മോഹന്‍ലാല്‍ 'നായര്‍', രാധാകൃഷ്ണന്‍ 'നായര്‍'... പെരുന്നയില്‍ ഹാജര്‍

കോട്ടയം: അഭിപ്രായം പറയുന്നതില്‍ മോഹന്‍ലാല്‍ കാണിക്കുന്ന ധീരത നേരത്തേയും ശ്രദ്ധ നേടിയിട്ടുണ്ട്. അതിപ്പോള്‍ അമൃതാനന്ദമയിയെക്കുറിച്ചാണെങ്കിലും ചുംബന സമരത്തെക്കുറിച്ചാണെങ്കിലും മോഹന്‍ലാല്‍ പറയും.

എന്നാല്‍ ഇപ്പോള്‍ എന്‍എസ്എസ് ആസ്ഥാനത്ത് മന്നം ജയന്തിയില്‍ സമുദായാംഗമായി പങ്കെടുത്തിരിക്കുകയാണ് മോഹന്‍ലാല്‍. അദ്ദേഹത്തോടൊപ്പം ഐഎസ്ആര്‍ഒ മുന്‍ ചെയര്‍മാന്‍ ഡോ കെ രാധാകൃഷ്ണനും ഉണ്ടായിരുന്നു.

പെരുന്നയിലെ എന്‍എസ്എസ് ആസ്ഥാനത്ത് നടന്ന മന്നം ജയന്തി സമ്മേളനം മുഖ്യമന്ത്രി ഉമ്മന്‍ ചാണ്ടിയാണ് ഉദ്ഘാടനം ചെയ്തത്. പക്ഷേ കയ്യടി മുഴുവന്‍ മോഹന്‍ലാലിനും ഡോ രാധാകൃഷ്ണനും ആയിരുന്നു.

മന്നത്ത് പത്മനാഭന്‍ ജീവിച്ചിരുന്നപ്പോള്‍ അദ്ദേഹത്തിന്റെ ശബ്ദം നായന്മാരുടേതായിരുന്നു എന്നാണ് മോഹന്‍ലാല്‍ പറഞ്ഞത്. പത്ത് മിനിട്ട് നീണ്ടതായിരുന്നു ലാലിന്റെ പ്രസംഗം. എഴുതി തയ്യാറാക്കി കൊണ്ടുവന്ന പ്രസംഗം വായിക്കുകയായിരുന്നു.

എന്‍എസ്എസിന്റെ സ്ഥാപനമായ തിരുവനന്തപുരം എംജി കോളേജിലാണ് താന്‍ പഠിച്ചതെന്ന് മോഹന്‍ലാല്‍ പറഞ്ഞു. എംജി കോളേജിന്റെ തുടക്കവും അതുമായി ബന്ധപ്പെട്ട് മന്നത്തിന്റെ പരാമര്‍ശങ്ങളും ലാലിന്റെ പ്രസംഗത്തില്‍ കടന്നുവന്നു.

എന്‍എസ്എസിന്റെ പരാതികള്‍ പരിഹരിക്കുമെന്ന് സമ്മേളനം ഉദ്ഘാടനം ചെയ്ത മുഖ്യമന്ത്രി ഉമ്മന്‍ ചാണ്ടി പറഞ്ഞു. വിദ്യാഭ്യാസ മേഖലയില്‍ എന്‍എസ്എസിന്റെ ആവശ്യങ്ങള്‍ പരിഗണിക്കുമെന്നും അദ്ദേഹം പറഞ്ഞു.

English summary

Mohanlal and Dr K Radhakrishnan attended NSS' Mannam Jayanthi celebration at Perunna.