നഞ്ചിയമ്മയുടെ പാട്ട് കേട്ട് കേന്ദ്രമന്ത്രി അനുരാഗ് താക്കൂര്‍ കുറിച്ചിട്ടതിങ്ങനെ...

ദില്ലി: 68ാ മത് ദേശീയ ചലച്ചിത്ര പുരസ്കാരങ്ങൾ ഇന്ന് വിതരണം ചെയ്തിരിക്കുകയാണ്. രാഷ്ട്രപതി ദ്രൗപദി മുർമുവാണ് പുരസ്ക്കാരങ്ങൾ വിതരണം ചെയ്തത്. മലയാളത്തിന് ഇത്തവണ 8 പുരസ്കാരങ്ങൾ ആണ് ലഭിച്ചത്. അതിൽ മലയാളികൾ ഏറ്റവും കൂടുതൽ കാത്തിരുന്നത് മികച്ച ​ഗായികയ്ക്കുള്ള പുരസ്ക്കാരം നൽകുന്നത് കാണാൻ വേണ്ടിയായിരുന്നു. കാരണം മികച്ച ​ഗായികയ്ക്കുള്ള പുരസ്കാരം ലഭിച്ചത് മലയാളികളുടെ പ്രിയപ്പെട്ട ന‍ഞ്ചിയമ്മയ്ക്കായിരുന്നു.

അന്തരിച്ച സംവിധായകൻ സച്ചി സംവിധാനം ചെയ്ത അയ്യപ്പനും കോശിയും എന്ന ചിത്രത്തിലെ ഗാനത്തിനായിരുന്നു നഞ്ചിയമ്മയ്ക്ക് മികച്ച ഗായികയ്ക്കുള്ള പുരസ്‌കാരം ലഭിച്ചത്. സിനിമയിലെ ​ഗാനം പുറത്തിറങ്ങിയതിന് പിന്നാല തന്നെ ന‍ഞ്ചിയമ്മയുടെ പാട്ട് ഹിറ്റായിരുന്നു. നഞ്ചിയമ്മയ്ക്ക് പുരസ്കാരം ലഭിച്ച വാർത്ത വളരെ സന്തോഷത്തോടെയായിരുന്നു മലയാളികൾ കേട്ടത്.

അതുകൊണ്ടുതന്നെ ന‍ഞ്ചിയമ്മ മികച്ച ​ഗായികയ്ക്കുള്ള പുരസ്കാരം വാങ്ങുന്നത് കാണാൻ മലയാളികൾ കാത്തിരുന്നു. ഇന്ന് ന‍ഞ്ചിയമ്മ പുപരസ്ക്കാരം വാങ്ങിയിരിക്കുകയാണ്. ഇതിന് പിന്നാലെ മികച്ച ​ഗായികയ്ക്കുള്ള ദേശീയ പുരസ്കാരം ഏറ്റുവാങ്ങിയ നഞ്ചിയമ്മയെ അഭിനന്ദിച്ച് കേന്ദ്രമന്ത്രി അനുരാഗ് സിംഗ് താക്കൂർ രം​ഗത്തെത്തി. പുരസ്കാര ചടങ്ങിന് എത്തിയ നഞ്ചിയമ്മ 'കളക്കാത്ത സന്ദനമേറം... പൂത്തിരിക്കും പൂപറിക്കാ പോകിലാമോ...'എന്ന ഗാനം പാടുന്ന ദൃശ്യവും അനുരാഗ് സിംഗ് താക്കൂർ ട്വിറ്ററിൽ പങ്കുവച്ചു.

മികച്ച പിന്നണി ഗായികയ്ക്കുള്ള അവാർഡ് ലഭിച്ച ശ്രീമതി നഞ്ചിയമ്മ. നാടൻപാട്ടുകാരിയായ നഞ്ചിയമ്മ കേരളത്തിലെ ഒരുവ ചെറിയ ഗോത്രസമൂഹത്തിൽ നിന്നും സിനിമയുടെ ഒരു പശ്ചാത്തലുമില്ലാതെയാണ് വന്നത്. ദേശീയ ചലച്ചിത്ര പുരസ്‌കാര സമിതി അവരുടെ മാതൃകാപരമായി കഴിവിനെ തിരിച്ചറിയുന്നു. അവരുടെ മനോഹരമായ ശബ്ദം കേൾക്കൂ എന്ന് പറഞ്ഞാണ് മന്ത്രി നഞ്ചിയമ്മയുടെ പാട്ടുവ പങ്കുവെച്ചത്.

നിറഞ്ഞ കയ്യടിയോടെയാണ് നഞ്ചിയമ്മയെ പുരസ്കാര വേദി സ്വീകരിച്ചത്. ന‍‍ഞ്ചിയമ്മയുടെ പേര് പറഞ്ഞപ്പോൾ സദസ്സിൽ കയ്യടി നിറഞ്ഞു. രാഷ്ട്രപതി ദ്രൗപതി മുർമുവിൽ നിന്ന് എപ്പോഴും മുഖത്ത് നിറഞ്ഞുനിൽക്കുന്ന നിറഞ്ഞ ചിരിയോടെയാണ് നഞ്ചിയമ്മ ദേശീയ പുരസ്‌കാരം വാങ്ങിയത്. പുരസ്കാരം ഗോത്ര വിഭാഗത്തിൽ നിന്നുള്ള ഒരാളിൽ നിന്നും ഏറ്റുവാങ്ങുന്നതിൽ അഭിമാനം ഉണ്ടെന്ന് നഞ്ചിയമ്മ പറഞ്ഞു.

അനുരാ​ഗ് താക്കൂർ പങ്കുവെച്ച വീഡിയോക്ക് താഴെ നിരവധിപേരാണ് കമന്റുമായി വന്നിരിക്കുന്നത്. ന‍ഞ്ചിയമ്മയെ അഭിനന്ദിച്ചുകൊണ്ടുള്ള കമന്റുകളാണ്. എന്തൊരു ശബ്ദമാണ് ഇവരുടേത്, ഇത്ര മധുരമുള്ള ശബ്ദം കേട്ടിട്ടില്ല എന്നുപോകുന്നു കമന്റുകൾ.

English summary

National Film Award: After hearing the song of Nanjiyamma Union Minister anurag thakur got surprised