'മോഹന്‍ലാല്‍ കോണ്‍ഗ്രസിനുവേണ്ടിയായിരുന്നെങ്കില്‍ സലിംകുമാറിന് പ്രശ്‌നമുണ്ടാകില്ല'

By Anwar Sadath

Updated: Sunday, May 15, 2016, 9:34 [IST]

കൊച്ചി: നടന്‍ മോഹന്‍ലാല്‍ കോണ്‍ഗ്രസിനുവേണ്ടിയായിരുന്നു തിരഞ്ഞെടുപ്പ് പ്രചരണത്തിന് ഇറങ്ങിയിരുന്നത് എങ്കില്‍ സലിംകുമാറിന് പ്രശ്‌നമുണ്ടാകില്ലായിരുന്നെന്ന് സംവിധായകന്‍ വിനയന്‍. മോഹന്‍ലാല്‍ ഗണേഷ് കുമാറിന് വേണ്ടി തിരഞ്ഞെടുപ്പ് പ്രചരണത്തിനെത്തിയതില്‍ പ്രതിഷേധിച്ച് സലിംകുമാര്‍ താരസംഘടനയായ അമ്മയില്‍ നിന്നും രാജിവെച്ചിരുന്നു. ഇതേക്കുറിച്ച് പ്രതികരിക്കുകയായിരുന്നു വിനയന്‍.

മോഹന്‍ലാലിനെതിരെ ജഗദീഷ് ബ്ലാക്ക് മെയില്‍ ആരോപണം ഉന്നയിച്ചതും ശരിയായില്ലെന്ന് വിനയന്‍ പറഞ്ഞു. ആനക്കൊമ്പ് കേസിലും സോളാര്‍ കേസിലും പ്രതിയാക്കുമെന്ന് ഭീഷണിപ്പെടുത്തിയാണ് മോഹന്‍ലാലിനെ കൊണ്ടു പോയതാണെന്ന് താന്‍ വിശ്വസിക്കുന്നില്ലെന്ന് വിനയന്‍ പറയുന്നു.

മോഹന്‍ലാലിനും രാഷ്ട്രീയമുണ്ടാകാം. അദ്ദേഹത്തിന് ആരുടെ പ്രചരണത്തിന് പോകണമെന്ന് വ്യക്തിപരമായ തീരുമാനമെടുക്കാനും അദ്ദേഹത്തിന് അവകാശമുണ്ട്. തെറ്റായ ആരോപണങ്ങള്‍ ഉന്നയിക്കുന്നത് ശരിയായ രീതിയല്ല. അമ്മയുടെ ജനറല്‍ സെക്രട്ടറി ആയിരുന്ന ആള്‍ക്കെതിരെയാണ് ട്രഷറര്‍ ആയിരുന്നയാള്‍ ആരോപണം ഉന്നയിക്കുന്നതെന്നും വിനയന്‍ ഓര്‍മിപ്പിച്ചു.

അതേസമയം അമ്മ ചില മാഫിയകള്‍ക്ക് വേണ്ടി നിലനില്‍ക്കുന്നതായുള്ള മുന്‍ ആരോപണത്തില്‍ ഉറച്ചുനില്‍ക്കുന്നതായി വിനയന്‍ പറഞ്ഞു. തെരഞ്ഞെടുപ്പ് പ്രചരണത്തിന് മോഹന്‍ലാല്‍ എത്തിയത് അമ്മയില്‍ ഏറെ വിവാദത്തിന് വഴിതെളിച്ചിരുന്നു. ഭൂരിഭാഗം നടന്മാരും ഗണേഷിന് വേണ്ടി രംഗത്തിറങ്ങിയപ്പോള്‍ ജഗദീഷിനായി പ്രമുഖ നടന്മാര്‍ ആരും വോട്ടുപിടിക്കാനെത്തിയില്ല.