യമങ്ങള്‍ റിപ്പോര്‍ട്ട് ചെയ്യുന്നത്. മൃതദേഹങ്ങള്‍ ആദ്യം ദില്ലിയിലേക്കും പിന്നീട് കേരളത്തിലേയ്ക്കും എത്തിയ്ക്കും എന്നാണ് വിവരം.

കേളകം സ്വദേശിയാണ് ഡോ ദീപക് തോമസ്. ഡോ ഇര്‍ഷാദ് മലപ്പുറം സ്വദേശിയും. ഇവര്‍ക്കൊപ്പം നേപ്പാളിലെത്തിയ ഡോ അബിന്‍ സൂരി പരിയ്ക്കുകളോടെ രക്ഷപ്പെട്ടിരുന്നു. അബിന്‍ സൂരിയെ ദില്ലിയിലെ എയിംസ് ആശുപത്രിയിലേക്ക് എപ്രില്‍ 28 ന് തന്നെ എത്തിയ്ക്കും.

English summary

Missing Malayali doctors died in Nepal Earthquake