അതു സാത്താന്‍സേവയല്ല!! എല്ലാം വെളിപ്പെടുത്തി കേഡല്‍!! ആദ്യം കൊന്നത് അച്ഛനെ....കാരണം

കേഡല്‍ എല്ലാം നേരത്തേ തന്നെ ആസൂത്രണം ചെയ്തതായി പോലീസ്

തിരുവനന്തപുരം: നന്തന്‍കോട് കൂട്ടക്കൊല കേസില്‍ അറസ്റ്റ് ചെയ്യപ്പെട്ട കേഡല്‍ ജീന്‍സണിന്റെ പുതിയ വെളിപ്പെടുത്തല്‍. നേരത്തേ താന്‍ ചെയ്തത് സാത്താന്‍സേവയാണെന്ന് പറഞ്ഞ കേഡല്‍ ഇപ്പോള്‍ അവയെല്ലാം കെട്ടുകഥകളായിരുന്നുവെന്ന് തെളിയിക്കുന്ന വെളിപ്പെടുത്തലാണ് നടത്തിയിരിക്കുന്നത്. അമ്മ, അച്ഛന്‍, സഹോദരി, ബന്ധു എന്നിവരടക്കം നാലു പേരെയാണ് കേഡല്‍ കൊലപ്പെടുത്തിയത്.

വീട്ടില്‍ നിന്നു തനിക്കു നേരിട്ട അവഗണനയാണ് കൊലപാതകത്തിന്റെ യഥാര്‍ഥ കാരണമെന്നാണ് കേഡലിന്റെ പുതിയ മൊഴി. കുടുംബത്തില്‍ നിന്നും തനിക്കു ഇതുവരെ വേണ്ടത്ര പരിഗണന ലഭിച്ചിരുന്നില്ലെന്നും ഇയാള്‍ വെളിപ്പെടുത്തി.

നേരത്തേ താന്‍ ചെയ്തത് സാത്താന്‍ സേവയാണെന്നായിരുന്നു കേഡല്‍ പോലീസിന്റെ ചോദ്യം ചെയ്യയില്‍ പറഞ്ഞത്. എന്നാല്‍ കേസ് ദുര്‍ബലപ്പെടുത്താനുള്ള ഇയാളുടെ ശ്രമമായിരുന്നു ഇതെന്ന് പോലീസ് പറയുന്നു.

കേഡലിന് മാനസിക പ്രശ്‌നങ്ങള്‍ ഉള്ളതായി ആദ്യ ചോദ്യം ചെയ്യലില്‍ സംശയമുയര്‍ന്നിരുന്നു. ഇതേ തുടര്‍ന്ന് അന്വേഷണസംഘത്തോടൊപ്പം മനശാസ്ത്രജ്ഞരെയും ഉള്‍പ്പെടുത്തിയിരുന്നു. കേഡലിന്റെ മനസ്സ് കൊടും ക്രിമിനലിന്റേത് ആണെന്നാണ് ചോദ്യം ചെയ്യലില്‍ വ്യക്തമായതെന്ന് മനശാസ്ത്രജ്ഞര്‍ പറയുന്നു.

നാലു പേരെയും കൊല്ലാനുള്ള കേഡലിന്റെ തീരുമാനം പെട്ടെന്ന് ഉണ്ടായത് അല്ലെന്ന് ചോദ്യം ചെയ്യലില്‍ വ്യക്തമായി. മാസങ്ങളോളം അയാള്‍ ഇതിനുള്ള തയ്യാറെടുപ്പുകള്‍ നടത്തിയതായെന്നാണ് അന്വേഷണത്തില്‍ തെളിഞ്ഞത്. തെളിവ് നശിപ്പിക്കാനും കൃത്യം നടത്താനുമെല്ലാം ഇയാള്‍ വ്യക്തമായ പദ്ധതിയും തയ്യാറാക്കിയിരുന്നു.

അച്ഛന്‍ രാജ തങ്കത്തെയാണ് താന്‍ ആദ്യം കൊല ചെയ്തതെന്ന് കേഡല്‍ പോലീസിന്റെ ചോദ്യം ചെയ്യലില്‍ വെളിപ്പെടുത്തിയെന്നാണ് സൂചന.

അച്ഛനെ കൊലപ്പെടുത്തിയ ശേഷമാണ് അമ്മ ജീന്‍ പത്മ, സഹോദരി കരോലിന്‍, ബന്ധു ലളിത എന്നിവരെ താന്‍ കൊല ചെയ്തതെന്നും കേഡല്‍ പോലീസിന്റെ ചോദ്യം ചെയ്യലില്‍ സമ്മതിച്ചുവത്രേ.

നേരത്തേ ഇവരുടെ വീട്ടിലെ ജോലിക്കാരിയായ രഞ്ജിതം കേസുമായി ബന്ധപ്പെട്ട് നിര്‍ണായക വിവരങ്ങള്‍ നല്‍കിയിരുന്നു. കേഡല്‍ നാലു പേരെയും കൊല ചെയ്തതു തന്നെയാണെന്നു തെളിയിക്കുന്നതായിരുന്നു ഇവര്‍ പറഞ്ഞ കാര്യങ്ങള്‍.

രഞ്ജിതം പറയുന്ന കാര്യങ്ങള്‍ പരിഗണിച്ചാല്‍ കേഡല്‍ ആദ്യം കൊല ചെയ്തത് അച്ഛന്‍, അമ്മ, സഹോദരി എന്നിവരെ കൊല ചെയ്തത് ബുധനാഴ്ചയോ അതിനു ശേഷമുള്ള ദിവസങ്ങളിലേ ആയിരിക്കാം. കാരണം ബുധനാഴ്ച മുതല്‍ മൂന്നു പേരെയും കാണാനില്ലായിരുന്നുവെന്ന് രഞ്ജിതം പറഞ്ഞിരുന്നു.

ബുധനാഴ്ച കേഡലിനോടൊപ്പം വീടിന്റെ മുകള്‍ നിലയിലേക്കു പോയ മൂന്നു പേരെയും രണ്ടു ദിവസത്തേക്ക് താന്‍ കണ്ടില്ലെന്നാണ് വേലക്കാരി പറഞ്ഞത്. ഇതേക്കുറിച്ച് ചോദിച്ചപ്പോള്‍ അവര്‍ വിനോദയാത്രയ്ക്കു പോയിരിക്കുകയാണെന്നായിരുന്നു കേഡലിന്റെ മറുപടിയത്രേ.

വെള്ളിയാഴ്ചയാണ് ബന്ധു കൂടിയായ ലളിതയെ കേഡല്‍ കൊല ചെയ്തതെന്നാണ് സംശയം. വെള്ളിയാഴ്ച വൈകുന്നേരം മുതല്‍ അവരെ വീട്ടില്‍ നിന്നു കാണാതാവുകയായിരുന്നുവെന്ന് രഞ്ജിതം പറഞ്ഞിരുന്നു.

English summary

nanthankode massacre case: Kadel is born criminal says police.