സെലിബ്രിറ്റി ക്രിക്കറ്റില് നിന്ന് മോഹന്ലാല് ഒഴിയുന്നോ...
കൊച്ചി: താരക്രിക്കറ്റിലെ മലയാളി സാന്നിധ്യമായ കേരള സ്ട്രൈക്കേഴ്സില് നിന്ന് മോഹന്ലാല് ഒഴിയുന്നതായി വാര്ത്ത. എന്നാല് താരം ഇത് സംബന്ധിച്ച് പ്രതികരിച്ചിട്ടില്ല.
താരദമ്പതിമാരായ പ്രിയദര്ശനും ലിസിയും വിവാഹമോചനം തേടുന്നതുമായി ബന്ധപ്പെട്ടാണ് ലാലിന്റെ പിന്മാറ്റം എന്നാണ് റിപ്പോര്ട്ടുകള്. പ്രിയദര്ശന്റെ അടുത്ത സുഹൃത്താണ് ലാല്.
സെലിബ്രിറ്റി ക്രിക്കറ്റ് ലീഗുമായി ബന്ധപ്പെട്ടാണ് പ്രിയദര്ശനും ലിസിയും തമ്മില് പ്രശ്നങ്ങള് ഉടലെടുത്തതെന്നാണ് വാര്ത്തകള്. കഴിഞ്ഞ വര്ഷവും താരദമ്പതിമാര് പിരിയുന്നതായി വാര്ത്തകളുണ്ടായിരുന്നു മോഹന്ലാല് അടക്കമുളളവര് ഇടപെട്ടാണ് അന്ന് പ്രശ്നം പരിഹരിച്ചതെന്നാണ് പറയപ്പെടുന്നത്.
കേരള സ്ട്രൈക്കേഴ്സിന്റെ ഡയറക്ടര് ബോര്ഡ് അംഗവും ക്യാപ്റ്റനും ആണ് മോഹന്ലാല്. താരക്രിക്കറ്റിന് ജനപിന്തുണ ലഭിക്കാനുള്ള കാരണവും ലാലിന്റെ സാന്നിധ്യമായിരുന്നു.
വിവാഹമോചന കരാറില് കേരള സ്ട്രൈക്കേഴ്സിനെ തനിക്ക് വേണം എന്ന് ലിസി ആവശ്യപ്പെട്ടിട്ടുണ്ടെന്നാണ് വിവരം. അല്ലാത്ത പക്ഷം നഷ്ടപരിഹാരം നല്കണം. എന്നാല് താര ക്രിക്കറ്റ് വിട്ടുകൊടുക്കാതെ നഷ്ടപരിഹാരം നല്കി പ്രശ്നം പരിഹാരിക്കാനാണ് പ്രിയദര്ശന് ശ്രമിക്കുന്നതെന്നും റിപ്പോര്ട്ടുകളുണ്ട്.
തന്റെ വാക്കുകള് ചെവിക്കൊള്ളാതെ ലിസിയും പ്രിയദര്ശനും പിരിഞ്ഞതാണ് ലാലിനെ വേദനിപ്പിച്ചതെന്നാണ് റിപ്പോര്ട്ട്. ഈ സാഹചര്യത്തില് താന് സ്ട്രൈക്കേഴ്സിന്റെ ഭാഗമാകാന് ആഗ്രഹിക്കുന്നില്ലെന്നും ലാല് സൂചിപ്പിച്ചിട്ടുണ്ടത്രെ.