എംഎല്എമാര്ക്ക് ഏറ്റവും കുറവ് ശമ്പളം കേരളത്തില്; കൂടുതല് ശമ്പളം എവിടെയാണെന്നറിയാമോ?
തമിഴ്നാട്ടിലെ എല്ലാ എംഎല്എമാര്ക്കും ഔദ്യോഗിക വാഹനങ്ങളും അധിക പ്രതിമാസ അലവന്സുകളും നല്കാനുള്ള മുഖ്യമന്ത്രിയുടെ തീരുമാനം വലിയ ചര്ച്ചകള്ക്ക് വഴിയൊരുക്കിയിരുന്നു. പുതിയ തീരുമാനപ്രകാരം, ഓരോ എംഎല്എയ്ക്കും ഒരു ഔദ്യോഗിക വാഹനം ലഭിക്കും. കൂടാതെ, വാഹനം, ഇന്ധനം, അറ്റകുറ്റപ്പണി എന്നിവയ്ക്കായി പ്രതിമാസം 75,000 രൂപയും, സഹായിക്കായി 25,000 രൂപയും അനുവദിക്കും.
ഇതോടെ ഓരോ എംഎല്എയ്ക്കും പ്രതിമാസം ഒരു ലക്ഷം രൂപയുടെ അധിക ആനുകൂല്യമാണ് ലഭിക്കുക. നിയമസഭാംഗങ്ങള്ക്കുള്ള ആരോഗ്യ ഇന്ഷുറന്സ് പരിരക്ഷയും സര്ക്കാര് വിപുലീകരിച്ചിട്ടുണ്ട്. അടിസ്ഥാന ശമ്പളം, അലവന്സുകള്, അധിക സൗകര്യങ്ങള് എന്നിവയില് വലിയ വ്യത്യാസങ്ങളുള്ളതിനാല്, ഇന്ത്യയിലുടനീളം എംഎല്എമാരുടെ ശമ്പളത്തിലും ആനുകൂല്യങ്ങളിലും നിലനില്ക്കുന്ന അന്തരം ഇതിലൂടെ ശ്രദ്ധാകേന്ദ്രമായി മാറിയിരിക്കുന്നു.
എംപിമാരുടെ ശമ്പളവും അലവന്സുകളും പാര്ലമെന്റാണ് തീരുമാനിക്കുന്നതെങ്കില്, എംഎല്എമാരുടെ കാര്യത്തില് അത് സംസ്ഥാനത്തിന്റെ അധികാരപരിധിയില് വരുന്ന വിഷയമാണ്. അതത് സംസ്ഥാന നിയമസഭകള് നിയമങ്ങളിലൂടെയാണ് തങ്ങളുടെ അംഗങ്ങളുടെ വേതനം നിശ്ചയിക്കുന്നത്. രാജ്യത്ത് എംഎല്എമാര്ക്കായി ഏകീകൃതമായ ദേശീയ ശമ്പള ഘടന നിലവിലില്ല.
നിയമസഭാംഗങ്ങള്ക്ക് ലഭിക്കുന്ന ആകെ ആനുകൂല്യങ്ങളുടെ ഒരു ഭാഗം മാത്രമാണ് അടിസ്ഥാന ശമ്പളം. മണ്ഡലം സംബന്ധമായ ചെലവുകള്, ഓഫീസ്-സെക്രട്ടേറിയറ്റ് സഹായം, യാത്ര, താമസം, ടെലിഫോണ്-ആശയവിനിമയം, ചികിത്സ, മറ്റ് ഔദ്യോഗിക ചെലവുകള് എന്നിവയ്ക്കായി അധിക അലവന്സുകള് നല്കാന് സംസ്ഥാനങ്ങള്ക്ക് അധികാരമുണ്ട്.
'പിആര്എസ് ലെജിസ്ലേറ്റീവ് റിസര്ച്ചിന്റെ' കണക്കുകള് പ്രകാരം, മിക്ക സംസ്ഥാനങ്ങളിലും നിയമസഭാംഗങ്ങള് നിയമനിര്മ്മാണത്തിലൂടെയാണ് തങ്ങളുടെ ശമ്പളവും അലവന്സുകളും നിശ്ചയിക്കുന്നത്. ഇതിന്റെ ഫലമായി, വിവിധ സംസ്ഥാനങ്ങളിലെ അടിസ്ഥാന ശമ്പളത്തിലും മൊത്തം ആനുകൂല്യങ്ങളിലും വലിയ വ്യത്യാസങ്ങള് കാണപ്പെടുന്നു. ഇത് പ്രകാരം ഏത് സംസ്ഥാനമാണ് എംഎല്എമാര്ക്ക് ഏറ്റവും ഉയര്ന്ന ശമ്പളം നല്കുന്നത് എന്ന് നോക്കാം.
2025-ല് 'ദി ട്രിബ്യൂണ്' പ്രസിദ്ധീകരിച്ച റിപ്പോര്ട്ട് പ്രകാരം, തെലങ്കാനയാണ് എംഎല്എമാര്ക്ക് ഏറ്റവും ഉയര്ന്ന ശമ്പളം നല്കുന്നത്. 2.75 ലക്ഷം രൂപയാണ് തെലങ്കാന എംഎല്എമാരുടെ ശമ്പളം. കെ. ചന്ദ്രശേഖര് റാവുവിന്റെ നേതൃത്വത്തിലുള്ള ബിആര്എസ് സര്ക്കാരിന്റെ കാലത്താണ് എല്ലാ അലവന്സുകളും ഉള്പ്പെടെ ശമ്പളം 1.25 ലക്ഷം രൂപയില് നിന്ന് 2.75 ലക്ഷം രൂപയായി വര്ധിപ്പിച്ചത്.
പ്രതിമാസം 70,000 രൂപ ശമ്പളം വാങ്ങുന്ന കേരളത്തിലെ എംഎല്എമാര് രാജ്യത്ത് ഏറ്റവും കുറഞ്ഞ പ്രതിഫലം ലഭിക്കുന്ന നിയമസഭാംഗങ്ങളില് ഉള്പ്പെടുന്നു. ഇവരുടെ പ്രതിമാസ ശമ്പളത്തില് 2,000 രൂപയുടെ സ്ഥിര അലവന്സ്, 25,000 രൂപയുടെ മണ്ഡലം അലവന്സ്, കുറഞ്ഞത് 20,000 രൂപയുടെ യാത്രാ അലവന്സ്, 11,000 രൂപയുടെ ടെലിഫോണ് അലവന്സ്, 4,000 രൂപയുടെ ഇന്ഫര്മേഷന് അലവന്സ്, 8,000 രൂപയുടെ പത്യേക ചെലവുകള്ക്കുള്ള അലവന്സ് എന്നിവ ഉള്പ്പെടുന്നു.
കൂടാതെ, സംസ്ഥാനത്തിനകത്തുള്ള യാത്രകള്ക്ക് 1,000 രൂപയും കേരളത്തിന് പുറത്തുള്ള യാത്രകള്ക്ക് 1,200 രൂപയും എന്ന നിരക്കില് പ്രതിദിന അലവന്സും ഇവര്ക്ക് ലഭിക്കുന്നു. എങ്കിലും, കുറഞ്ഞ വേതനം നല്കുന്ന സംസ്ഥാനങ്ങളിലെ എംഎല്എമാര്ക്ക് മൊത്തത്തില് കുറഞ്ഞ സൗകര്യങ്ങളേ ലഭിക്കൂ എന്ന് ഇതിനര്ത്ഥമില്ല. പാര്പ്പിടം, ചികിത്സ, യാത്രാച്ചെലവ് തിരിച്ചുകിട്ടല്, ജീവനക്കാരുടെ സേവനം, മറ്റ് ആനുകൂല്യങ്ങള് എന്നിവ പ്രത്യേകം നല്കപ്പെട്ടേക്കാം.
ഒരു നിയമസഭാംഗത്തിനായി സംസ്ഥാനം നടത്തുന്ന ചെലവുകളുടെ ഒരു ഭാഗം മാത്രമാണ് എംഎല്എയുടെ പ്രതിമാസ ശമ്പളം. ഇത് കൂടാതെ മണ്ഡലത്തിലെ പ്രവര്ത്തനങ്ങളുമായി ബന്ധപ്പെട്ട ചെലവുകള്ക്കുള്ള 'മണ്ഡലം അലവന്സ്', ജീവനക്കാരുടെയും ഭരണപരമായ കാര്യങ്ങളുടെയും ചെലവുകള്ക്കുള്ള സെക്രട്ടേറിയറ്റ് അല്ലെങ്കില് ഓഫീസ് അലവന്സ്, ഔദ്യോഗിക യാത്രകള്ക്കുള്ള യാത്രാ-വാഹന അലവന്സ് എന്നിവ കൊടുക്കുന്നുണ്ട്.
ഒപ്പം നിയമസഭാ സമ്മേളനങ്ങളിലും കമ്മിറ്റി യോഗങ്ങളിലും പങ്കെടുക്കുന്നതിനുള്ള 'ഡെയ്ലി അലവന്സ്' (ദിവസവേതനം/ബത്ത), സംസ്ഥാന തലസ്ഥാനത്ത് പാര്പ്പിട സൗകര്യം, എംഎല്എയ്ക്കും ചില സംസ്ഥാനങ്ങളില് കുടുംബാംഗങ്ങള്ക്കും ചികിത്സാ സൗകര്യങ്ങള്, ടെലിഫോണ്, ആശയവിനിമയ അലവന്സുകള്, വാഹന സൗകര്യങ്ങള് അല്ലെങ്കില് വാഹന അലവന്സുകള് എന്നിവ കൊടുക്കുന്നുണ്ട്.
ഓഫീസ് ഉപകരണങ്ങള്ക്കും സ്റ്റേഷനറിക്കുമുള്ള അലവന്സുകള്, സംസ്ഥാന നിയമങ്ങള്ക്കനുസൃതമായി, നിയമസഭയില് നിന്നുള്ള വിരമിക്കലിനു ശേഷമുള്ള പെന്ഷനും മറ്റ് ആനുകൂല്യങ്ങളും എന്നിവയും അനുവദിക്കുന്നുണ്ട്. എംഎല്എമാര്ക്കും അവരുടെ കുടുംബങ്ങള്ക്കും ചികിത്സാ സൗകര്യങ്ങള് എന്നിവയും നല്കുന്നുണ്ട്.
Click it and Unblock the Notifications
Sign in with Google