അന്യമതസ്ഥനൊപ്പം ചായകുടിച്ചതിന് യുവതിക്ക് അസഭ്യവര്ഷം, പരപ്പനങ്ങാടിയിലെ സദാചാര പോലീസ്
പരപ്പനങ്ങാടി: സദാചാര പോലീസിങ്ങിനെതിരെ കേരളത്തില് വ്യാപക പ്രതിഷേധം ഉയരുന്നതിനിടെ പരപ്പനങ്ങാടിയില് സദാചാര പോലീസിന്റെ അഴിഞ്ഞാട്ടം. ഒരുമിച്ച് ചായകുടിക്കാനെത്തിയ യുവാവിനേയും യുവതിയേയും ആണ് ഒരു സംഘം കയ്യേറ്റം ചെയ്യാന് ശ്രമിച്ചത്.
ഹോട്ടലില് നിന്ന് ഒരുമിച്ച് ഭക്ഷണം കഴിച്ച് പുറത്തിറങ്ങിയ യുവാവിനേയും യുവതിയേയും ഒരു സംഘം വളയുകയായിരുന്നു. യുവതി മുസ്ലീം സമുദായാംഗവും യുവാവ് ഹിന്ദു സമുദായാംഗവും ആണ് എന്നതായിരുന്നു അക്രമികളുടെ പ്രശ്നം. ശനിയാഴ്ച ഉച്ചക്ക് രണ്ട് മണിയോടെയാണ് സംഭവം നടന്നത്.
പ്രദേശവാസിയായ യുവാവിനൊപ്പം ബൈക്കിലാണ് യുവതി എത്തിയത്. അന്യമതസ്ഥനൊപ്പം ബൈക്കില് കയറിയതും ഒരുമിച്ച് ഹോട്ടലില് കയറി ഭക്ഷണം കഴിച്ചതും ആണ് ചിലരെ ചൊടിപ്പിച്ചത്. യുവതിയേയും യുവാവിനേയും വളഞ്ഞിട്ട് ചോദ്യം ചെയ്ത സംഘം അസഭ്യവര്ഷവും നടത്തി. ബൈക്കില് യുവാവിനൊപ്പം കയറിയാല് അക്രമിക്കുമെന്നും ഭീഷണിപ്പെടുത്തി.
പിന്നീട് ബസ്സില് യാത്ര ചെയ്യാന് തീരുമാനിച്ച യുവതിയെ ബസ് സ്റ്റാന്ഡിലെത്തിയും ഭീഷണിപ്പെടുത്തി. അസഭ്യവര്ഷവും തുടര്ന്നു. സംഭവം നടക്കുമ്പോള് നാട്ടുകാര് കാഴ്ചക്കാരായ നില്ക്കുക മാത്രമായിരുന്നു. പലരും ദൃശ്യങ്ങള് മൊബൈല് ഫോണില് പകര്ത്താനാണ് താത്പര്യം കാണിച്ചത്.
പരപ്പനങ്ങാടിയില് ഇത്തരം സംഭവം ആദ്യമല്ല. ബീവറേജ് മദ്യഷോപ്പില് ഭര്ത്താവിനൊപ്പം വരിനിന്ന സ്ത്രീയെ കയ്യേറ്റം ചെയ്ത സംഭവവും നടന്നത് ഇവിടെ തന്നെയാണ്. രണ്ട് വര്ഷം മുന്പായിരുന്നു അത്.
സംഭവത്തിനെതിരെ പ്രദേശത്ത് പ്രതിഷേധം ശക്തമായിട്ടുണ്ട്. ഇടത് യുവജന സംഘടനയായ ഡിവൈഎഫ്ഐയുടെ നേതൃത്വത്തില് ചായകുടി പ്രതിഷേധം എന്ന കൂട്ടായ്മ അണിയറയില് ഒരുങ്ങുന്നുണ്ട്.