സ്വാതന്ത്ര്യ സമരവുമായി സവർക്കർക്ക് യാതൊരു ബന്ധവുമില്ല; ​ഗവർണറെ തള്ളി എംവി ​ഗോവിന്ദൻ

തിരുവനന്തപുരം: സവർക്കർക്ക് സ്വാതന്ത്ര്യ സമരവുമായി യാതൊരു ബന്ധവും ഇല്ലെന്നും ആര് സവർക്കറെ പുകഴ്ത്തി പറഞ്ഞാലും അതിനോട് യോജിപ്പില്ലെന്നും സി പി എം സംസ്ഥാന സെക്രട്ടറി എം വി ​ഗോവിന്ദൻ. ​ഗവർണർ രാജേന്ദ്ര വിശ്വനാഥ ആർലേക്കർ കഴിഞ്ഞ ദിവസം സവർക്കറെ പുകഴ്ത്തി സംസാരിച്ചിരുന്നു. ഇതിന് പിന്നാലെയാണ് എം വി ​ഗോവിന്ദൻ പ്രതികരിച്ചത്.

ബ്രിട്ടീഷ് സാമ്രാജ്യത്തിന് അനുകൂലമായ നിലപാട് സ്വീകരിച്ച അവരുടെ സൗജന്യത്തിൽ ആൻഡമാൻ നിക്കോബാർ ദ്വീപിൽ നിന്ന് രക്ഷപ്പെട്ട് പോയ ഒരാളാണ് സവർക്കറെന്നും അദ്ദേഹം പറഞ്ഞു. ​ദേശീയ സ്വാതന്ത്ര്യ സമരവുമായി സവർക്കർക്ക് യാതൊരു ബന്ധവുമില്ലെന്നും അദ്ദേഹം പറഞ്ഞു.

നേരത്തെ കാലിക്കറ്റ് സർവകലാശാലയിൽ എസ് എഫ് ഐ സ്ഥാപിച്ച ബോർഡിനെതിരെ ​ഗവർണർ വിമർശിച്ചിരുന്നു. സവർക്കർ എങ്ങനെയാണ് രാജ്യത്തിന്റെ ശത്രു ആവുന്നത് എന്നാണ് ​ഗവർണർ ചോദിച്ചത്. മുൻ ​ഗവർണർ ആരിഫ് മുഹമ്മദ് ഖാനെതിരെയുള്ള പ്രതിഷേധത്തിന്റെ ഭാ​ഗമായി ഒക്ടോബർ 30 ന് പരീക്ഷാ ഭവന് സമീപം എസ് എഫ് ഐ വെച്ച ബോർഡാണ് ​ഗവർണറെ പ്രകോപിപ്പിച്ചത്.

ഇതേക്കുറിച്ച് സംസാരിക്കാൻ കരുതിയിരുന്നില്ലെന്നും ബോർഡ് കണ്ടത് കൊണ്ട് സംസാരിക്കേണ്ടി വന്നതാണെന്നും പറഞ്ഞുകൊണ്ടാണ് ആർലേക്കർ ഇതേക്കുറിച്ച് സംസാരിച്ചത്. ' ഞങ്ങൾക്കാവശ്യം ചാൻസലറെയാണ്, സവർക്കറെയല്ല എന്നാണ് ബാനറിൽ എഴുതിയിരിക്കുന്നത്. ​ഗവർണർ ഇതാ നിങ്ങൾക്കൊപ്പമുണ്ട്യ നിങ്ങൾ‌ക്ക് എന്താണ് ചെയ്യേണ്ടത്? എന്നാണ് ​ഗവർണർ ചോദിച്ചത്. എന്ത് തെറ്റാണ് സവർക്കർ ഈ രാജ്യത്തോട് ചെയ്തത്. വീടിനെയും വീട്ടുകാരെയും അദ്ദേഹം ഓർക്കാറില്ലായിരുന്നു,. മറ്റുള്ളവരെക്കുറിച്ചാണ് എന്നും ചിന്തിച്ചത്. രാഷ്ട്രീയത്തിന്റെ വലിയ പ്രശ്നമാണ് ഇതെവന്നും ഇത്തരം പ്രവർത്തനങ്ങളെ തടയണമെന്നും വി സിയോട് ​ഗവർണർ പറഞ്ഞു.

' സർവകലാശാലയിലേക്ക് കയറിയപ്പോൾ ഒരു ബാനർ കണ്ടു, ഞങ്ങൾക്ക് ചാൻസലറെയാണ് വേണ്ടത്. സവർക്കറെയല്ല എന്ന്. എന്ത് തരം ചിന്തയാണ് അത് ? സവർക്കർ എങ്ങനെയാണ് രാജ്യത്തിന്റെ ശത്രുവാകുന്നത് ? സവർക്കർ എന്താണ് ചെയ്തത് ? ശരിയായി പഠിച്ചാൽ കാര്യങ്ങൾ മനസ്സിലാകും. രാജ്യത്തിന് വേണ്ടി ത്യാ​ഗങ്ങൾ ചെയ്ത ആളാണ് സവർക്കർ. മറ്റുള്ളവർക്ക് വേണ്ടിയാണ് സവർക്കർ എല്ലാകാലത്തും പ്രവർത്തിച്ചത്. വീടിനെക്കുറിച്ചോ, വീട്ടുകാരെക്കുറിച്ചോ അല്ല സമൂഹത്തെക്കുറിച്ചാണ് അദ്ദേഹം എല്ലാ കാലത്തും ചിന്തിച്ചത്,' ​ എന്നാണ് ​ഗവർണർ പറഞ്ഞത്.