ഹെല്‍മറ്റ് ധരിച്ചില്ല, പിഴയടയ്ക്കാന്‍ വിദ്യാര്‍ത്ഥിനി കമ്മല്‍ പണയം വെച്ചു

കൊല്ലം: ഹെല്‍മറ്റ് ധരിക്കാതെ റോഡിലിറങ്ങുന്ന ആളുകള്‍ ശ്രദ്ധിക്കുക. ഇപ്പോള്‍ 100, 200 രൂപ കൊണ്ട് പോലീസിനെ ഒതുക്കാമെന്ന് വിചാരിക്കണ്ട. പിഴ അടയ്ക്കാന്‍ സ്വര്‍ണ്ണം വരെ വില്‍ക്കേണ്ടി വരും. മോട്ടോര്‍ വാഹന വകുപ്പ് പരിശോധന ശക്തമാക്കിയിരിക്കുകയാണ്. ലൈസന്‍സും ആര്‍സി ബുക്കും എടുക്കാന്‍ മറന്ന വിദ്യാര്‍ത്ഥിനിക്ക് മോട്ടോര്‍ വാഹന വകുപ്പ് 2000 രൂപയാണ് പിഴ ചുമത്തിയത്.

വാഹനപരിശോധനയ്ക്കിടെ പത്തുവയസ്സുകാരിക്ക് നേരിടേണ്ടി വന്ന ചൂരല്‍ പ്രയോഗത്തിനു പിന്നാലെയാണ് കൊല്ലത്ത് ഇങ്ങനെയൊരു സംഭവം നടക്കുന്നത്. പിഴ അടയ്ക്കാന്‍ കൈയ്യില്‍ പണം ഇല്ലാത്ത വിദ്യാര്‍ത്ഥിനി ചെയ്തതോ സ്വന്തം കമ്മല്‍ ഊരി പണയം വെച്ചു. സംഭവം നടക്കുന്നത് കൊല്ലം കരിക്കോട് ഭാഗത്താണ്.

പെണ്‍കുട്ടി ഹെല്‍മറ്റ് ധരിക്കാതെ പോകുന്ന കണ്ടപ്പോഴാണ് അധികൃതര്‍ പിടിച്ചത്. ലൈസന്‍സ് ചോദിച്ചപ്പോള്‍ എടുക്കാന്‍ മറന്നുവെന്ന് പറഞ്ഞു. ആര്‍സി ബുക്ക് ചോദിച്ചപ്പോള്‍ അതും ഇല്ല. പിന്നീട് ഉദ്യോഗസ്ഥര്‍ കണ്ണും പൂട്ടി ഒരു തുക അങ്ങ് പറഞ്ഞു. കേട്ട പെണ്‍കുട്ടിയും ഒന്നു ഞെട്ടി.

എന്തു ചെയ്യണമെന്നറിയാതെ നിന്ന പെണ്‍കുട്ടി കമ്മല്‍ പണയം വെച്ച് പിഴ അടയ്ക്കുകയായിരുന്നു. ലൈസന്‍സും ആര്‍സി ബുക്കും ഇല്ലാത്തതിന് 1500 രൂപയും ഹെല്‍മറ്റ് ധരിക്കാത്തതിന് 500 രൂപയുമാണ് ഇടാക്കിയത്.

English summary

motor vehicle checking in kollam