മുനമ്പം ജുഡീഷ്യല്‍ കമ്മീഷന് തുടരാം; സിംഗിള്‍ ബെഞ്ച് ഉത്തരവ് ഹൈക്കോടതി ഡിവിഷന്‍ ബെഞ്ച് സ്റ്റേ ചെയ്തു

കൊച്ചി: മുമ്പം ജുഡീഷ്യൽ കമ്മീഷന് തൽക്കാലത്തേക്ക് പ്രവർത്തനം തുടരാമെന്ന് ഹൈക്കോടതി. മുമ്പം ജുഡീഷ്യൽ കമ്മീഷന്റെ പ്രവർത്തനം നിർത്തിവെച്ചുകൊണ്ടുള്ള ഹൈക്കോടതി സിം​ഗിൾ ബെഞ്ച് ഉത്തരവ് ഹൈക്കോടതി ഡിവിഷൻ ബെഞ്ച് സ്റ്റേ ചെയ്തു. സിം​ഗിൾ ബെഞ്ച് ഉത്തരവിനെതിരെ സർക്കാർ നൽകിയ അപ്പീൽ വേനലവധിക്ക് ശേഷം ജൂണിൽ പരി​ഗണിക്കും. ഹർജിയിൽ തീരുമാനം ആകുവരെ കമ്മീഷന് തുടരാമെന്ന് ഹൈക്കോടതി പറഞ്ഞു.

ആശ്വാസകരമായ തീരുമാനമെന്ന് മന്ത്രി പി രാജീവ്‌ പ്രതികരിച്ചു. മേയ് 27 ന് കമ്മീഷന്റെ കാലാവധി തീരാരിക്കെ കമ്മീഷന്റെ പ്രവർത്തനങ്ങൾ തുടരാൻ അനുവദിക്കണം എന്ന് ആവശ്യപ്പെട്ട് സർക്കാർ ഹൈക്കോടതിയിൽ അപ്പീൽ സമർപ്പിച്ചിരുന്നു. നേരത്തെ മുമ്പം ജുഡീഷ്യൽ കമ്മീഷൻ നിയമനം ഹൈക്കോടതി സിം​ഗിൾ ബെഞ്ച് റദ്ദാക്കിയിരുന്നു. ജസ്റ്റിസ് സി എൻ രാമചന്ദ്രൻ നായർ കമ്മീഷന് പൊതുതാല്പര്യ സ്വഭാവം ഇല്ലെന്ന് കണ്ടെത്തിയായിരുന്നു സിം​ഗിൾ ബെഞ്ചിന്റെ ഉത്തരവ്.

മുനമ്പത്തേത് വഖഫ് ഭൂമിയാണെന്ന് നേരത്തെ കണ്ടെത്തിയതാണെന്നും നിലവിൽ വഖഫ് ട്രിബൂണലിന്റെ പരി​ഗണനയിലുമുള്ള സാഹചര്യചത്തിൽ ജുഡീഷ്യൽ കമ്മീഷന് ഇടപെടാൻ അവകാശമില്ലെന്നും പറഞ്ഞാണ് സിം​ഗിൾ ബെഞ്ച് ഉത്തരവ് പുറപ്പെടുവിപ്പിച്ചത്. ഇതിനെതിരേയാണ് സർക്കാർ അപ്പീൽ പോയത്. ജുഡീഷ്യൽ കമ്മീഷനെ നിയമിച്ചതിൽ പൊതു താത്പര്യം ഉണ്ടെന്നും സർക്കാരിന് വിശദമായ നിയമോപദേശം നൽകുകയാണ് കമ്മീഷന്റെ ലക്ഷ്യമെന്നുമാണ് അപ്പീലിലെ പ്രധാന വാദം. ഇതാണ് ഇപ്പോൾ കോടതി അം​ഗീകരിച്ചത്.

അതേ സമയം. ജുഡീഷ്യൽ കമ്മീഷന്റെ പ്രവർത്തനം റദ്ദാക്കിയതിനെതിരെ സർക്കാർ നൽ‌കിയ അപ്പീൽ ഹൈക്കോടതി തീർപ്പാക്കിയിട്ടില്ല. ഈ അപ്പീൽ ജൂണിൽ പരി​ഗണിക്കും. വിശദമായ വാദം കേട്ടതിന് ശേഷമായിരിക്കും ഉത്തരവ് പുറപ്പെടുവിപ്പിക്കുക. എന്നാൽ കമ്മീഷന്റെ കാലാവധി തീരാനിരിക്കെ കമ്മീഷന്റെ പ്രവർത്തനങ്ങൾ തുടരാൻ അനുവദിക്കണമെന്ന ആവശ്യം കോടതി അം​ഗീകരിക്കുകയായിരുന്നു.